Rêbertî azad nebe aştî çênabe

Xelkê Amedê nerazîbûn nîşanî gavneavêtina dewletê ya li hemberî banga dîrokî ya Rêber APO da û got:“Tecrîd hêj didome. Divê Rêber Apo azad bibe. Nexwe pêvajo pêş nakeve.”  Fuat Oren diyar kir ku îktîdar yek ji muxatabên bangê ye lê heta niha jî tu gavên şênber neavêtiye û got:“Dema wan gavek avêtin em ê çar gavan biavêjin. Divê gavan biavêje ku em jî bikarin jê bawer bin. Lê hêj jî gav neavêtiye. Min tiştek ji vê pêvajoyê fêm nekir. Hêvîdarim baş pêş bikeve.” 

Faîk Kurt jî anî ziman ku ew aştiyê dixwazin lê dewlet xwe nade ber û got:“Rêbertiya me girtî ye. Heke li derve bûya jixwe ev pirsgirêk nedibû. Heta Rêbertî azad nebe em jî azad nabin û aştî jî nabe.” 

Desthilatdarî baweriyê nade 

Semra Akin jî got:“Kî serî rake yekser diavêjin zindanê. Lewma em jê bawer nakin. Ma wê kî bi kesekî wiha bawer bike? Yanî li rexekî dibêje aştî li rexa din jî polîtîkayên şer didomîne. Madem dixwazî aştiyê bi me re bikî wê demê çima êrişan dikî? Em tevek li ser vê xakê dijîn û xwişk-bira ne.”  

Nazîme Alan jî got ku tekane daxwaza wan aştî û pêkvejiyane û ev tişt anî ziman:“Em dixwazin di nava aramiyê de bijîn. Divê ji bo aştiyê gav bên avêtin.” Salih Budak jî daxuyand ku daxwaza wan aştiyeke birûmet e û wiha got:“Banga Rêber Apo gelek watedar û girîng e. Li şûna ku azad bibe û bi xwe pêvajoyê birêve bibe, tecrîdê didomînin. Kengî were berdan wê wê demê tiştên baş çêbibin. Wê demê belkî bangên mezintir û xweştir bike û bicih bîne. Divê Rêber Apo azad bibe. Pêvajo wê demê dikare pêş bikeve.” 

Daxwaza me azadiya Rêbertiyê ye

Osman Akay jî destnîşan kir ku divê pêvajo jidil û bêderew were meşandin û got:“Belê, Rêber Apo ji bo aştiyê gavek avêt lê divê her du alî gavan biavêjin. Niha gelek siyasetmedar girtî ne. Divê ev kes bên berdan ku aştî çêbibe. Ma heta ev neyên kirin dê aştî çawa bibe? Divê îktîdar û dewlet gavan biavêjin. Divê Rêber Apo azad be û bikare bi tevgera xwe re diyalogê deyne. Nexwe beriya azadiya wî aştî jî nabe.” Muzaffer Aslan jî daxuyand ku divê dewlet gavan biavêje û got:“Daxwaza me azadiya Rêbertiyê ye.” 

MA/HEVAL ONKOL