Heta mirinê çav li kirinê

M. ZAHÎT EKÎNCÎ/HAMBURG

Xalê Elî yê ji Kurdên li Hamburgê, yanî şêwekar Ali Ulger, resmên ku van sê salên dawiyê xêz kirine, li Kulturladen St Georgê nîşan dide. Qederê 50 tabloyên Xalê Elî di pêşangeha bi navê “Şopên Jiyanê” de heta 10´ê Sibatê wê bên nîşandan. 

Ev pêşangeha hanê ya Xalê Elî, pêşangeha wî ya şexsî ya yekem e û wî ev di 65 saliya xwe de bire serî. Ji parlamenterên berê yên HDP´ê Sîbel Yigitalp, Nihat Akdogan û sosyolog Martin Dolzer jî li destpêkirina pêşangehê amade bûn. 

Me Xalê Elî li mekanê pêşangehê Kulturladenê dît. Wî ji me re got, xêzkirina wêneyan wî azad dike, û wiha peyivî: “Min li ser şêwekariyê ti dibistan nexwendiye, lê ez gelekî hez ji xêzkirina resman dikim. Gava ez resman xêz dikim ez di heman demê de xweşî, şahî, êş û xemên miletê xwe jî tînim ziman. Ez 65 salî me. Çawa ku ji bo hînbûnê sînorekî temen nîne, ji bo elaqedarbûna bi huner re jî, sînorekî temen nîne.” 

Mijarên wî ji welat û miletê wî ne

Xalê Elî ji bo resmên xwe mijarên xwe û îlhama xwe “bi pirranî ji xwezayê û têkoşîna” miletê xwe digire. Heta bi şêwekariyê ew dixwaze destekê bide vê têkoşînê: “Bi xêzkirina wêneyan armanceke min a welê heye ku ez destekê bidim têkoşîna miletê xwe. Xêzkirina wêneyan êşên min kêm dike, ruhê min azad dike. Kirina hin tiştan bi bextewer dike.” 

Hîna helbestên wî jî hene

Xalê Elî halê hazir portreyekî Dayê Emîne Şenyaşar çêdike. Bi wî rengî dixwaze balê bibe têkoşîna ji bo edaletê ya Emîne Şenyaşarê. Ji bilî xêzkirina wêneyan, ew bi helbestê re jî elaqedar e. Ew dixwaze helbestên xwe yên ku ew ji sala 1980´yî ve nivîsandine, weke kitêb biweşîne.

Pêşangeha Xalê Elî, 15´ê Çile hatibû vekirin û wê heta 10´ê Sibatê, her duşem, sêşem, çarşem û pêncşemê ji saet 10:00 heta 20:00´ê li xelkê vekirîbe.