SANA siyaseta TRT’ê dimeşîne

Rojnemevan Dîcle Ehmed têkildarî polîtîkayên dezgehên çapemeniya Sûriyeyê diyar kir ku rêveberiya demkî ya Sûriyeyê dixwaze mîna dewleta Tirk bi zimanê civakê êrîşî civakê bike.

Rêveberiya demkî ya Sûriyeyê ku di destê HTŞ’ê ya cîhadîst de ye, di nava nakokî û tevliheviyên li Sûriyeyê tên jiyîn de gavên bi nakok diavêje. Çawa ku li ser bingehek ne guncav ragihand ku dê hilbijartinên meclîsa gel a Sûriyeyê bên çêkirin, Ajansa Sûriyeyê ya Fermî SANA ragihand ku dê sererastkirinê di avahiya xwe ya ajansê de bide çêkirin. SANA’yê got ku li ba zimanên Tirkî, Fransî, Ispanî û Ingilîzî, dê zimanê Kurdî jî êdî bê bikaranîn. Ev gavê ku ji aliyê SANA'yê ve hatiye avêtin, di qada çapemeniyê ya Sûriyeyê de gelek pirs û nakokî bi xwe re ava kir.

Rojnemevan Dîcle Ehmed ku di heman demê de edîtora Ajanas Nûçeyan A Hawar (ANHA) ye, piştperdeya vê siyasetê nirxand.

Dîcle Ehmed di destpêka nirxadinên xwe de anî ziman ku hêzên desthiladar di nîşandana polîtîkeyên xwe de ragihandinê mîna amûrekê bikar tîne û wiha got: “Hêzên desthilatdar ji bo ku bikaribin bandora xwe li ser gel û civaka hikum dikin biteysînin, gelek rêbazên cur be cur bikar tînin. Bê guman ev hêz bi riya şerê taybet û hîn siyasetan, civakê dikin bin kontrol û desthilatdariya xwe. Em dizanin ku civak bi çand û zimanê xwe hene. Ji bo vê jî hêzên desthilatdar çand û zimanê civakê di siyaseta xwe de bikar tînin ku ev yek jî bi riya ragihandin û çapemeniyê pêk tê.”

Dîcle Ehmed behsa gavê ku ji aliyê SANA’yê ve hatiye avêtin kir ku wiha anî ziman: “Ragihandina me ya azad li ser hîmên demokratîk, çanda jiyana hevbeş, yekîtiya gelan û azadiya jin birêxistin dike. Di heman demê de hemû pêkhateyên di Bakur û Rojhilatê Sûriyê de bi ziman û çanda xwe ya resen xwe îfade dikin û jiyan dike ku ev yek jî di weşanên me de xuya dike û xwe dide der. Lê em dibînin ku li dijî vê siyaseta me hewildanên cidî hene ku vê yekê li dijî me bikar bînin. Dixwazin zimanê me bi rêbaz û hişmendiya xwe li dijî me bikar bînin. Bi taybetî jî niha ragihandina Sûriyeyê sererastkirinekê di xebatên xwe de çêdikê ku tê gotin wê di ajansa xwe ya Fermî SANA'yê de û hemû beşên wê de, êdî zimanê Kurdî jî were bikaranîn. Ev gav ji bo xapandina gelên Bakur û Rojhilatê Sûriyeyê ye û em bawer in ev siyaset weke dewleta Tirk e ku dê zimanê me li dijî me bikar bînin. Çawa ku TRT xizmeta desthilatdariya dewleta Tirk dike, dê SANA jî heman polîtîkeyê bikar bîne.”

NÛJINHA/KOBANÊ/BERÇEM CÛDÎ