Divê jinên li Siwêdayê xwe biparêzin

Jinên li taxên Şêxmeqsûd û Eşrefiyê yên Helebê sûcên li dijî  jin li Siwêdayê têne kirin şermezar kirin û da zanîn ku divê jinên li Siwêdayê xwe biparêzin, ji ezmûna jinên li Bakur û Rojhilatê Sûriyeyê sûdê wergirin da ku nasnameya xwe biparêzin.

Piştî êrişên çekdarên hikûmeta veguhêz ên li ser Siwêdayê, li ser medyaya dîjîtal hin dîmen û wêne belav bûn ku jinên li Siwêdayê çekan hildigirin û axa xwe diparêzin. Van wêne û dîmenan berxwedana jinên li Bakur û Rojhilatê Sûriyeyê anî bîra mirovan.

Der barê girîngiya xweparastinê de, jinên li taxên Şêxmeqsûd û Eşrefiyê yên Helebê, behsa girîngiya rêxistinkirina jinên li Siwêdayê û parastina axa û civaka xwe kirin.

Silava Mihemed Hemo bal kişand ser ezmûna jinên li Bakur û Rojhilatê Sûriyeyê ku bi saya rola pêşeng û bibandor di têkoşîn, rêveberî û rêxistinê de, şoreş veguherî "şoreşa jinan". Silava bang kir ku ev ezmûn li Siwêdayê were pêkanîn û got: "Îro, di bin navên cuda de, jin ji aliyê zihniyeta otorîter a mêr ve li Sûriyeyê bi êrişan rû bi rû dimînin. Ger jin xwe û civakên xwe neparêzin, ew ên werin tunekirin."

Şêniya bi navê Mizgîn Menan Bekir piştgiriya xwe ji bo tevlîbûna jinên Siwêdayê di parastina bajarê xwe de anî ziman û got "Divê jin rola xwe bi bandor pêk bînin. Bêyî tevlîbûna jinan serkeftin nayê bidestxistin. "

Rengîn Mihemed sûcên li dijî  jin li Siwêdayê têne kirin şermezar kirin û da zanîn ku divê jinên li Siwêdayê xwe biparêzin, ji ezmûna jinên li Bakur û Rojhilatê Sûriyeyê sûdê wergirin da ku nasnameya xwe biparêzin.

ANHA/HELEB/NESRÎN ŞÊXO