Divê destûr mafê jinan biparêze

Endama Koordînasyona Kongra Star Elîf Hemo da zanîn jinên tevli 1’emîn Konferansa Jinên Kurd li Rojava divê ji bo jin di nava destûreke bingehîn de cihê bigirin têbikoşin û got:"Divê destûr mafê jinan biparêze."

Li bajarê Qamişlo yê Bakur Rojhilatê Sûriyeyê di roja 23’yê Adarê de bi dirûşma “Bi pêşengiya jinên Kurd yekitiya neteweyî ya Kurd misoger dibe” 1’emîn Konferansa Jinên Kurd li Rojava hat lidarxistin. Endama Koordînasyona Kongra Star Elîf Hemo têkildarî konferansê nirxandin kir. 

Elîf Hemo di destpêka axaftina xwe de bal kişand ser hedefên konferansê û bandora mezin a li ser yekitiya neteweyî, anî ziman ku ji bo aliyên Kurd bibin yek hewldan û fedakariyên mezin kirine û wiha got: “Gelê Kurd salên dirêj e ji bo bihêzkirina aliyê Kurd û di nava gel de pêşxistina ruhê yekitiyê têdikoşe. Îro gelê herêmê û partiyên Kurdan çalakiyên ku hevpar dane meşandin, yek ji serkeftinên gelê Kurd bi dest xistiye.”   

Banga Rêber Apo 

Elîf Hemo diyar kir ku bi banga Rêberê Gelê Kurd Abdullah Ocalan a ‘Aştî û Civaka Demokratîk’ jinan pîrzobahiyên 8’ê Adarê û Newrozê bi coşeke mezin pêşwazî kirine û wiha got: “Coşa di 8’ê Adarê û Newrozê de di konferansê de jî xwe da der. Peyama Rêber Apo ya 8’ê Adarê, yekitî û bihevrebûna di navbera jinan de bi hêztir kir. Beşdarên 1’emîn Konferansa Jinên Kurd li Rojava piştrast kirin ku banga Rêber Ocalan li hemberî pirsgirêkên ku tên jiyîn çareseriya herî guncav e. Di qonaxa ku Kurdistan û Rojava tê re derbas dibe de berpirsyariya ku dikeve ser milên jinan heye. Di çarçoveya konferansê de yek ji mijarên herî girîng, berpirsyariya ku di pêkanîna yekitiya neteweyî de dikeve ser milên jinan bû.”

Divê destûr mafê jinan biparêze 

Elîf Hemo bal bir ser destûreke bingehîn û wiha got:" Bi temamî jinên ku beşdarî konferansê bûne diyar kirin ku destûra bingehîn a nû ya Sûriyeyê nûnertiya wan nake, ji ber nûnertiya pergaleke navendî û mezhebî dike, pêkhateyên Sûriyeyê û mafên jinan naxe bin temînatê. Beşdaran diyar kirin ku di destpêkê de mafên jinan û parastina wan daxwaza destûreke bingehîn ku mafên hemû koman û pêkhateyan digre nava xwe kirin." Elîf Hemo di dawiya axaftina xwe de destnîşan kir ku divê jin li dijî rejîma zilm û otorîter têkoşîna xwe mezin bikin.

NÛJINHA/HESEKÊ/AVRÎN NAVDAR