Hêndêk le dostanî Başûrî

• Pêwendî nameyî legel Siyasmek Muyîdzade (kak Sefa)

Sazmanî Înqîlabî u Kurdistan(116)

Pêwendî nameyî legel Siyasmek Muyîdzade (kak Sefa)

Dest becê be rêgay hawrêyanî sazman dîdarêkim legel rêk xist lew hotêley lêy la dabû, û ewîş hestî pê kirdbû boçî le saloneke çûmete derewe. Belam ewey ke her hatbuwe jûrê û dest becê çawî be min kewtibû ke le ser yekêk le kursîyekanî piştewey saloneke danîştibûm, pêm seyre.

Kak Fuadî Mela Mehmûd: Biray Fazil, ke be pêçewaney Fazil xwêndewarîyekî ewtoy nebû belam zor dilpak û mêhrewan û le heman katda îdî'ay zor bû! Eweş renge le ber helwêstî le hîzb da bû bê. Ew berpirsî lêpirsînewe le yexsîran bû! Û zor wîşk û bê beze bû (duwatir numûneyek bas dekem ke lemer min rûyda).

Kak Şêrzad …: Gencêkî xoş sîma û rûxoş û dem be pêkenîn û bexowe bû. Le Bexda xwêndbûy. Belam xwêndewarîyekî siyasî ewtoy nebû. Be pirsyar bû û binêştexoşkey ser zarî "bo" bû. Zorcar dostan seryan dexiste serî û ber lewey ew pirsyarêk bika be galte deyangut "bo?" Hemîşe bizey le ser lêwan û bekeyf bû.

Kak Heme Çawşîn: Ewîş cuwançak, galteçî û qise xoş bû. Zor mêhrewan bû û ême hemûmanî xoş dewîst û ... hîç lewe agadar nîm çendî xwêndbû. Zor car be mîwanî deçûyne malyan û muhebetekanî daykî berêzî le bîr nakem.

Kak Rezaq Feylî: Be reçelek Iranî bû û Farsî baş dezanî û le Bexda xwêndkar bû. Zor pir kar û rêkupêk bû û zor xakera bû. Le Bexdayê hemîşe yarmetîderim bû û legelim bû.

* Cewananî dîkeş Kak Ref'et, Kak 'Arif, Kak Şaswar, Kak Bekir, Kak Serbest, Kak Hoşmend... û Nermîn Xan hebûn ke yek lewîtir mêhrawintir û be sefatir bû û zorbeyan xwêndkarî zankoy Bexda bûn û hemîşe le danîştine perwerdeyiyekan û bas û gengeşey ême da çalakane beşdarîyan dekird. Yadî gişt ew azîzane be xêr bê çi ewaney ke giyanyan fîda kirduwe yan koçî duwayiyan kirduwe û çi ewaney ke hêşta dejîn û mawin.

Cige lewan, debê be taybetî basî çend kes bikem.

Mamosta 'Ebdulrehman Zebîhî: Pîre piyawêkî be reçelek Iranî le yaranî Qazî Mihemed, danîştûy Bexda û endamî mektebî siyasî Partî Dêmokrat bû. Kesêkî wirdîley kurte bala, belam zor çust û çalak û jîr bû û hemîşe û bo hemû şwênêk tenanet mewday dûrîş be pêyan deçû. Ne kes deyzanî temenî çend e û ne kes nawnîşanî malekey dezanî! Le nihênî karî da zor zor şareza bû. Wek deyan gut berpirsî malî partî bû, Ew êmey zor xoş dewîst û le hîç yarmetîyek be ême destî nedegêrawe. 

Ême carêk giştman le kobûneweyekî aşna bûn be beşdarî mamosta Îbrahîm Ehmed (Bile) û Mam Celal û jimarekî dîke le berpirsanî partî dîtman. Webîrim naye lew kobûneweye da qisey kird bê û her gwêy dabwe qisey kesanî dî. 

