Fermandarê berxwedana biheybet

• HPG-NRÇ'ê ragihand ku Endamê Konseya Fermandariyê ya HPG'ê û Fermandarê Eyaleta Şehîd Delîl a Rojavayê Zapê Mordem Çewlîk di encama qezayekê de şehîd bû.

Daxuyaniya Navenda Ragihandin û Çapemeniyê ya Hêzên Parastina Gel (HPG-NRÇ) ya têkildarî şehadeta fermandar Mordem Çewlîk bi vî rengî ye:"Endamê Konseya Fermandariyê ya HPG'ê û Fermandariyê Eyaleta Şehîd Delîl a Rojavayê Zapê hevrêyê me Mordem Çewlîk dema ku li ser kar û wezîfeya xwe bû, 11'ê Tebaxa 2025'an ji ber qezayeke xeternak a li tunela şer şehîd bû û du hevrêyên pê re jî bi giranî birîndar bûn.

Hevrêyê me Mordem ku ji malbateke Elewî, welatparêz û gelekî hêja ya ji Çewlîkê bû, bi çalakiya 'Mertalên Zindî' tevlî nava refên gerîla bû, ku çalakî ji aliyê bi sedan ciwanên Apoyî yên bijarte yên rewşenbîr, zane, bi biryar û baweriya ji têkoşînê ve hate lidarxistin. Bi asteke bilind a têgihiştinê û baweriyeke mezin, bi rengekî îdeolojîk tevlî PKK'ê bû. Ji ber ku zanîbû bê ji bo çi tevlî bûye û di nava têkoşîna azadiyê de divê çi bike, di demeke kurt de biryara fedaîbûnê wergirt û derbasî nava Hêzên Taybet bû. Jiyana xwe ya têkoşînê da ber azadiya fîzîkî û parastina Rêber Apo, bi vî rengî di bin sîwanê Hêzên Taybet de gelek wezîfeyên cuda bi ser xist. Bi sekna xwe, kedkarî û fedakariya xwe, bi tevlîbûn û hevrêtiya xwe, bi dilnizmî û dilpakiya xwe li nava hevrêyên xwe hemûyan bû cihê hezkirin, hurmet û baweriyeke mezin. Hevrêyê me Mordem di şerê li Eyaleta Şehîd Delîl a Rojavayê Zapê 4 salan di asta fermandariyê de cih girt, ku ev şer pêvajoya herî bi heybet a dîroka têkoşîna me ye. Bi saya sekna xwe ya fedaî ya Apoyî, îradeya xwe ya ji pola, pêşdîtina xwe ya xurt, hostatiya xwe ya taktîkî û hunera xwe ya rêvebirina hejmareke zêde ya hêzê pêşengî ji berxwedaneke demdirêj û dîrokî re kir. Li çiyayên Kurdistanê 20 salan bê navber bi rengekî fedaî jiya, şer kir, milîtaniya fedaî ya Apoyî di her kêliyê de û li her cihî bi rengekî hêja temsîl kir û navê xwe li dîroka me ya têkoşînê nivîsand.

Şehadeta fermandarê me yê fedaî yê Apoyî hevrê Mordem li qezayeke wehîm û qet nedihat payin, ji bo me êşeke giran e ku nikare bê vegotin û qebûlkirin. Em bûyera şehadeta hevrê Mordem weke xwe bi malbata wî ya hêja û gelê xwe yê welatparêz re parve dikin, ku em gelekî pê êşiyan. Hevrêyê me Mordem Çewlîk ku dîrok nivîsand, ked da me hemûyan, xwe kir çeper û serketinên mezin afirand, Rêberê me, gelê me, tevgera me û hevrêyên me parast; bi sekn û têkoşîna xwe wê ji me re timî bibe mînak. Em fedaiyên Apoyî, em ê hîn bêhtir bibin Mordem û li ser rêya serketinê bi gavên ji xwe bawer bimeşin, bi vî rengî bîranîna wî nemir bikin. Em li ser vê bingehê sozê didin Rêberê xwe, şehîdên xwe û gelê xwe. Em sersaxiyê ji malbata hêja ya hevrê Mordem, ji gelê Elewî yê berxwedêr, ji gelê Kurdistanê yê welatparêz re dixwazin.

