QSD çeteyên Iraqî radestî Iraqê kirin

Şaneya Ragihandina Ewlehiyê ya Iraqê doh ragihand ku Hêzên Sûriyeya Demokratîk (QSD) 50 çeteyên DAIŞ’ê radestî Iraqê kirine.

Şaneyê da zanîn ku bi lihevkirinê ligel Hêzên QSD´ê di Deriyê Sînor ê Rebîa (Til Koçer) re 50 çeteyên DAIŞ’ê radestî Fermadariya Operasyona Hevbeş a Iraqê hatine kirin.

Di daxuyaniyê de tê gotin ku ji bo lêpirsîn û rêyên yasayî, fermandariyê jî çete radestî Saziya Îstixbarat û Lêkolînê ya Federal a Wezareta Hundirîn a Iraqê kirine.

Şaneya Ragihandina Ewlehiyê ya Iraqê diyar kir ku Fermandariya Operasyona Hevbeş di hevkarî û hemahengiya xwe ya ji bo şikandina terorîstan û zuwakirina çavkariya alîkarîkirina terorê de karê xwe dewam dike.

QSD´ê par jî 100 endamên çeteya DAIŞ´ê radestî Iraqê kiribûn. Li gorçî texmînan qederê 3 hezar û 500 jin û mêrên Iraqê yên çeteya DAIŞ´ê li kamp û hepsên Rêveberiya Xweser ragirtîne.

Li aliyê din Rêveberiya Xweser a Bakur û Rojhilatê Sûriyê komeke nû ya Iraqiyên li kampa Holê li Iraqê vegerandin. Ev kom ji 152 malbatan pêk dihat û 690 nef bûn. Di nava 2022´yan de Rêveberiya Xweser çend carên din jî Iraqiyên li kampa Holê vegerandibûn Iraqê. Ji Çile ve 2 hezar û 451 Iraqî li hatine vegerandin û hîna 28 hezar û 738 Iraqî li kampa Holê mane.

NAVENDA NÛÇEYAN