Girtiya nexweş Şîvekar Ataş bernadin

Rabîa Ataş a dayika girtiya nexweş Şîvekar Ataş e diyar kir ku şîdeta li girtîgehan zêde bûye û got: "Keça min nexweşiya dil e û divê niha ji girtîgehê derkeve. Ew her tim ji bo nexweşxaneyê di rê de ye. Derziyên dil didinê."

Piştî banga dîrokî ya Rêberê Gelê Kurd Abdullah Ocalan di 27'ê Sibatê de, gelek koman tekez kirin ku divê dewlet ewilî girtiyên nexweş û girtiyên siyasî berde. Di vê pêvajoyê de, li gorî raporên ATK'ê, mafê dermankirinê ji girtiyên nexweş re nayê dayîn û hîn jî Lijneyên Îdarî û Çavdêriyê bi hincetên kêfî yên wekî "rewşa wan ne baş e" berdana wan asteng dikin.

Şîvekar Ataş, girtiyeke nexweş a giran e û li Girtîgeha Jinan a Girtî ya Bakirkoyê girtiye. Tevî ku nexweşiya dil pê re heye jî nayê berdan. Dayika Şîvekar Ataş, Rabîa Ataş, li ser pêvajoyê û neberdana girtiyên nexweş axivî.

Rabîa Ataş, diyar kir ku zext û şîdeta li Girtîgeha Bakirkoyê ya Stenbolê zêde bûye û got: "Keça min Şivekar Ataş yek ji nexweşên giran e. Par, berdana du hevalên wê ku 30 sal in girtî ne, salek dirêj kirin. Niha, wan ev sê meh û nîvên din dirêj kirin. Bi vî awayî ew rê li ber berdana girtiyên din digirin."

Rabîa Ataş, diyar kir ku di vê serdema ku behsa aştiyê tê kirin de ji aliyê dewletê ve tu gav nehatiye avêtin da ku baweriya bi aştiyê ava bibe û wiha bi lêv kir: "Herêmên parastina medyayê hîn jî tên bombebarankirin. Zarokên me li wir jiyana xwe ji dest didin. Dewlet şerekî qirêj dimeşîne. Şîdet li girtîgehan zêde bûye. Nexweşên giran hene. Keça min nexweşiya dil e û divê niha ji girtîgehê derkeve. Ew her tim ji bo nexweşxaneyê di rê de ye. Derziyên dil didinê."

JINNEWS/AMED