YEK tora xwe berfireh dike

• Yekîtiya Endezyar, Avahîsaz û Plansazên Kurd (YEK) a ku kongreya xwe ya yekemîn a asayî pêk anî, armanc dike ku xebatên xwe yên ji bo ciwan û xwendekaran zêde bike, bi saziyên pîşeyî yên li Ewropayê re têkiliyên mayînde deyne û berhevkirina teknîkî veguherîne projeyên hevpar.

ARAT ARARAT / KOLN

Piştî kongreya yekemîn a asayî ya Yekîtiya Endezyar, Avahîsaz û Plansazên Kurd (YEK), pêşaniyên serdema nû diyar bûn. YEK a ku armanc dike endezyar, avahîsaz û plansazên Kurd ên li dîasporayê di toreke pîşeyî ya hevpar de bîne cem hev, di serdema pêş de armanc dike ku rêxistinbûna xwe berfireh bike, xebatên xwe yên ji bo ciwan û xwendekaran zêde bike û bi rêxistinên pîşeyî yên li Ewropayê re têkiliyên mayînde pêş bixe.

Di kongreya yekemîn a asayî ya YEKê de ku di 26ê Îlonê de li bajarê Kolnê yê Almanyayê hat lidarxistin, xebatên serdema yek salî ya ji damezrandinê heta niha hatin nirxandin. Di kongreya ku bi beşdariya 26 delegeyên ji Almanya, Hollanda, Fransa, Çekya, Kanada û DYA’yê hat lidarxistin de Abdulhekîm Sîncar ji nû ve wekî serok hat hilbijartin; her wiha rêveberî û komîteyên xebatê yên serdema nû jî hatin diyarkirin.

Serokê YEKê Abdulhekîm Sîncar diyar kir ku di sala yekemîn a piştî damezrandinê de yek ji armancên herî girîng gihîştina bi endezyar, avahîsaz, plansazên bajaran û komên din ên pîşeyên teknîkî yên Kurd ên li dîasporayê dijîn bû. Li gorî agahiyên ku Sîncar parve kirin, zêdetirî 60 endamên fermî yên YEKê hene. Di tora ragihandinê ya WhatsAppê de zêdetirî 120 hevpîşe hene û hejmara kesên ku bi rêya medyaya civakî xwe gihandine wan jî nêzîkî 500 kesî bûye. Sîncar destnîşan dike ku hevpîşeyên wan ên ji Rojava, Başûr û deverên din ên Kurdistanê jî di nav vê sazûmanê de cih digirin.

Me bawerî bi paşeroja wê anî

Sîncar anî ziman ku kongreya yekem ji vî alî ve ne tenê tê wateya nirxandina xebatên salekê, di heman demê de zemîneke nîqaşê afirand ku ji bo paşeroja YEKê ramanên nû derketin holê. Sîncar got: "Me dît ku xebatên me yên di nava salekê de meşandine bersiv girtine û mirovan bawerî bi paşeroja YEKê aniye." Her wiha destnîşan kir ku di kongreyê de rexne û pêşniyar jî ketine rojevê û ji bo serdema nû plankirine ku xebatên berfirehtir bimeşînin.

Pêşî ciwan û xwendekar

Yek ji serenavên sereke yên serdema nû ew e ku xwe bigihînin ciwanên li zanîngehan di beşên endezyarî, avahîsazî û plansaziya bajaran de dixwînin. YEK armanc dike ku xwendekar tevlî torên pîşeyî bibin, di gihîştina derfetên kar û perwerdeyê de bên piştgirîkirin û di pêvajoya hevahengiya bi jiyana pîşeyî ya li Ewropayê de parvekirina ezmûnan zêde bibe. Di vê çarçoveyê de tê plankirin ku perwerdeyên pîşeyî, atolye, panel û forum bên lidarxistin.

