Wênekêşên jin ên li Îranê bi wêneyên xwe hewl didin jiyanek tevahî bi çavên xwe vebêjin. Yek ji wan jinan jî Evîn Abbasî ye. Evîn Abbasî ku bi xelatan ji pêşbirkên navneteweyî vegeriya, got: "Rewşa wênekêşiya jinan di civaka Kurdistanê de baştir bûye û tabû têne şikandin" û diyar kir ku ew her tim li ser jinan û tecrûbeyên wê radiwestin.
Di mihrîcana ku îsal li Qirgizistanê hat lidarxistin de, berhemên Evîn Abbasî ji aliyê Komeleya Wênekêşên Asyayê ve di asta navneteweyî de hatin xelatkirin. Evîn Abbasî di beşa 'wênekêşana têgînî' de bû yek ji 30 wênekêşên herî baş ên cîhanê. Hunermend di vî warî de xwediyê gelek xelatan e.
Evîn Abbasî li gundê Şûî yê Banê ji dayîk bûye, xwendina xwe ya seretayî û navîn li Tehranê qedandiye. Xwendina xwe ya zanîngehê di beşa yasa de li zanîngeha Peyam Nûr a bajarê Seqizê qedandiye. Lê belê, wê hilbijart ku di wênekêşiyê de bibe profesyonel.
Evîn Abbasî têkildarî eleqeya xwe ya pîşeyî ya bi wênekêşiyê de jî got, "Ji sala 2016'an û vir ve bi awayekî ciddî û profesyonel bi wênekêşiyê re eleqedar im. Şêwaza xebata min konseptî ye. Ez bi giranî di qada jinê de dixebitim. Sedema ku xebatên min di festîvalan de derdikeve pêş ev e. Ramanên nû û nûbûnên di rêbazên xebatê de ku karê min di warê wênekêşiyê de aktuel û balkêş dike."
'Tabû hatin şikandin'
Evîn Abbasî, da zanîn ku jin di karê xwe de bi gelek zehmetiyan re rû bi rû dimînin û got ku her ku hejmara jinan di vî warî de zêde dibe, tabû jî tên şikandin. Evîn Abbasî got, “Di dema dawî de ev tabû di civaka Kurdistanê de hatin şikandin. Berê hebûna kamerayek di destê jinekê de nehate pêşwazîkirin. Kevneşopî û adetên di civakê de gelek astengî derdixistin, lê niha di vî warî de qada xebatên jinan zêdetir bûye. Gelek malbat hê jî nahêlin keçên xwe vî pîşeyî hilbijêrin. Di wê baweriyê de ye ku pîşeyê paşerojê nîne, lê cîhana îro cîhana deng û wêneyê ye û derfetên mezin û balkêş ji bo jinên afirîner di vî pîşeyî de hene. Bêguman wênekêşiya têgehî hîn bi têra xwe nayê zanîn û mirov niha bêtir bala xwe didin wêneyên xwezayê."
Mijara sereke jin e
Evîn Abbasî, anî ziman mijarên wê herî zêde jin in û got: “Sedema ku mijarên min bi piranî jin in ew e ku ez jî jin im û di nava vê civakê de dijîm. Ez xwedî bawernameya hiqûqê me û di malbateke ku tê de bira nebûn de mezin bûm. Ev rewş her tim bû sedem ku kesên derdora min bi awayekî cuda li min û malbata min binêrin. Hemî van ezmûnan ji min re bûn alîkar ku şêwazek xebatê ya cûda bibim. Mijarên min ên wênekêşiyê bi giranî xwişkên min, jinên taxê û jinên civaka derdora min in. Ez di wêneyên xwe de rasterast peyamekê nadim temaşevan; Belê her temaşevanek li gorî zîhniyeta xwe li ser wêneyan şîrove û ramanan dide û bi vî awayî rê li ber temaşevanan vedikim.”
Evîn Abbasî ku li welatên cuda beşdarî gelek pêşangehên navneteweyî bû û ji her pêşbirkê bi xelat vegeriyan, diyar kir ku ew dixwazin berhemên wê bigihêjin zêdetir mirovan.
JÎNHA/BANE
