Ji bo Çakas nameya vekirî

Li Elmanyayê siyasetmedar, hunermend, parêzvanên mafên mirovan, ji bo Mehmet Çakas ê tê xwestin di 28’ê Tebaxê de radestî Tirkiyeyê bê kirin, ji bo Wezareta Navxwe, Wezareta Derve ya Elmanyayê û Serokwezîrê Eyaleta Saksonyaya Jêrîn, nameyeke vekirî nivîsîn. Daxwazên wan jî zelal e:’’Karê dersînorkirinê bê sekinandin. Derbarê Çakas de li benda biryarên dadgehê bin. Li Elmanyayê pêvajoyeke îltîcayê ya adil bê destpêkirin.’’ Di nav de parlementerê parlementoya federal a Elmanyayê, aktîvîstên mafên mirovan, akademîsyen, nûnerên sendîkayan û hunermend, gelek kes û sazî, li dijî dersînorkirina Mehmet Çakas a li Tirkiyeyê, bi nameyeke vekirî bang kirin. Name ji bo Wezîrê Karên Navxwe yê Elmanyayê Alexander Dobrint, Wezîrê Karên Derve Johann Wadephul û Serokwezîrê Eyaleta Saksonyaya Jêrîn Olaf Lies hate nivîsîn.

Doza wî dewam dike

Di nameyê de hate bibîrxistin ku Çakasê 45 salî vê gavê li girtîgeha Uelzen tê ragirtin, di sala 2022’an de bi daxwaza Elmanyayê li Îtalyayê hate girtin û hate radestkirin. Hate destnîşan kirin ku par ji aliyê Dadgeha Eyaleta Celle bi hinceta endamtiya PKK’ê 2 sal û 10 meh cezayê girtîgehê lê hate birrîn, serlêdana wî ya di meha Gulanê ya 2025’an de ya îltîcayê hatiye redkirin, lê li dijî vê biryarê serî li dadgeha Luneburgê hatiye xistin û doz hatiye vekirin.Di heman demê de li dijî biryara dersînorkirinê, dozeke lezgîn li Dadgeha Destûrabingehîn a Federal hatiye vekirin.

Li dijî destûrabingehîn û PMME’yê ye

Di nameyê de hate gotin:’’Ger Mehmet Çakas ji bo Tirkiyeyê were dersînorkirin, xeteriya wê yekê heye ku bikeve bin şopandina siyasî, rûbirûyê darizandinên ne adil û êşkenceyê bibe.’’ Hate diyar kirin ku li Tirkiyeyê derbarê wî de dozên ku tê de cezayê muebbeda giran tê xwestin hene û ev doz didomin. Ev yek ne li gorî destûrabingehîn a Elmanyayê û Peymana Mafên Mirovan a Ewrûpayê ye.

Divê li benda biryara dadgehê bin

Daxwaza îmzevanan derbarê wê yekê de ye ku li benda biryarên dadgehê bin û ji bo Çakas li Elmanyayê pêvajoyeke îltîcayê ya adil were pêkanîn. Di nameyê de wiha tê gotin:’’Em bang li we dikin ku bêyî ku li benda biryarên dadgehê û geşedanên pêvajoya aştiyê ya li Tirkiyeyê heye bin, dest ji pêkanîna dersînorkirina Tirkiyeyê berdin. Herwiha em dixwazin ku ji bo Mehmet Çakas li Elmanyayê pêvajoyeke îltîcayê ya adil birêve bibin.’’

Ji siyasetmedaran heta hunermendan

Di nav 60 kesên ku name îmzekirine de, Serokê Koma Meclîsê ya Die Line Heidi Reichinnek, Parlementerên Federal ên Die Linke Cansû Ozdemîr, Maik Bruckner, Jorrit Bosch, Parlementerê Keskan Kassem Tahir hene. Herwiha nûnerên herêmî yên sendîkayên mezin ên weke ver.di, IG Metall ve GEW ev name îmze kirin. Hunermend Jean-Philippe Kindler, Derhênerê şanoyê Titus Georgi, derhêner Sergej Gossner, lîstikvan Mariann yar û Suheyla Unlu jî ev name îmzekirin.

NAVENDA NÛÇEYAN