Li dijî biryara Iraqê vegerin Şengalê

Koordînasyona Civaka Êzidî ya li Ewropayê (KCÊ-E) têkildarî civîna Wezareta Koç û Koçberan a Iraqê ya li ser ‘entegrasyon koçberên li kampan’ daxuyaniyek da, ku ev nêzîkatî weke mayindekirina koçberiya Şengaliyên li kampan hate şîrovekirin.

Di destpêka daxuyaniyê de hate ragihandin ku di salvegera 11’emîn a Qirkirina Şengalê de hikumeta navendî ya Iraqê zagon û kiryareke reş li hemberî Êzidxanê/Şengalê amade kir.

Di daxuyaniyê de hate gotin:“Hikumeta Sûdanî li navenda Wezareta Koç û Koçberan bi navê ‘piştgirî û alîkariya bi koçberan re’ civînek pêk anî. Lê biryarên di vê civînê de hatin wergirtin, berevajî vê rojev û mijarê bûn.”

KCÊ-E’yê nêzîkatiya di civîna Wezareta Koç û Koçberan a Iraqê de hate nîşandan weke hewldanek ji bo temamkirina armanca DAIŞ’ê ya faşîst pênase kir û destnîşan kir ku ew vê rojeva wezaretê weke parçekirina Êzidiyan û qutkirina wan ji çiyayê Şengalê dibînin, weke dewama qirkirinê pênase dikin.

Ji bo têkbirina van plan û hesaban jî bang li Êzidiyên li kampan hate kirin ku mafê xwe yê vegera li cih û warê xwe bînin ziman, bi vê daxwazê dakevin qadan, çalakiyan bikin û tavilê li Şengalê vegerin.

KCÊ-E’yê destnîşan kir ku nav çi dibe bila bibe, hikumeta navendî ya Iraqê bi armancên siyasî tevdigere, dixwaze Şengalê bê Êzidî bihêle, ev yek tinekirina Êzidxanê ye, bêkokkirina Kurdan û ziwakirina Kurdistanê ye.

Di daxuyaniyê de bang li Serokkomarê Iraqê Ebdilletîf Reşîd hate kirin ku li hemberî vê kiryarê bêdeng nemîne, her wiha ji partî û saziyên Başûrê Kurdistanê jî hate xwestin, ku ji bo vegera xelkê Şengalê li warê xwe bibe alîkar.

Koordînasyona Civaka Êzidî ya li Ewropayê biryara Wezareta Koç û Koçberan a Iraqê bi wateya qirkirina Êzidxanê pênase kir û diyar kir ku bêdengiya li hemberî vê yekê jî hevkariya heman sûcî ye.

Bang li Yekîtiya Ewropa û Neteweyên Yekbûyî jî hate kirin ku hişyariyê bidin Iraqê, li ber vê biryara nexêr bisekinin û hate destnîşankirin ku xwedîderketina li Şengalê xwedîderketina li nirxên mirovahiyê û demokratîke.

KCÊ-E’yê bang li raya giştî jî kir ku rê nede helwestên nû yên DAIŞ’ê û daxuyaniya xwe bi vê sekn û biryardariyê bi dawî kir:

“Nerazîbûn û helwesta me wê tenê bi daxuyaniyekê nemîne. Weke Êzidiyên li Başûr, Êzidiyên li Şengal a Azad û Xweser, weke Êzidiyên li tevahiya cîhanê belav bûne, çawa ku me doh li ber xwe dan û bi ser ketin, em ê îro jî li ber xwe bidin û wan qanûn û kiryarên kirêt têk bibin.”

NAVENDA NÛÇEYAN