Curnê Reş: Em ne xulamê ti kesî ne

Li Curnê Reş DEM Partî di hilbijartinan de bi ser ket, lê biryar hate standin ku careke dî hilbijartin were kirin.Wekîlê DEM Partiyê Omer Ocalan dijî biryarê helwest nîşan da û got,’’Ev gel ne xulamê ti kesî ye.’’

Li bajarên Kurdistanê destwerdana li vîna hilbijêran didome. Li navçeya Curnê Reş a Rihayê, di hilbijartina şaredariyan de ku Partiya Wekhevî û Demokrasiyê ya Gelan (DEM Partî) bi ser ketibû, biryar hate standin ku hilbijartin dubare bibe. Di hilbijartinê de DEM Partî 521 ray ji AKP'ê zêdetir wergirtin û bi ser ket. AKP jî ji bo encamên 15 sindoqan îtiraz kir. Lijneya Hilbijartinê ya Navçeyê jî piştî îtiraza AKP'ê biryar da ku hilbijartin dubare bibe. Hinceta wan jî ew e  ku nebûna pusûleyên sindoqa bi hejmara 1120'an e, ku Meclisa Ciwanan a AKP'ê şeva hilbijartinê ew şewitandibûn. 

Curnê Reş a me ye

Ev biryar ji aliyê parlamenterên DEM Partiyê Omer Ocalan û Alî Bozan, Hevşaredarên Curnê Reş Garîp Yeşîl û Serhan Paydaş û bi hezaran kesî ve hat protestokirin. Bi hezaran kesên li ber edliyeyê kom bûn dirûşmeyên gotin "Em ê bi berxwedanê bi ser bikevin" û "Hîlvan a me ye û wê ya me be".

Em biryarê nasnakin

Parlamenterê DEM Partiyê Omer Ocalan dijî biryarê helwest nîşan da û got: “Di 31’ê Adarê de gelê Curnê Reş biryara xwe da û bi dehan xebatkarên me beşdarî vê pêvajoyê bûn. Di dawiyê de encamên hilbijartina Curnê Reş derket holê û partiya me bi ferqeke mezin bi ser ket. Lê niha Lijneya Hilbijartinê ya Navçeya Curnê Reş îtîraza AKP'ê nirxand û hilbijartinê betal kir. Em ê îtirazî vê biryara lijneyê jî bikin. Gelê Curnê Reş tercîha xwe kir û divê em xwedî li vê biryarê derkevin. Em vê biryara neqanûnî nas nakin."

Ocalan bi domdarî wiha got: "Encam çi dibe bila bibe, em ê li ber xwe bidin" wiha dewam kir: "Çawa ku me li vir têkoşîna xwe ya yekem da meşandin, em ê sibê jî li ber Lijneya Hilbijartinê ya navçeyê vê têkoşînê bidomînin. Ji niha û pê de 50 hilbijartin jî çêbibin, dê gelê Curnê Reş ji bo partiya xwe biryarê bide. Ev gel ne xulamê tu kesî ye û tu kes jî ne axayê vî gelî ye

Baroyan helwest nîşan dan

Baroya Rihayê û Şaxa OHD a Rihayê daxuyaniyek dan û diyar kirin ku biryar berhema feraseta qeyûm e û got: “Em ê rê nedin feraseta qeyûm.”

Baroya Rihayê û Komeleya Hiqûqnasên Ji bo Azadiyê (OHD) ya Rihayê, der barê biryara nûkirina hilbijratina Curnê Reş de daxuyaniyek nivîskî belav kirin. 

Navenda Mafê Mirovan a Parêzer Kazim Ekîncî ya Baroya Rihayê daxuyaniyek nivîskî belav kir. Di daxuyaniyê de hat diyarkirin ku biryara lijneyê ne derbasdar e û dijqanûnî ye. Her wiha di daxuyaniyê de hat destnîşan kirin ku divê demildest dawî li vê dijhiqûqiyê bê anîn û mazbatayên hevşaredaran bên dayîn. Di dawiya daxuyaniyê de hat diyarkirin ku ew li cem gelê Curnê Reş in.

Şaxa OHD a Rihayê jî daxuyaniyek belav kir û da zanîn ku ew biryara qeyûm qebûl nakin û ji bo îradeya gelê Curnê Reş wê serî li hemû rêyên hiqûqî bidin.

NAVENDA NÛÇEYAN