Dê têkiliyên pêş bixe

Yek ji armancên din ên YEK’ê yên serdema nû ew e ku têkiliyên xwe bi rêxistinên pîşeyî û saziyên ku li Ewropayê di warên teknîkî de çalak in re berbiçavtir bike. Sincar diyar kir ku di serdema borî de bi hevkar û rêxistinên pîşeyî yên li Ewropayê re têkiliyên pêşîn hatine danîn û armanc ew e ku di pêvajoya pêş de ev têkilî bi xebatên hevpar werin pêşxistin. Sincar got: “Lidarxistina atolyeyên hevpar, panel, forum, perwerdeyên pîşeyî û xebatên bi vî rengî di nav planên me de ne.” Wî diyar kir ku armanca wan ne tenê avakirina toreke xurt di nava xwe de ye, ew dixwazin bi saziyên pîşeyî yên welatên ku lê çalakiyan dimeşînin re jî têkiliyên mayînde ava bikin. Tê armanckirin ku ev xebat ji bilî pêşketina pîşeyî ya endaman, ji aliyê entegrasyona bi jiyana pîşeyî ya li Ewropayê, derfetên perwerdeyê û parvekirina zanyarî û ezmûnan ve jî beşdariyê bikin.

Ekolojî, teknolojiya kesk û dîjîtalbûn

Sernavên xebatê yên YEK’ê yên serdema pêş ne tenê bi rêxistinbûna pîşeyî ve sînordar in. Di kongreyê de pêşxistina çareseriyên demdirêj û domdar ji bo pirsgirêkên ekolojîk ên ku civaka kurd pê re rû bi rû ye jî hat rojevê. Teknolojiya kesk û dîjîtalbûn di nav waran de ne ku tê plankirin di serdema nû de li ser wan bê rawestandin. YEK armanc dike ku bi hevparkirina zanyarî û ezmûnên teknîkî yên hevkarên ku li welatên cuda dijîn, projeyan ji bo pirsgirêkên ekolojîk û mirovî pêş bixe. Di vê çarçoveyê de, veguhertina zanyariya teknîkî ya endezyar, mîmar û plansazên li diasporayê bo projeyên hevpar, wekî yek ji sernavên bingehîn ên xebatên yekîtiyê yên serdema pêş derdikeve pêş.

Têkiliyên mayînde tên armanckirin

Yek ji mijarên ku YEK di serdema pêş de li ser radiweste jî pêşxistina têkiliyên bi sazî û avahiyên kurd ên cuda re ye. Sincar diyar kir ku YEK bêyî ku cudahiyê di navbera tu partiyên siyasî an saziyan de bike, hewl dide bi avahiyên cuda re têkiliyê dayne, lê di vê yekê de girîngiyê dide parastina taybetmendiya xwe ya saziyeke pîşeyî. Li gorî vê nêzîkatiyê, tê armanckirin ku derfetên xebata hevpar bi saziyên kurdistanî yên li diasporayê re werin nirxandin û hevrêzî were pêşxistin. Tê gotin ku Komîsyona Têkiliyên Derve ya YEK’ê jî di serdema borî de di vî warî de xebat meşandine û di serdema nû de tê plankirin ku ev têkilî veguherin hevkariyên birêkûpêktir û berbiçavtir.

‘Em hîn di serê rê de ne’

Piştî kongreya yekem, yek ji nirxandinên bingehîn ên rêveberiya YEK’ê ew e ku her çend di sala yekem a damezrandinê de asteke diyar a rêxistinbûnê hatibe bidestxistin jî, xebat hîn di qonaxa destpêkê de ne. Sincar jî tekez dike ku tevî tora endam û têkiliyan a heyî, pêvajo temam nebûye. Sincar got: “Em nabêjin me gihîşt armancên xwe û pêvajoyê bi dawî nakin. Berevajî, em difikirin ku em hîn di serê rê de ne.”

Rêveberiya nû ya ji neh kesan

Armancên bingehîn ên serdema nû ev in: kombûna endezyar, mîmar û plansazên kurd ên li diasporayê di nav toreke ji aliyê hejmarî ve firehtir de, û veguhertina vê torê bo hevkariyên pîşeyî yên berbiçav, xebatên perwerdeyê û projeyên hevpar. Pêkanîna van armancan jî li pêşiya desteya rêveber a nû ye ku di kongreyê de hat hilbijartin. Di serdema nû de ku desteya rêveber a ji neh kesan, alîkariya rêveberiyê ya ji çar kesan, desteya dîsîplînê ya ji pênc kesan û desteya kontrolê ya ji du kesan hatin diyarkirin, Abdulhekim Sincar dê serokatiyê bidomîne.