Belam min xom bo carî duwem ew katey ke le Bexda bûm bo karêkî şexsî çûme lay. Didanim zor seqet dêşa, dostan pêşniyaryan kird biçuwe lay mamosta, ew dukturêkî baş denasê detuwanê toy binêrête lay. Legel Rezaq Feylî çûyne ofîsekey. Dîwêkî perpût û sade. Be germî pêşwazî lê kirdîn û be telefon minî be dukturke espard û duway maweyek ke dukturke gutî zorbey didanekant be tewawî kilor bûn û debê taqmit bo durust keyn, mamosta Zebîhî ew xerce giraney xiste estoy xoy û duway ewey kareke tewaw bû carêkî dîkeş bo ewey sipasî bikem çûmewe lay. Belam renge Kak Îsma'îl ke le duway minîş her le Bexda bû, pêwendî legelî hebûbê, ke bedaxewe ewîş îdî le nawman da nîye ke şitêk bilê. Belam elheq û însaf, ew dukture didane û ew labratwarey ke didanekanî durust kird, be rastî çazan û westa bûn be hemû mana be şêweyekî awa ke ziyatir le penca sale ew didananem heye û kemtirîn kêşeyan bo saz nekirdûm û dukturekanî Alman pêyan seyre û bawer naken ke ew didanane penca sal lewe pêş saz kirawin! Bo eweş pênawdarî yarmetî û hîmmetî mamosta Zebîhîm. Yadî bexêr bê.

Kak Heme ...: Berpirsî hîzb le Silêmanî û wabzanim fermandarî Silêmanîş bû. Zor resmî û burukrat bû. Pêwendîyekî sardusirî letek ême da hebû. Mam Celalîş zor xoşî lê nedehat û zor car kêşey bû legelî.

Cemal Axa: Yekêk le fêodalekanî Silêmanî bû, ke zor le Mam Celal nîzîk bû û rêzî êmeşî le ber bû. Zor car be biyanûy ciyawaz mîwandarî dekirdîn û ziyafetî têr û teselî deda

Kak Şehab Şêx Nûrî: Biray gewretirî Kak Daray Şêx Nûrî, kesêkî nîwe sal û bexowe bû, zor xoş meşref û berêz bû. Belam le ber nexoşî tuwanay cûley zor nebû. Ew berpirsî kitêbfiroşî gewrey hîzb bû le Bexda. Kitêbfiroşîyekî dewlemend û modêrn le cadey Se'dûn (Îbnî Se'dûn) le Bexda, ke cige le kitêbî pêşkewtû be zimanî 'Erebî û Kurdî, rastewxo le Çînîşewe be zimanî Farsî û 'Erebî kitêbî hawerde dekird. Min ew katey Bekrecom becê hêşt û pêwe bûm biçim bo Şêx nişînekanî Kendawî Fars, maweyek le Bexda bûm. Lew maweye da zor car deçûme lay Kak Şehab û le rêk û pêk kirdnî kitêbe Farsîyekan da yarmetîm deda. Carêk dîtim ke axundêkî Iranî dête ewê û ziyatir kitêbe Farsîyekanî Mao Zedonhî dekrî û legel xoy deybird. Bom bû be pirsyar û le Kak Şehabim pirsî ewe kêye? Gutî le Necefewe dê û le nizîkanî Xumeynî ye. Duwatir ziyatir wedûy pêwşiwênî kewtîn û me'lûm bû ewe Seyd Mehmûd Do’ayî lr alqey nizîkî Xumeynî daye û deyangut radyoy Farsî zimanî Bexdaşî berêwe debird û bernamey hebû têyda. (Le duway şoriş bû be berpirsî rojnamey Îtîla'at). Gelo Xumeynîş ew kitêbaney dexwêndewe? Nezerî çi bû sebaret be wan? Yan çi bernameyekyan hebû ke be berdewamî ew kitêbaneyan dekrî? Bo min rûn nebûwewe.

Dirêjey heye…