Bû xwedî kesayeta milîtan a APO’yî

Fermandarê fedaî yê Apoyî hevrêyê me Mordem Çewlîk ku bi navê fermandariya destana berxwedanê navê xwe li dîrokê nivîsand, bi vî rengî qala xwe kiribû:"Navê min Mordem Çewlîk e, 10'ê Cotmeha 1985'an li Çewlîkê jidayîk bûm. Ji ber karê bavê min ez li Îzmîrê mezin bûm. Heta ku biçim zanîngehê li Îzmîrê mam. Derdora me bi giranî ji mirovên welatparêz û sosyal demokrat bûn. Hem malbatê hem jî derdorê bi rengekî xwezayî gelekî bandor li min kirin. Gelek ji zarokên xaltîka min tevlî nava têkoşînê bûn. Di heftê saliya xwe de hem kalikê min hem jî pîrika min ji aliyê dijmin ve hatin girtin û li girtîgehê hatin bicihkirin. Ev yek bû sedem ku li hemberî dijmin bi hêrs bibim û bi rengekî xwezayî welatparêziya min jî mezin kir. Apê min şehîd Şehmûs Ûfûk-Tekîn Kîşîn sala 1989'an tevlî nava refên gerîla bû, ku ev yek di heman demê de bû kêliya destpêkê ku min PKK nas kir. Piştre apê min şehîd Rojhat Ûfûk-Engîn Kîşîn beşdarî nava refên gerîla bû û apekî min ê din li zindanê hate girtin, ku vê yekê min hîn bêhtir nêzî têkoşînê kir.

Hîn min lîse neqedandibû, ji malê cuda bûm û bi rengekî çalak beşdarî nava karên partiyê yên siyasî bûm, nêzî pênc salan min ev kar kir. Amed ji ber ku navenda Kurdistanê bû, ji bo xwendina zanîngehê min xwest biçim Amedê û çûm beşa Mamostetiya Fîzîkî ya Zanîngeha Dîcleyê. Ev dem ji bo min firsendeke baş bû ku PKK'ê, Rêbertî û îdeolojiyê ji nêz ve nas bikim. Lewma bi demê re min pêwîstî pê dît ku divê êdî tevlî nava gerîla bibim. Wê demê giranbûna şer û Pêngava 1'ê Hezîrana 2004'an hem ji min hem jî ji hemû ciwanên Kurd li benda bersivekê bû. Me jî çalakiya 'Mertalên Zindî' pêk anîn û ez jî bi vê wesîleyê tevlî nava refên gerîla bûm. Ji bo karibim ji aliyê leşkerî û îdeolojîk ve hîn şareza bibim, di asta herî bilind de bibim xwedî kesayetiyeke milîtaniya Apoyî, her wezîfeyê li her qadê bi serketî bi cih bînim û ji hemûyan girîngtir ji bo azadiya fîzîkî ya Rêber Apo pêk bîne, min xwe pêşniyar kir ku derbasî nava Hêzên Taybet bibim. Piştî du sal û nîv ên têr û tijî yên li nava Hêzên Taybet ku ji her alî ve bûm xwedî gelek tecrûbeyan, bi pêşniyar û israra xwe di destpêka sala sala 2008'an de derbasî Amanosê bûm. Li dû çar salên karê pratîkî yê li Qada Amanosan, bi biryara fermandariya me di sala 2011'an de derbasî Herêmên Parastinê yên Medyayê bûm. Piştî perwerdeyê derbasî Fermandariya Hêzên Taybet bûm û li nava Hêzên Taybet weke şervanekî û fermandarekî tevlî gelek karî bûm."

Şervanê fedaî û fermandarê şareza

Piştî pêvajoya Fermandariya Akademiyên Şehîd Huseyîn Mahîr, di destpêka sala 2016'an de weke fermandarê eniyê derbasî Avaşînê bû. Li dû vê pratîka serketî di payîza 2017'an de ji bo karên girîng û stratejîk ên Fermandariya me ya Biryargeha Navendî hate wezîfedarkirin ku ji bo wezîfeyên bi vî rengî pêwîstî bi cihê baweriyê heye. Li hemberî êrîşên dagirkeriyê yên dewleta Tirk a dagirker ên li ser Herêmên Parastinê yên Medyayê ji bo meşandina şerê parastina rewa û rabûna li ber dagirkeriyê, di sala 2022'an de ji Eyaleta Şehîd Delîl a Rojavayê Zapê re weke fermandar hate wezîfedarkirin. Ji bo fermandariya şer derbasî Eyaleta Şehîd Delîl a Rojavayê Zapê bû. Hevrêyê me Mordem ku bi hest û fikrên welê esîl rahişt şûrê serketinê, di şerê li Eyaleta Şehîd Delîl a Rojavayê Zapê ku pêvajoya berxwedana herî bi heybet a dîroka me ya têkoşînê ye, ji Tebaxa 2022'an heta vir ve 4 salan di asta fermandariyê de cih girt. Bi sekna xwe ya fedaî ya Apoyî, bi îradeya xwe ya ji pola, bi pêşdîtina xwe ya bilind, bi hostatiya xwe ya taktîkê, bi hunera xwe ya rêvebirina gelek tîm û hêzeke mezin pêşengî ji berxwedaneke dîrokî û demdirêj re kir. Hevrêyê me Mordem hem şervanekî fedaî, hem rêveberekî şareza, hem fermandarekî xurt hem jî koordîneya şerekî hostatî bû."

Agahiyên li ser nasnameya hevrêyê me Mordem Çewlîk ê şehîd bûye, bi vî rengî ne:

Mordem Çewlig (Bûlût Kîşîn), li Çewligê jidayîk bûye, 11’ê Tebaxa 2025’an li Zapê şehîd bû.

BEHDÎNAN