Geryanên Berêvarkî Li Kolanên Amedê

Weşanxaneya Pallê pirtûkeke nû ya bi navê “Geryanên Berêvarkî li Kolanên Amedê” çap kir. Pirtûk ji hêla Îmad Bernas ve hatiye nivîsandin.

Îmad Bernas bi vê kitêba xwe ya ewil a çîrokan wek flanorekî me li kuçe û kolanên Amedê digerîne, pala me dide bedenên wê yên qayîm û di nav mekanên wê de piyase dike. Geryanên Berêvarkî li Kolanên Amedê ya ku di navbera salên 2012 û 2024an de hatiye nivîsîn, bi vegotineke têra xwe şexsî dide pey şopa guherîn û hafizeya bajarekî ya van salên dawî.

“Ji Yuksek Kahveya ku her tim tije ye û çi biçûk çi mezin di her temenî de mişteriyên wê hene, derbasî ser Cadeya Gewranê bûm û piştî geryaneke bêarmanc ji cadeyê qulibîm kolana Buket Lahmacun tê de û ji ber Mona Cafeyê dageriyam ba Karga Cafeyê û gihîştim hember Janya Cafe Dönerê. Gelo Rênas Jiyan qe tê vê cafeyê an jî kesên tên vê cafeyê haya wan ji wê helbesta wî ya bi heman navî heye?! Belkî Janya bi xwe tê vir carna. Fermo, em bi hev re donerekê nexwin li vir Janya?”

Îmad Bernas kî ye?

Di sala 1988an de li Gevera Colemêrgê hatiye dinyayê. Dibistana seretayî li Geverê, lîse li Enqereyê xwendiye. Ji beşa Fîzyoterapî û Rehabîlîtasyonê ya Zanîngeha Marmarayê ya li Stenbolê derçûye. Di destpêka salên 2010an de bi kovara Pêngavê dest bi nivîsina kurdî kir û herwiha di gel kovara Pêngavê nivîsên wî di kovarên wekî Çirûsk, W, Asîva, Wenda, Nûbihar û Jehr de jî weşiyan. Ji 2012an vir ve li Amedê dijî. Geryanên Berêvarkî li Kolanên Amedê, pirtûka wî ya yekem e.

NAVENDA NÛÇEYAN