Divê hunermendên Kurd bibin yek

Ji bilî dagirkirina erdnîgariya Kurdistanê, bi dirêjahiya dîrokê dagirkeran hertim hewl dane çand, huner û wêjeya Kurdan jî tine bikin. Mîna şer û berxwedaniya li dijî dagirkirina erdnîgariya Kurdistanê, hunermendên Kurd jî dikarin bi rêya huner û sînemayê bersiva dagirkeriya li ser Kurdan bidin û bi vê rêyê komkujî û jenosîdên li ser gelê Kurd çêbûne, nîşanî raya giştî ya cîhanê bide. Di derbarê vê mijarê de Derhêner Kazim Oz û Peykersaz Huner Sahib axivîn. Derhênerê sînemayê Kazim Oz da diyarkirin ku dîroka Kurdan dîroka jenosîdaye û got:“Dîroka Kurdan tijî êş û zehmetî ye. Ji bo wê divê dema ku hunermendek Kurd karek dike, vê mijarê jî ji bîr neke û li ber çav bigre. Ji bo parastina çand û hunera Kurdî berhemên bi vî rengî gelek giring in. Ger mirov li cîhanê jî temaşe bike, tê dîtin ku gelek jenosîd bi rêya sînemayan li cîhanê hatine naskirin. Gelê Kurd jî qet ji van gelan ne kêmtir e. Rola ku di aliyê leşkerî û siyasî de nikare bilîze, huner dikare vê rolê bibîne. Pêwîste em rexnedayîna xwe bidin ji ber ku heta niha me nekariye berhemên xwe zêde bikin. Pêwîste hevkariya xebata ku li dijî jenosîdê heye bê kirin, bi taybetî jî ragihandin. Çawa xaka Kurdan hatiye dabeşkirin, bi heman rengî mejiyê Kurdan jî dabeş kirine. Ev yek jî bandorê li ser hemû hewldanan dike ku Kurd di rewşek wisan de ne. Giringe Kurd werin cem hev û cûdakariyên xwe bidin aliyekê.”

Divê takekesî nemînin

Peykersaz Huner Hasib jî li ser mijarê got:“Em hunermend eger bi destên xwe van tiştan nenivîsin, wê kes nebîne. Tiştên ku heta niha hatine nivîsandin jî nebûne dengê giştî civakê. Ji bona wê giringe hunermend van mijaran nîşanî cîhanê bidin. Ev yek jî bi karkirina bi hevre ya li gel aliyên siyasî û aliyên peywendîdar dibe. Pêwîste hunermend karê xwe li berçavan re derbaskin û bizanin ku erkên wan ên li beramberî netewa wan çine. Pêwîste vê pirsê ji xwe bikin ku gelo me kariye êşa her çar beşên Kurdistanê bigihîn û bi yek çavî li her çar beşan binêrin.” Huner Hasib destnîşan kir ku erkê wezareta rewşenbîrî ya di vê mijarê de giring e û got:“Pêwîste wezareta rewşenbîrî bi erkê xwe rabe. Hunermendan ji bo her çar beşên Kurdistanê kar kirine. Lê karê wan li ser asta take kesî mane û kême. Nebûye dengê hemû gel. Pêwîste aliyên siyasî bê cûdahî êşên gelê Kurd weke êşên xwe bibînin û li ser bingehê netewî lê temaşe bikin. Ji bona wê dive em hemû bi hevre hewl bidin xizmetê ji gelê xwere bikin daku bikarin tawanê jenosîdê bi cîhanê bidîn nasandin.”

ROJNEWS/SILÊMANÎ