Pesindkirdinî gelaley xudmuxtarî le Şura


Hesen QAZÎ nivîsand —

Şemî 5 Hezîran 2021 - 03:42

Sazmanî Înqîlabî u Kurdistan (80)


Mêhdî Xanbaba Têhranî û dozî Kurdistan


Beşêk le giftugoy Hemîd Şewket legell mêhdî xanbaba têhranî


Awrêk le bizûtnewewî çep le Iran le nawewe, giftugo legel Mêhdî Xanbaba Têhranî, çapî yekem beharî 1989

Şewket: Ew xalaney ke le gelale pêşniyarkirawekey êwe da xîlafyan le ser bû çi bûn?
Xanbaba Têhranî: Yekyan le ser sinûrî ustanî Kurdistan bû. Çunke le ser binemay dabeşkirdinî cugrafyayî wulat le serdemî şa da, hêndêk beşî nawçey Kurdnişîn kewtibûne ustanî Azerbaycan û Benî Sedir legel ewe nebû ew nawçane wek beşêk le Kurdistan rabigeyêndirên. Ew pêy wa bû ême natuwanîn dabeşkirdinêkî nwê le cugrafyay wulat da bikeyn. Le duway dimeteqe û qise le ser kirdin, Kurdekanîş ew babeteyan pejrand û biryar dira ew babete duway rûxanî rêjîmî Xumeynî le rêfrandomêk da le layen xelkî ew nawçanewe yekla bikrêtewe û xoyan biryar biden ke kameyek lew nawçane le ustanî Kurdistan yan Azerbaycan da helkewin. Xalekey dîke lemer hêzî erteş û hêze întîzamîyekan bû. Be pêy gelale pêşniyarkiraweke diyarîkirdnî hêze întîzamîyekanî Kurdistanî xudmuxtar dirabuwe dest parilmanî eyaletî û hîzbî dêmokrat bawerî wa bû, hêze pêşmergekanî henûke, le Iranî dêmokrratîk û azadî dahatû da be hêze întîzamîyekanî herêmî Kurdistan dabindrên. Benî Sedir lew bareyeweş legel nebû û pêy wabû bewşêweye erteş de nêw erteş da saz debê. Le ser ew xaleş rêkewtinêk kira ke be pêy ewe rêkxistinî hêze îtîzamîyekanî Kurdistan be biryarî dewletî nawendî û bîruray parlimanî eyaletî Kurdistan debê. Duwa car duway ew dimeteqe û hemwar kirdnaney ke kiran, gelaley pêşniyarkiraw pesind kra. Belam hestî min ewe bû ke le kotayekanî karî biryardan û pesindkirdnî gelaley xudmuxtarî Kurdistan da doxêkî wurûjaw saz bibû ke hoyekeym nezanî. Be şêweyek ke Recewî deygut bo dîdarî Qasimlû xoy çuwete ofîsî hîzbî dêmokrat le Parîs û lêy ziyad dekird eger ew hengawey nenabawe, dijayetîyekanî Benî Sedir legel gelaley pêşniyar kiraw, debuwe hoy ciyabûnewey hîzbî dêmokrat le şûra.

