LEYLA AKARSU-M. ZAHÎT EKÎNCÎ/GELSENKIRCHEN
Îsal Festîvala Jinan a Zîlan ji bo cara 17´an li bajarê Elmanyayê Gelsenkirchenê hat lidarxistin. Di çarçoveya berxwedan û têkoşînê de “Jin Jiyan Azadî ji Kurdistanê ber bi Cîhanê ve” peyama sereke ya festîvalê bû. Tevgera Jinên Kurd li Elmanyayê (YJK-E) Festîval organîze kir.
Li ser navê YJK-E, aktîvîst Ayten Kaplan, got, ew vê festîvalê di şexsê şehîda Komkujiya Parîsê ya Duyem Evîn Goyî de diyarî şehîdên jin dikin.
Pêşî koma Kevana Zêrîn derket ser dikê û pê re jî hunermend Firmêsk. Li meydana festîvalê jî gelek dezgeh hatibûn danîn. Dezgehên aktîvîstên Elman, dezgehên xizmetê yên çay, qehew, yên kitêban, yên Weqfa Jinê ya ji Holandayê, dezgehên firotina mîwe û xwarinan hebûn. Yek ji van dezgehan a herî balkêş di wê kela germa havînê de ya çêkirin û firotina mehîrê bû.
Wekî din dezgehên JIN TV û Heyva Sor a Kurdistanê jî li meydanê hatibûn danîn. Berhemên keda destan ên Navenda Civana Jinan Utamarayê û yên SMJ-E´yê jî li ser dezgehan cihê xwe girtin.
