Têkoşîna şehîdan hêza me xurttir dike

• Fermandarên pêşeng ên Tevgera Azadiya Kurdistanê Koçero Ûrfa, Nûreddîn Sofî û Bahtiyar Gabar li gelek navendên Ewrûpayê, Skandînayva û Avûstralyayê bi merasîmên girseyî hatin bibîranîn.

Xelkê Kurd li seranserî cîhanê bi merasîmên girseyî xwedî li pêşengên Tevgera Azadiyê ya Kurdistanê Koçero Ûrfa, Nûreddîn Sofî û Bahtiyar Gabar derketin û peyama li ser şopa wan xurtkirina têkoşînê dan.

KOLN

Ji fermandarên pêşeng ên Tevgera Azadiya Kurd Nûreddîn Sofî, Koçero Ûrfa û Bahtiyar Gabar li bajarê Koln ê Elmanyayê bi merasîmekî girseyî hatin bibîranîn. Bîranîn bi organîzasyona hevpar a PYD’ê Ewropa û KOMAW’ê re li salona Saal 2000 hate lidarxistin. Hevserokên KCDK-E’yê Zubeyde Zumrut û Engîn Sever, Hevserokên KON-MED’ê Ruken Akça û Kerem Gok, endamên KOMAW’ê, hunermend, siyasetmedarên Kurd ên li sirgûnê û nûnerên saziyên Kurd ên demokratîk ên li Elmanyayê û gelek Kurdistanî tevlî bîranînê bûn. Piştî axaftinan, sînevîzyoneke ku jiyana têkoşîna fermandarên şehîd vedibêje, hat nîşandan. Piştre, hunermend Xelîl Xemgîn derket ser dikê û helbesta xwe ya ji bo şehîdan xwend. Hunermendên TEV-ÇAND’ê jî strana “Ey Şehîd” gotin. Bîranîna ku nêzî sê saetan dom kir, bi dirûşmên “Şehîd Namirin” bi dawî bû.

KIEL

Gelê Kurd li bajarê Kiel ji bo bîranîna Nûreddîn Sofî, Koçero Ûrfa û Bahtiyar Gabar li hev civiyan. Çalakiya bîranînê ku ji aliyê Meclîsa Gelê Kurd a Kielê ve li Navenda Civaka Kurd a Demokratîk hate lidarxistin, bi tevlîbûneke zêde pêk hat. Axîvêrên çalakiyê di şexsê her sê şehîdên Kurdistanê de hemû Şehîdên Tevgera Azadiyê bi bîr anîn. Di çarçoveya bîranînê de sînevîzyona li ser jiyana Sofî, Ûrfa û Gabar hate pêşandan. Çalakî bi dirûşmeyên “Şehîd Namirin”, “Bijî Serok Apo” û “Jin Jiyan Azadî” bi dawî bû.

FREIBURG

Li bajarê Freiburgê jî her sê şehîdên pêşeng Nûreddîn Sofî, Koçero Ûrfa û Bahtiyar Gabar bi çalakiyekî hatin bibîranîn. Gelek kes tevlî çalakiya ku bi organîzasyona meclîsên gel û jinan hate lidarxistin bûn. Çalakî ji bo bîranîna şehîdên azadiyê bi deqîqeyekî rêzgirtinê destpê kir. Piştre li ser wateya şehadet û têkoşîna şehîdan axaftin hatin kirin. Piştî axaftinan sînevîzyona li ser jiyana şehîdan hate pêşandan û piştre bi dirûşmeya “Şehîd Namirin” bi dawî bû.

HELSINGBORG

Li bajarê Helsinborg ê Swêdê, fermandarên pêşeng Nûreddîn Sofî, Koçero Ûrfa û milîtanê azadiyê Bahtiyar Gabar bi çalakiyekî girseyî hatin bibîranîn. Di çalakiyê de li ser navê malbatên şehîdan Elî Şengalî û siyasetmedar Çiyazan Serhat axivîn. Piştî axaftinan, bîranîn bi pêşandana sînevîzyonê dewam kir. Bîranîn piştî pêşandana sînevîzyonê bi dirûşmeyên  “Şehîd Namirin” û “Bijî Serok Apo” bi dawî bû.

BORDEAUX

Çalakiya bîranînê ya li bajarê Bordeaux ê Fransayê ji bo bîranîna Şehîdên Azadiya Kurdistanê bi deqîqeyek rêzgirtinê despê kir. Piştre siyasetmedar Alî Haydar derbarê hevalên xwe yên şehîd bûne de axivî. Bîranîna ku bi pêşandana sînevîzyonê dewam kir, bi dirûşmeya “Şehîd Namirin” û “Bijî Serok Apo” bi dawî bû.

MULHOUSE

Kurdistaniyan li bajarê Mulhousê ya Fransayê ji bo bîranîna Nûreddîn Sofî, Koçero Ûrfa, gerîlayê HPG’ê Bahtiyar Gabar û Hasan Viyan merasîma bîranînê li dar xistin. Eleqeyekî mezin nîşanî bîranînê hate dayîn. Merasîma bîranînê ji aliyê Navenda Civaka Demokratîk a Mulhousê ve bi tevlîbûna malbatên şehîdan û Kurdistaniyan pêk hat. Endama TJK-E Done Guzel axivî. Piştre sînevîzyona li ser jiyan, têkoşîn û kesayeta her sê şehîdan hate pêşandan.

SYDNEY

Li bajarê Sydney ê Awusturalyayê fermandarê pêşeng ên Tevgera Azadiya Kurdistanê Nûreddîn Sofî, Koçero Ûrfa û milîtanê fedayî Bahtiyar Gabar li Navenda Civaka Kurd a Demokratîk bi çalakiyekî girseyî hatin bibîranîn. Hevserokê DKTM’ê Tîmûr Tatvan diyar kir ku têkoşîna ku bi pêşengiya Tevgera Azadiyê pêş ket, bi xwîn û keda bi hezaran şehîdên têkoşîna azadiya Kurdistanê hat van rojan. Çalakiya bîranînê bi pêşandana sînevîzyona li ser jiyan û têkoşîna Nûreddîn Sofî, Koçero Ûrfa û Bahtiyar Gabar bi dawî bû.

NAVENDA NÛÇEYAN