Bi rizgariya jinê xwe bi rêxistin bikin

ROZA METÎNA / AMED

Hevseroka DBP’ê ya Amedê Rûçem Elyakût bi lêv kir ku birdoziya rizgariya jinan, li dij polîtîkayên şerê taybet bersivek e û got:"Armanca bingehîn a xebata me ew e ku em birdoziya rizgariya jinan li dijî polîtîkayên şerê taybet ên li dijî jinan, polîtîkayên destdirêjî, tecawiz û kuştinê rêxistin bikin û bihêz bikin."

Meclîsa Jinan a Partiya Herêmên Demokratîk (DBP) atolyeyên xwe yên "Îdeolojiya Rizgariya Jinan" dewam dikin. Jin gund bi gund, kolan bi kolan û tax bi tax digerin. Atolyeyên ku digihîjin hejmareke mezin a ji jinan, perspektîfa Rêberê Gelê Kurd Abdullah Ocalan li ser "Îdeolojiya Rizgariya Jinan" tînin ziman.

Hevseroka Partiya Herêmên Demokratîk (DBP) ya Amedê Rûçem Elyakût têkildarî atolyeyên xwe yên "Îdeolojiya Rizgariya Jinan" bi lêv kir ku ji bo ew pêşî li kuştin, destdirêjî, tecawiz û polîtîkayên paşguhkirina jinan a li Kurdistan û Tirkiyeyê bigirin û berxwedana jinan derxin holê ev xebat dest pê kirine û got:” Bi rizgariya jinê xwe bi rêxistin bikin.”

Îdeolojiya rizgariya jinan ne nû ye

Rûçem Elyakût di destpêkê de bal bir ser girîngiya Îdeolojiya Rizgariya Jinan û got:"Xebata me ya li ser îdeolojiya rizgariya jinan bê guman ne nû ye. Ew xwedî bingehên dîrokî û hemdem e. Her tim berxwedan ji ber paşguhkirina jinan a wekî çînî û paşguhkirina jinan a ji hêla zîhniyeta dewletparêz a mêrane ve, derketiye holê. Li Kurdistanê, rêxistinkirin û berxwedana jinan li ser berxwedana li dijî kapîtalîzm û zîhniyeta dewletê ya ku ji hêla mêran ve serdest e, hatiye pêşxistin. Ev berxwedan carinan bêdeng û takekesî bûye, carinan jî bersivek girseyî bûye. Zîhniyeta dewletparêz û mêrane her tim bi zext, îşkence û komkujiyan bersiv daye van berxwedanên girseyî. Ji greva Lowell a salên 1830'yî bigire heya sendîkayên karker ên jinan, tevgera Clara Zetkin û şoreşa jinan a li Rojava, dîrokek berxwedan û têkoşînê heye. Ev kombûn û berxwedana dîrokî, bi taybetî li Kurdistanê û li seranserê cîhanê, ji bo me jinên Kurd watedar û girîng e."

Em dixwazin xwe birêxistin bikin

Rûçem Elyakût bal bir ser pêdiviya xebateke wiha û wiha pê de çû:"Ji bo em pêşî li kuştin, destdirêjî, tecawiz û polîtîkayên paşguhkirina jinan a li Kurdistan û Tirkiyeyê bigirin û berxwedana jinan derxin holê me ev xebat dest pê kir. Her roj, ji ber polîtîkayên cihêkarî û paşguhkirina dewletê û saziyên wê, em navên bi dehan jinan diqîrin. Ji bo gihîştina bi mîlyonan jinên ku bi hêz û rêxistina xwe li ber xwe didin me ev xebat dest pê kir. Ji bingeha xwe ve, ev xebat li Kurdistanê ne nû ye. Têkoşîna Azadiya Kurdistanê û Rêberê Gelê Kurd Abdullah Ocalan bi dehan sal in di vê mijarê de liberxwe didin. Wan xwestine îdeolojiya Azadiya Jinan rêxistin bikin û mezin bikin. Di encama vê hewildanê de, jinên li Kurdistan û çar aliyê cîhanê li dora dirûşmeya 'Jin Jiyan Azadî'  dibin yek, rêxistina xwe ji bo azadiya xwe xurt dikin. Îro, em hewl didin ku kolan bi kolan, gund bi gund, ji bo belavkirina Îdeolojiya Rizgariya Jinan xwe birêxistin bikin. Girîngiya bingehîn a vê xebatê ji bo me, bê guman, nîşandana hêza rêxistinkirî ya jinên azadkirî ye. Jinên rêxistinkirî dê azadiya civakê bînin."

Dê azadiya jinan eşkere bike

Rûçem Elyakût li ser bandora xebata Îdeolojiya Rizgariya Jinan wiha got:"Têgehên azadî û rêxistinê bi saya rêjeya xwe ya gihîştina girseyan wateyê digirin. Ji ber vê yekê, serkeftina vê xebatê ku digihîje jinên karker di her warî de, dê rêxistin û azadiya jinan eşkere bike. Avakirina kooperatîfên jinan a li gund û taxan, bi rêya rêxistina wan a civakî, siyasî û aborî, dê bihêle ku jin di civakê de bi hêza xwe, bêyî ku xwe bispêrin avahiya dewletê ya bi hişmendiya mêran, hebin û jiyana xwe bi hev re bihûnin."

Jin beşdarî nîqaşên me dibin

Rûçem Elyakût bi lêv kir ku ew ji jinên tevli xebatê dibin sûdê digirin û wiha dewam kir:"Dikare bê gotin ku dema me dest bi vê xebatê kir, her mal, kolan, zevî û jinek ku me serdana wan kir, kelecana me zêde kir. Ev jin, ku ji Têkoşîna Azadiya Kurd a 50 salî bi bandor bûne, bi awayekî çalak beşdarî nîqaşên me dibin, rê û rêbazan nîşanî me didin. Bi gotineke din, ev xebat di bingehê de bûye rêyek ji bo rêxistinkirina xwe. Daxwaz û pêşniyarên jinan hene, nemaze di derbarê avakirina komunan de. Em pêşkêş dikin ku meclîsên jinan bi rêya rêxistinên herêmî li navçe, gund û bajaran çalak bikin û bixebitînin. Bi girtina hêz û moralê ji van jinan, em di vê çarçoveyê de ji bo ji nû ve avakirinê têdikoşin."

Bi rizgariya jinê xwe bi rêxistin bikin

Rûçem Elyakût bi lêv kir ku birdoziya rizgariya jinan, li dij polîtîkayên şerê taybet bersivek e û got:"Armanca bingehîn a xebata me ew e ku em birdoziya rizgariya jinan li dijî polîtîkayên şerê taybet ên li dijî jinan, polîtîkayên destdirêjî, tecawiz û kuştinê rêxistin bikin û bihêz bikin. Birdoziya rizgariya jinan armanc dike van polîtîkayên şerê taybet ên li dijî jinan têk bibin. Li ser vê bingehê, em bang li hemî jinan dikin ku ji xwe dest pê bikin, li dora birdoziya rizgariya jinan xwe birêxistin bikin û bibin hêzek."