Doza tazmînatê li malbatên gerîla

Di 7’ê Îlona 2021’an de li herêma Kato Marînos a Colemêrgê ji artêşa Tirk ve êrişeke hewayî hat kirin. Di êrişa hewayî de 2 gerîlayên HPG’ê Abdullah Yîgît û Agît Acar şehîd bûn. Cenazeyên gerîlayan ewil birin morga Nexweşxaneya Dewletê ya Colemêrgê û piştre jî birin morga Nexweşxaneya Dewletê ya Wanê. Cenazeyên Yîgît û Acar bêyî agahiyê bidin malbatan li goristana bêkesan hatin definkirin. Malbatan cenazeyên xwe di 18'ê Mijdara 2021'ê de wergirtin. Piştî 3 salan Fermandariya Giştî ya Cendirmeyan bi hinceta "Ji ber tazmînat ji bo personelan hatiye dayîn cemawerî zirar kiriye" ji malbatan tazmînat xwest. Fermandariya Cendirmeyan malbatan da ber îcrayê û tazmînat ji wan xwest. Di çarçoveya biryara îdarî de bi rêya Daîreya Îcrayê ya Wanê teblîxata tazmînatê ji malbatan re hat şandin. 

Ev yek zilm e!

Di teblîxatê de Fermandariya Giştî ya Cendirmeyan bi hinceta "Ji ber tazmînat ji bo personelan hatiye dayîn cemawerî zirar kiriye" ji dê, bav û birayên Acar û Yîgît 44 hezar 743 TL xwest. Di teblîxê de hat diyarkirin ku 5 hezar û 901 TL faîz lê hatiye zêdekirin. Birayê Abdullah Yîgît Ahmet Yîgît ev yek weke dermirovî pênase kir û got:"Di 18'ê Mijdarê de ji Daîreya Îcarayê ya Wanê teblîxat hat. Li gorî vê teblîxata ji aliyê Serfermandariya Giştî ya Cendirmeyan ve hatiye şandin, li warîsên qanûnî yên birayê min û hevalên wî doza tazmînatê hatiye vekirin. Ji malbata me, ji dê û bavê min, ji dê û bavê Agît Acar, bi giştî ji 16 kesan tazmînatê dixwazin. Pêşî dikujin û paşê jî tên pereyan dixwazin. Ev zilm e. Em vê şermezar dikin." 

Bi polîtîkayên qirêj biratî çênabe

Bavê Abdullah Yîgît Selîm Yîgît jî got:"Ev bêexlaqî ye. Cezakirina malbatê ye. Yê dimire kî dibe bila bibe, ew çûye êdî. Dixwazin gel ji bawerî û edetên wê dûr bixînin. Dixwazin mirovan ji zimanê wan û nasnameya wan dûr bixînin. Bi van pêkanînan dixwazin wan çavtirsandî bikin." Selîm Yîgît, anî ziman ku ji bo biratî bê misogerkirin divê pêşî li van pêkanînan bê girtin û got:"Bi van polîtîkayên qirêj biratî çawa pêk tê? Eger behsa biratiya gelan bikin, divê pêşî li wekheviya mafan bê girtin. Biratî nikare. bê wekhevî pêk were. Bi van pêkanînan nikarin gel bitirsînin. Her roj ceza li me tê birîn, lê me tu carî dest ji têkoşîna xwe bernedaye û em ê dest jê bernedin jî." 

MA/OMER AKIN