- Komkujiyên dewleta Tirk ên li dijî jinên Kurd li bajarên Elmanyayê Hamburg, Duisburg û paytexta Fransayê Parîsê hatin protestokirin.
MEHMET ZAHÎT EKÎNCÎ / HAMBURG
Qomkujiyên dewleta Tirk ên li dijî jinên Kurd li bajarên Elmanyayê Hamburg, Duisburg û paytexta Fransayê Parîsê hatin protestokirin.
Meclîsa Jinan a Hamburgê Rojbînê li ber stasyona trênan a li taxa Sternschanzeyê mîtîngek li dar xist. Di çalakiyê de Kongra Star, Meclîsa Jinan a Hamburgê Rojbînê, nivîskar û aktîvîst Anja Flach û Defend Kurdistanê daxuyanî dan. Wan got, êrişên li dijî sivîlan hem li gorî hiqûqa mafê mirovan û hem jî li gorî hiqûqa navneteweyî sûcê dema şer e.
Jinên ku beşdarî mîtîngê bûn ji ber bêdengiya dinya alemê nerazîbûna xwe nîşan da û got, ev bêdengî cihê şermê ye.
Nûnera Kongra Starê Nesrîn Rojava jî di çalakiyê de amade bû. Wê dewletên bi bêdengiya xwe cesaretê didin êrişên dewleta Tirk rûreş kirin û wiha peyivî: “Ev welat cesaretê didin Erdoganî û ew jî wiha van komkujiyan dike. Di destê van jinên ciwan, zarok de sîleh nebû.” Wê di dawiyê de got, ev kîna wan a beramberê komkujeran wê veguhere têkoşînê.
Êrişê dibin îradeya azad a jinan
Medya Rojhelatî jî dibêje “Ev êriş li dijî îradeya azad a jinan hemûyan in. Divê jin li dijî komkujiyan bi hev re têbikoşin.”
Ji Meclîsa Jinan a Hamburgê Rojbînê, Leyla Kaya jî dibêje, “Gava mesele canê jin û zarokên Kurdan in, her kes xwe kerr dike. Li hemberî vê bêdengiyê em ê li her derî dengê xwe bilind bikin û helwêsta xwe nîşan bidin.”
Gulten Munzur a ji Bakurê Kurdistanê jî dibêje, “Dixwazin bi qetilkirina jin û zarokan pêşiyê li şoreşê bigirin. Çi dibe bila bibe, em ê ji bo aştiyê her li meydanan bin.”
Nebin şirîkê komkujiyan
Li Duisburgê jî çalakî bi pêşengiya Meclîsa jinan a Asya Yuksel hat lidarxistin. Xwepêşanderan êrişên dagirkeriyê yên dewleta Tirk protesto kir û bang li civakê kir ku li dijî dagirkeriyê çalak be û ji raya giştî ya navneteweyî jî xwest piştgiriyê bi Kurdan re bike.
Konseya Demokratîk a Kurd a Fransayê (CDK-F), Tevgera Jinên Kurd a Fransayê (TJK-F), TCŞ, Têko-JIN’ê jî li paytexta Fransayê Parîsê bi daxwaza “Asîmanên Rojava li Firrînî Bigirin” li ber sefareta Rûsyayê daxuyaniyek da çapemeniyê. wan bang li welatên garantor û dewletên ewrûpayê kir da ku nebin şirîkê komkujiyan.