Giftugoy pazdehem Yonan, banemerî 1366  [Awrîlî 1987]
Şewket: Ber le dirêjedan bew bas e, leber ewey basî seferî Kurdistanit kird demewê giftugoy emşew lew bareyewe berew pêş berîn. Be taybetî le ber ewey ke pêşîney nasyawî dûr û drêjit legel rêberanî bizûtnewey Kurdistan û meseley xudmuxtarî û xebatî merdimî Kurdistan hebûwe, be taybetî duway şoriş ewane girîngtirînî ew meselane bûn ke bizûtnewey siyasî Iran legelyan rûberû bûwe.
Xanbaba Têhranî: Pêşîney hawkarî û pêwendî min legel bizûtnewey Kurdistan degerêtewe 25 sal lemewber. Be pêy ew çalakîyey ke le rabridû le hîzbî Tûde da hembû, legel têkoşeranî Kurd û meseley Kurdistan ta radeyek aşina bûm. Ew aşinayîyem ew katey ke le Iran bûm û le duway ewe le dostayetî legel hêndêk le takuteray bizûtnewey Kurd le henderan behêztir bû. Dostayetî legel Encîrî Azer, 'Elî Qazî, kurî Qazî Mihemed yekem serokkomarî Kurdistan, ke legel wî le Mûnîx xerîkî xwêndin bûm, Hesen Seyfî Qazî, Emîr Qazî, Selîm Baban, Mihemed Muhtedî, Dr. Rehman Qasimlû, Dr. Se'îd [Şerifkendî], mamosta Heyakî, Şêx 'Êzedîn Husînî, 'Ebdula Muhtedî, Sarmedîn Sadiq wezîrî û zor kesî dî le xebatkaranî Kurd hogirî minî ziyatir kird lemer xebatî merdimî Kurdistan û çarenûsî. Katî xwêndin le Urûpa, le salî 1960 we le zorbey danîştinekanî Komeley xwêndkaranî Kurdî danîştûy Urûpa beşdar debûm. Le salî 1961 kongirey Urûpayî xwêndkaranî Kurd le Mûnîx bestira û emin be nwênerayetî encumenî xwêndkaranî Iranî beşdarîm têda kird û le wutarêk da hawpêwendî xebatkaraney xwêndkaranî Iranîm legel bizûtnewey merdimî Kurdistan rageyand. Le berayekanî salî 1970 le Frankfort dîdarêkim hebû legel Dr. 'Ebdulrehman Qasimlû yekêk le sîma helkewtuwekanî bizûtnewey Kurdistan û her lew demîyewe pêwendîyekî 'atfî û xebatkarane le nêw ême da saz bû ke ta êstaş berdewame. Le salî 1975 le layen rêkxirawî Nawneteweyî Emnistî le Amsterdam kongireyek bo pêrageyiştin be wez'î zîndanîye siyasîyekan û pêşêlkirdinî mafî mirov le Iran pêk hatbû ke min û Qasimlûş têyda beşdar bûyn. Çîrokî lêk rasanî Qasimlû û 
Qutbzadem le ser zîndanîye siyasîyekanî Iran lew kongireye da, le giftugokanî pêşû da şî kirdewe. Duway geranewe lew kongireye carêk Qasimlû hat bo dîdarî min û duway giftugo le ser barudoxî Iran gutî Kurdekan kem kem xoyan amade deken bo geranewe bo Iran. Çend mang ber le rûxanî rêjîmî şaş yekêk le hawrê Kurdekan hate lam û helgirî peyamêk bû le layen Qasimlûwewe û gutî jimareyek le Kurdekan deyanewê bigerênewe Iran û pêwîstîyan be pasporte. Emnîş bew derfet û îmkaney hembû  pasportim amade kird û le ber destim nan. Maweyek duwatirîş le serubendî dewletî Şerîf Imamî da jimareyek le Kurdekan be şêwey naqanûnî be sinûrekanî Kurdistan da hatne naw wulat û destyan kird be rêkxistinî yekekan û torekanî cor be corî hîzbî dêmokrat le şwêne ciyawazekanî Kurdistan.
Be rûxanî rêjîmî şa, jimareyek le berpirsanî rêjîmî Cimhûrî Îslamî têdekoşan şayed meseley Kurdistan le rêgay giftugo û be şêwey aştîyane çareser biken û rêkewtin le ser ewey mafî xoberêweberî bizûtnewey xelkî Kurdistan le pêwendî legel bizûtnewey giştî xelkî Iran biparêzin. Qasimlû û Hîzbî Dêmokrat pêşwazîyan kird le nermîyekî awa û carêk hatin bo dîdarî Xumeynî. Le heyetî nwênerayetî Kurdistan da ke le Qum hatin bo dîdarî Xumeynî, Qasimlû, Dr. Se'îd [Şerefkendî], Emîr Qazî û Xenî Bulûryan beşdar bûn.



Dirêjey heye….


parvê bike

   

Yeni Özgür Politika

© Copyright 2021 Yeni Özgür Politika | Mafên belavkirinê parastî ne.