Ji bo mafê hêviyê gav nehat avêtin

• Mihemed El Neîmî da zanîn mafê hêviyê mafekî mirovî ye û got:"Ji bo mafê hêviyê gav nehat avêtin."

Endamê Yekîtiya Parêzeran a Kantona Cizîrê û Hevserokê Înîsiyatîfa Parêzerên Sûriyeyê ya ji bo Parastina Rêber Abdullah Ocalan Mihemed El Neîmî têkildarî tecrîda li Îmraliyê û mafê hêviyê axivî.

Mihemed Elî Neîmî di destpêka axaftina xwe de wiha got: “Mafê hêviyê di zagonên hiqûqî yên navdewletî de mafekî herî rewa ye. Bi taybetî li gor pîvana mafê mirovan a Ewropayê ya ku di sala 1950'î de di xala wê ya 3'yan de tê gotin, nabe kes were îşkencekirin û mafê hêviyê mafekî herî sereke ye. Lê belê dewleta Tirk a ku qaşo tevahî zagonên hiqûqî pêk tîne, ew bi xwe li dijî van zagonan derdikeve û mafê hêviyê li ser Rêber Abdullah Ocalan qut kiriye. Hemû mafê Rêber Abdullah Ocalan hatin binpêkirin û tecrîdek giran li ser Rêber Apo hat ferz kirin.”

Mihemed El Neîmî di nav axaftina xwe de destnîşan kir ku “Ji bo ku dewleta Tirk xwe li hember van kiryarên qirêj sûcdar dernexe, cezayên disiplînê li ser Rêber Abdullah Ocalan pêk anî. Di nav zagonên hiqûqî yên dewleta Tirk bi xwe dibêjin dema kesê girtî 23 salên wî deqede, mafê hêviyê jê re tê xurtkirin. Lê belê vê yekê pêk nayîne û ev 26 salên Rêber Apo di zindanê de ye lê belê dewleta Tirk ti gav ji bo mafê hêviyê neavêtiye.” 

Mihemed El Neîmî di dewama axaftina xwe de diyar kir ku Rêber Apo xwedî maf e ku azad bibe û di nav gelê xwe de jiyana xwe bidomîne û wiha pêde çû: “Rêber Apo bi temenê xwe gihiştiye 76 salî û ev yek li gor zagonên navneteweyî pêwîst e azad bibe. Dewleta Tirk bi van kiryarên qirêj barê xwe giran dike ji ber ku mafê Rêber Apo yê azadiyê heye. Pêwîst e dewleta Tirk xwe sererast bike û li gor zagonên navnetewî tevbigere.” 

Mihemed El Neîmî got ku divê komîteyên girêdayî mafê mirovan bi erka xwe rabin û sûcên ku dewleta Tirk dike belge bikin û bi vî rengî dewam kir, "Her tim liv û tevgera me dewam e, lê belê tevgera van komîteyên mafê mirovan jî girîng e. Pêwîst e ev komîte hemû sûcên dewleta Tirk derxînin da ku Rêber Apo azad bibe."

Mihemed  El Neîmî hêviya xwe wiha anî ziman û got: “Bila êdî CPT bi erka xwe ya mirovî rabe û Rêber Apo azad bibe. Di her zagonên hiqûqî û mirovî de girtina Rêber Apo sûcek e lê belê kes ji van rêxistinên mafê mirovan dengê xwe nakin. Lê em ji van rêxistinan re dibêjin ku êdî ji bêmafiya di derheqê Rêber Apo de tê kirin bes e.”

ANF/ BÎSAN RESÛL/QAMIŞLO