Ew nirxên me yên herî esîl in

• HPG NRÇ’ê gerîlayên şehîd bibîranîn û got:’’Ew bûn nirxên me yên herî esîl ku tevî hemû zehmetiyan jî paşerojên me yên azad afirandin û dîroka me ya azadiyê nivîsandin.’’

Navenda Ragihandin û Çapemeniyê ya HPG’ê derbarê şehîdan de ev agahî dan:’’Em hevrêyên xwe Çekdar, Hêvî, Zanyar, Rojvan û Hasan ku di têkoşîna sala 2017’an de bi rihê fedayî yê APO’yî li dijî êrişên berfireh ên tinekirin û dagirkeriyê yên dewleta Tirk a dagirker, hebûna gelê me û welatê me Kurdistanê parastin û gîhîştin şehadetê, bi rêzdarî, hezkirin û minnet bibîr tînin. Ew bûn nirxên me yên herî esîl ên ku tevî hemû zehmetiyan di rêya jiyana azad de, paşerojên me yên azad afirandin û dîroka me ya azadiyê nivîsandin. Ev hevrêyên me ku heryek ji wan binirx, wêrek, fedakar û mirovên herî xweşik bûn, hertim wê di dilê me de bijîn, bîranîn û afirînên wan wê hertim bêne jiyankirin. Di serî de malbatên hêja yên hevrêyên me yên şehîd, em ji bo tevahî xelkê xwe yê Kurdistanê re sersaxiyê dixwazin û careke din bi rêzdarî û minnet, li pêş bîranîna wan a birûmet, bejna xwe ditewînin.

Felsefeya PKK’ê şênber kirin

Hevrêyê me Çekdar li gundê Gencesîn ê Urmiyeyê di nava malbateke welatparêz a eşîra Şikakî jidayîk bû. Di sala 2012’an de tevlî nava refên gerîla bû. Bi kesayeta xwe ya xurt û tevlîbûna xwe ya milîtanê, li ser her hevrêyekê ku ew nas dikirin bandoreke mezin çêkir. Bi şêwazê xwe yê komûnal her hevrêyek tevlî jiyanî kir û ew jî zêdetir tevlî bû. Taybetmendiyên milîtaniya APO’yî ku di şexsê xwe de şênber kir û di hemû qada jiyanê de nîşan da, hezkirina hemû hevrêyên xwe bidest xist. Ew ê di mîrasa têkoşîna me de hertim jiyan bike û pêş me ronî bike.

Hevrêya me Hêvî jî li navçeya Xîzan a Bêdlîsê di nava malbateke welatparêz de jidayîk bû. Di sala 2013’an de tevlî nava refên gerîla bû. Bi sekn, tevlîbûn û kesayeta xwe ya germ û jidil, ji aliyê hemû hevrêyan hate hezkirin. Dilsoziyeke xwe ya mezin ji bo Îdeolojiya Rizgariya Jinê ya Rêber APO pêşxistiye çêbû û pratîk kirina tiştên fêr bûye esas girt û karîbû bibe milîtaneke serketî ya PKK û PAJK’ê ya ku bibe bersiva pêdiviyên qonaxê. Karîbû taybetmendiyên milîtaniya APO’yî di kesayeta xwe de şênber bike.

Hevrêyê me Zanyar li erdnîgariyeke ku li zozanên Feraşînê di nava malbateke welatparêz de çavên xwe li dinê vekir. Di sala 2013’an de tevlî nava refên gerîla bû. Her kêliya jiyana xwe ji bo têkoşîna me feda kir, bêwestan ji bo azadiya Rêbertiya me û gelê me kar kir û bi milîtanî şer kir. Her karekî ku partiya me da pêş wî, bi layiqî pêk bîne, ked û hewldaneke mezin pêkanî. Ti karekî xwe nîvçe nehişt û bû milîtanekî APO’yî ku her hevreyekê me ji xwe mînak bigre. Felsefeya PKK’ê di şexsê xwe de şênber kir û derbasî jiyanê kir.

Hevrêyê me Rojvan, di nava malbateke welatparêz ku ji ber zext û êrişên dewleta Tirk a dagirker neçar man ji Kurdistanê koçî Îzmîrê bibin de, çavên xwe li dinê vekir. Di sala 2016’an de tevlî nava refên gerîla bû. Ji bo fêmkirina felsefeya Rêber APO û rastiya şehîdan fam bike, hertim lêhûrbûna xwe hebû, her kêliya xwe fedayî têkoşînê kir. Li dijî êrişên dagirkeran cihê xwe di eniyên herî pêş de girt û erkên xwe yên milîtaniyê bi layiqî pêkanî. Bi wêrekiya xwe ya di qada şer de û dilsoziya xwe ya di têkîliyên hevrêtiyê de hezkirina hemû hevrêyan bidest xist.

Hevrêyê me Hasan li navçeya Çinar a Amedê di nava malbateke welatparêz de jidayîk bû. Di sala 2015’an de ji Amedê tevlî nava refên gerîla bû. Di êrişên dijmin de yek ji wan hevrêyan bû ku bersiva destpêkê da. Bi wêrekî şer kir û bi fedakariyeke mezin tevlî xebatên binesaziyê bû. Hêrsa xwe ya li hemberî dijmin, di çalakiyên ku têvlîbûne de nîşan da. Ji bo tola hevrêyên şehîd werbigre û ala wan a berxwedanê bigîhîne serketinê bêwestan ked da û têkoşiya. Di jiyan û di şer de bi pêşengiya xwe, bû milîtanekî fedayî yê di xeta APO’yî de.”

Agahiyên nasnameya hevrêyên me yên şehîd de wiha ne:

Çekdar Çiyager (Ferşad Hasanzade), li Urmiyê jidayîk bûye, 25’ê Nîsana 2017’an li Xakurkê şehîd bû.

Hêvî Koçer (Nafiya Gezîcî), li Bedlîsê jidayîk bûye, 11’ê Mijdara 2017’an li Avaşînê şehîd bû.

Zanyar Faraşîn (Vedat Abî), li Wanê jidayîk bûye, 25’ê Nîsana 2017’an li Xakurkê şehîd bû.

Rojvan Baz (Murat Emre Donmez), li Îzmîrê jidayîk bûye, 25’ê Nîsana 2017’an li Xakurkê şehîd bû.

Hasan Qerejdax (Sedat Arslan), li Amedê jidayîk bûye, 27’ê Tîrmeha 2017’an li Zapê şehîd bû.

BEHDÎNAN