Karker 25 roj in li ber xwe didin

Kedkarên qeyûmê Wanê ji kar derxistî 25 roj in li ber xwe didin. Karkeran, gotin ew neheqiyê qebûl nakin. 

Şaredariya Bajarê Mezin a Wanê ku qeyûm lê hatiye tayînkirin, di 31’ê Tîrmehê de 223 karker ji kar derxist. Çalakiya karkeran a li dijî vê biryarê didome. Piraniya kedkaran ew kes in ên di dema qeyûmê berê de ji kar hatibûn avêtin û di serdema DEM Partiyê de dîsa li karên xwe vegeriya bûn. 223 kedkaran, li gel meşan, her wiha li Enqereyê jî çendek hevdîtin kirin.

Karker 25 roj in li ber xwe didin

Karkerê bi navê Cûma Çîftçî ku bi roja ye li dijî biryarê li ber xwe dide, diyar kir ku îdiaya “lêpirsîna ewlehiyê” a weke hinceta derxistina ji kar hatiye nîşandan rast nîne û got: “Sedema esasî, siyasî ye. Lewma em ji kar derxistin. Em ji lêpirsîna ewlehiyê derbas bûbûn. Anku bi hinceteke neheq piştî 7 mehan li ser telefonê li me geriyan û em ji kar derxistin. 25 roj in em li ber xwe didin. Rêxistin û gelê me em qet bi tenê nehiştin. Ji 31’ê Adarê heta niha li dijî Wanê her tim hêrsa wan hebû. Mexdûrên vê jî bûn xebatkar. Heta her 223 kes dîsa li karên xwe venegerin em ê paşvegavê neavêjin.”

Ez vê neheqiyê qebûl nakim

Cemalettîn Kurtla ku cara duyemîn e ji hêla qeyûm ve ji kar tê avêtin jî got: “Ez 6 salan xebitîm lê 8 sal in li heqê xwe digerim. Di sala 2012’an de min dest bi şaredariyê kir. Qeyûm, di sala 2017’an de ez ji kar derxistim. Wê demê jî ewraqên kêm û perwerdeya 6 mehan kirin hincet. Min serî li dadgehê da. Tevî 3 biryarên dadgehê jî negirtin kar. 8 salan têkoşiyam. Ez vê neheqiyê qebûl nakim.”

MA/WAN