Hewlî Qasimlû bo damzrandnawey PDK Êran

Beşêk le hevpeyvînî Hemîd Şewket legel Îrec Keşkolî
Awirêk le Bizûtnewey Çepî Êran le nawewe 
Giftugo legel Îrec Keşkolî
Neşirî Baztab. Hawînî 1378 ( 1999), 567 lapere

Şewket: Dirêjey karî êwe le Kurdistan be kwê geyişt?
Keşkolî: Perwîz Wa'îzzade ber lewey biçêtewe bo Êran hate Kurdistan. Kobûneweyekman kird û karman dabeş kird. Biryar dira Perwîz be nihênî biçête Êran û 'Êtaş bo kar kirdin lenaw kirêkaranî 
Êranî le Dubey damezrê. Muhsîn Xatemîş biçête Kuweyt û le naw kirêkaranî Êranî da dest bika be çalakî. Emin û Mueyîdzade le Kurdistan bimênînewe û ewanîdî bigerênewe Urûpa û gelaleyek bo çûnewe bo Êran dabirêjn.
Şewket: Meseley belge û pasport û wîzatan çon cê be cê kird?
Keşkolî: Be yarmetî Talebanî. Ew wek Kurdî 'Êraqî pasportî bo wergirtîn, çunke le êdarey pasportî 'Êraq da destî hebû û tuwanî pênase û îznî ajotnîşman bo amade bika.
Şewket: Meseley wîzatan çon cê be cê kird?
Keşkolî: Wergirtinî wîza le wulatanî Xelîc pêwîstî be de'wetname bû. Talebanî le kuweyt hêndêk dostî hebû ke de'wetnameyan bo nardîn. Talebanî pêkêşî dekrid eger bimanewê lew îmkanane kelik werbigrîn, debê xêra dest bekar bîn. Çunke hêndêk şit be destewe bû ke dewletî 'Êraq deyewê legel Barzanî bisazê û eger ewe bûba ew îmkanane lenaw deçûn. Hêndey pê neçû û ke her waşî lê hat.
Şewket: Perwîz Wa'îzzade çon çuwewe Êran?
Keşkolî: Perwîz gerawe Urûpa û duway maweyek çuwewe Êran. Ew duway hewt sal karî nihênî le Êran ke lew maweyeda berpirsiyaretî rêberî çalakîyekanî Sazmanî Înqîlabî le nawxoy wulat be estowe bû, pêy zandira û le têkhelçûnêkî çekdarane le salî 1355 [ Novamberî 1976-î zayînî, amadekar] kûjra.
Şewket: Le çi rêgayekewe çuwe Êran?
Keşkolî: Pêm waye wekû tûrîst û be pasportî saxtey îtalyayî gerawe Êran. Kuriş Laşayîş duwatir her awa gerayewe Êran.
Şewket: Talebanî ew îmkananey le çi rêgayekewe wedest hêna bû?
Keşkolî: Ewe nazanim, her ewende dezanim ke hêndêk le Kurdekan le destgay dewletî 'Êraq da karyan dekrid û be egerî zor lew îmkane kelkî werdegrit.
Şewket: Êwe be çî dejyan?
Keşkolî: Xercêkî zorman nebû, ziyatir mîwanî Talebanî bûyn û wekû pêşmergekan be cîrey rojane dejyayn.
Şewket: Siyaweş Parsanejad û 'Elî Sadiqî le nawçey Helebce çîyan dekrid?
Keşkolî: Siyawş pizişk bû û lewê metebêkî saz kird û be wez'î birîndar û nexoşan radegeyişt. Zor zû xeber be hemû cêyek da bilaw buwewe ke efserêkî Êranî ke pizişke, be wez'î birîndar û nexoşan radega. Siyaweş legel pêşmergekanîş bibuwe hawrê û xelik mirîşk û hêlkeyan bo debrid. Û webîrim dê carêk pêşmergeyek ke le şer legel destey Barzanî da 6-7 guley wê kewtibû, hênayane lay Siyaweş. Siyaweş hemû gulekanî le bedenî derhêna û pêşmergeke rizgarî bû.
Kuriş Laşayîş pizîşk bû, belam be pêçewaney Siyaweş ke berdewam xerîkî mudaway nexoşan bû, Kuriş mirxêkî ewtoy le ser ew kare nebû. Siyaweş xulêkîşî bo lawanî Kurd rêk xistbû ke coreyek tîbî şerî bû. Wate derhênanî gule le bedenî birîndaran, pêş girtin le xwênrêjî û pansimanî birîn û ew core yarmetîye seretayiyane.
Şewket: Duway ew maweyey ke le meqerî Talebanî bûn çitan kird?
Keşkolî: Amajem pê kird ke hemû royiştin û tenya min û Mueyîdzade maynewe. Ême hatîn bo Bexda. Û wa bizanim salî 1348 [1969-î zayînî, amadekar] bû. Dr. Qasmilûş hatbû bo Bexda.
Şewket: Le Urûpawe.
Keşkolî: Dezanî ke Qasimlû le Çêkuslovakî dejya û duway dagîr kiranî ew wulate be dest hêzekanî peymanî Warşew le salî 1347 [1968], le Çêkoslovakî der kira. Qasimlû hate Parîs û le zankoy Rojhellatnasî, goya zimanî Kurdî be ders degutewe. Ew duway maweyek le Parîsewe hate Bexda. [Têbînî amadekar: Berêz Îrec Keşkolî lêre da berwarî hatne derî yekcarekî Dr. Qasimlûy le Çêkoslovakî hêndêk taq û cût kirduwe. Dr. Qasimlû le çend sal le wezaretî textîtat le Êraq Karî dekird, u hat u çoy Urûpay dekird u ta salî 1975 her le Çêkoslovakî bû û le kotayyekanî ew sale da le Parîs damezra û ta novamberî 1978 lewê bû]
Şewket: Bo çi karêk hatbuwe Bexda?
Keşkolî: Pêwe bû Hîzbî Dêmokrratî Kurdistanî Êran damezrênê, çunke le Hîzbî Dêmokrrat her nawêk mabuwewe û destey Şerîfzadeş cema'etî xoy naw nabû Komîtey Şorişgêrî Hîzbî Dêmokrratî Kurdistanî Êran. Qasimlû hewlî ewe bû jimareyek le takuteray nasraw û çalakî kurd ko katewe û le Bexda kongirey Hîzbî Dêmokratî Kurdistan pêk bênê. Ew kareşî kird.

Dirêjey heye….


Wêne 1: Perwîz Wa’îzzade, le kadre balakanî Sazmanî Înqîlabî le têkhelçûnî çekdarane legel memûranî rêjîmî Şa le November-î 1976 le Tararan şehîd bû


Wêne 2: Îrec Keşkolî