Dagirker ji miriyên Kurdan jî ditirsin

Rejîma Îranê nehişt cenazeyê sînemager Mensûr Kerîmiyan ku 23’yê Kanûna 2023’an, di êrişa dewleta Tirk a dagirker de şehîd bibû, derbasî Rojhilatê Kurdistanê bibe. Cenaze wê li Silêmaniyê were veşartin.

Sînemager Mensûr Kerîmiyan di 23’yê Kanuna 2023’yê de li Rojavayê Kurdistanê di encama êrişa dewleta Tirk a dagirker de şehîd bû. Cenazeyê şehîd Mensûr Kerîmiyan di 30’ê Kanûna 2023’an de ji Rojavayê Kurdistanê bi merasîmeke girseyî ji bo Başûrê Kurdistanê hate oxirkirin.

Piştî cenaze gihişt Silêmaniyê, di 31’ê Kanûna 2023’an merasîma oxirkirina cenazeyê şehîd Mensûr Kerîmiyan li ber derê Sînemaya Salim ya li bajarê Silêmaniyê, bi tevlîbûna dehan hunermend, nûnerên aliyên siyasî û xelkê Başûrê Kurdistanê pêkhat. Piştî merasîmê cenazeyê şehîd Mensûr ber bi Rojhilatê Kurdistanê ve hate oxirkirin.

Dihat payîn, cenazeyê Şehîd Mensûr li warê wî bajarê Sine ya Rojhilatê Kurdistanê bihatiba veşartin. Lê rejîma Îranê nehişt cenaze derbasî Rojhilatê Kurdistanê bibe.

Ji bo vê jî malbatê biryar da di 7’ê Çileyê saet 10:30’an de cenazeyê Kerîmiyan li goristana Şêx Ebas ya li taxa Wilube ya Silêmaniyê bispêrin axê. Şehîd Mensûr Kerîmiyan di sala 1984’an de li bajarê Sine ji dayîk bûye. Nêzî 20 salan di warê sînemayê de kar kiriye. Du sal bûn li Rojavayê Kurdistanê derhêneriya filman dikir. 

NAVENDA NÛÇEYAN