Tavilê biçin Îmraliyê

Çarşem 5 Çile 2022 - 02:18

Buroya Hiqûqê ya Sedsalê miracaetî CPT´ê kir û jê xwest ku tavilê biçe serdana Îmraliyê. 

Ji 25'ê Adara 2021'ê û vir ve ti agahî ji Rêberê Gelê Kurd Abdullah Ocalan û girtiyên din ên li Îmraliyê Omer Hayrî Konar, Hamîlî Yildirim û Veysî Aktaş nayê girtin. Miracaetên parêzeran û malbatan ên ji bo hevdîtinê jî bêbersiv têne hiştin.

Buroya Hiqûqê ya Sedsalê, 24'ê Kanûna 2021'ê miracaetî Dadgeha Destûra Bingehîn kir û got, "Ji bo dawî li zerarên ji ber binpêkirina xala 17'an a destûra bingehîn (qedexeya êşkenceyê) bê anîn, ji bo malbat û parêzer karibin hevdîtinê bikin, li gorî xala 73’yan a rêziknameya navxweyî bila biryara tedbîrê bê wergirtin."

Parêzeran 24'ê Kanûnê her wiha giliyê dozger û dadgerên peywendîdar li Desteya Dadger û Dozgeran (HSK) kir bi hinceta ku li dijî qanûnê wezîfeya xwe bi nebaşî bi kar tînin û li pêşiya bikaranîna mafan dibin asteng.

Daxwazên Buroya Hiqûqê ya Sedsalê ji CPT´ê

Parêzeran miracaetî Komîteya Pêşîgirtina li Êşkenceyê ya Konseya Ewrûpayê (CPT) kir û bûyerên li Îmraliyê diqewimin, weke 'êşkence û kiryara xerab' bi nav kir.

Parêzeran ev daxwaz ji CPT´ê kirin:

- Komîteya we bi lezgînî divê biçe serdana Girava Îmraliyê,

- Serdana parêzeran tavilê bê kirin û daîmî be,

- Serdana malbatê û wasî bi rêk û pêk be û cezayên dîsîplînê yên li dijî hiqûqê bêne rawestandin,

- Li gel bicihanîna mafên serdanê, her wiha mafê axaftina bi telefonê jî bi rêk û pêk were misogerkirin,

- Astengiyên li pêşiya şandin û wergirtina name û faksan bên rakirin,

- Kiryarên nehiqûqî yên têkildarî rojname, kovar û pirtûkan bên bidawîkirin,

- Ji bo pêşîgirtina li êşkence, kirinên li dijî mirovahiyê û kirinên nebaş, tedbîr bêne wergirtin û bicihanîn."

MA/STENBOL

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.