Fitneyên li ser medyayên dîjîtal rawestînin

Şêniyên kantona Reqayê bang li tevahî gelê Sûriyeyê kir ku nekevin xefka fitneyan û gotin:"Fitneyên li ser medyayên dîjîtal rawestînin. Divê em ji bo tiştên li Sûriyeyê rû didin hişyar bin. Em bang li xwedî biryaran dikin ku ji bo yekitiya gelan û xakê biryarên guncav bidin."

Şêniyên kantona Reqayê der barê parvekirinên li ser medyaya civakî yên bi armanca derxistina fîtneyan de, re diyar kir ku her çiqas pêkhate pir bin jî, dîsa hemû di bin ala Sûriyeya azad de ne.

Gelê Sûriyeyê bi giştî û yê Herêma Bakur û Rojhilatê Sûriyeyê bi taybet dibînin ku hin alî di serî de dewleta Tirk a dagirker û çeteyên wê hewl didin bi rêya şaneyên xwe li ser medyaya dîjîtal fitneyan di navbera pêkhateyên herêmê de bi taybet di nava Kurd û Ereban de derxin.

Welatiya bi navê Mariya Ezîz a ji gundê Til El Semin ê bakurê Reqayê nerazîbûna xwe li hemberî hewldanên derxistina fîtneyan ên bi armanca têkbirina aramî û ewlehiya herêmê nîşan da û got: “Gelê Sûriyeyê bi hemû pêkhate û etnîkên xwe hevgirtî ye.”

Edhem Selûm ê ji bajarê Hezîma yê kantona Reqayê got: “Di vê dawiyê de li ser medyayên dîjîtal hewldanên derxistina fitneyan di nava pêkhateyên gelê Sûriyeyê de zêde bûne. Em van hewldanan bi tundî red dikin. Em bi hezaran salan bi hev re dijîn. Tu cudahî di navbera Ereb, Kurd, Suryan û Asûrî de nîn e."

Ebûd El Casim bang li gelê Sûriyeyê kir û got: “Fitneyên li ser medyayên dîjîtal rawestînin. Divê em ji bo tiştên li Sûriyeyê rû didin hişyar bin. Em bang li xwedî biryaran dikin ku ji bo yekitiya gelan û xakê biryarên guncav bidin."

ANHA/REQA