Bêdengî qebûl nekirin

• Li gelek bajarên Ewrûpayê, Kurdan û dostên wan êrişên bi çekên kîmyewî yên dewleta Tirk rûreş kirin. Ji Hamburgê heta bi Viyanayê, li dehan bajaran, Kurdan û dostên wan ji hikûmetên van welatan û rêxistinên berpirsiyar xwest, dewleta Tirk ji ber vî sûcî bixe ber lêpirsînê.

Kurdên li Ewrûpayê, li dijî êrişên bi çekên kîmyewî yên artêşa Tirk, li gelek bajaran dest bi lidarxistina çalakiyan kirin.

STUTTGART: Li bajarê Elmanyayê Stuttgartê, bi armanca şermezarkirina êrişên dewleta Tirk a faşîst a bi çekên kîmyewî li dijî qadên gerîla, çalakiyek hate lidarxistin. TJK-E’yê çalakî organîze kir. Kurd û dostên wan, li meydana Kobanê hatin ba hev.

Di çalakiyê de bê navber dirûşma “Erdoganê terorîst” hat gotin û bêdengiya Ewrûpayê li dijî êrişan hat şermezarkirin.

DUSSELDORF: Li bajarê Elmanyayê Dusseldorfê, bi pêşengiya YJK-E Dusseldorfê û Meclîsa Jinan a Asya Yuksel Duisburgê, li ber îstgeha navendî ya trenan çalakiyeke protestoyî hat lidarxistin. 

MUNCHEN: Li vî bajarê Elmanyayê, bikaranîna çekên kîmyewî ji aliyê dewleta Tirk ve, bi çalakiyekê hat protestokirin. Çalakger li navenda bajêr hatin ba hev, deqeyekê rêz ji bo giyanê gerîlayên şehîd girtin. Di daxuyaniya li çalakiyê de hat destnîşankirin ku bikaranîna çekên kîmyewî sûcek e li dijî mirovahiyê.

FRANKFURT: Li vî bajarê Elmanyayê jî li dijî bikaranîna çekên kîmyewî nerazîbûn  hat nîşandan. NCDK, YJK-E, Ciwanên Demokratîk ên Nû (YDG), û gelek rêxistinên piştgir li Hauptwache ya Frankurtê hatin ba hev, bikaranîna çekên kîmyewî dewleta Tirk li Kurdistanê protestokirin û bang li saziyên navneteweyî yên têkildarê mijarê kirin ku li dijî bikaranîna çekên kîmyewî tevbigerin.

FREIBURG: Li dijî sûcên şer ên dewleta Tirk ên bi çekên kîmyewî li dijî gerîla, Kurdên li bajarê vê bajarê Elmanyayê û dostên wan, çalakiyeke protestoyî li dar xist. Saziyên înternasyonalîst jî li çalakiyê bûn. Di çalakiyê de dirûşmên “Erdoganê faşîst“, “Erdoganê kujer“ û “Bijî berxwedana gerîla“ hatin gotin.

HAMBURG: Ji bo şermezarkirina êrişên bi çekên kîmyewî yên dewleta Tirk a faşîst a li dijî herêmên gerîlayan, li Hambûrgê mîtîngek hat lidarxistin. Mîtîng li ber stasyona trenê ya navendî ya Hambûrgê hat lidarxistin, ji bo bibîranîna gerîlayên şehîd, rêz hat girtin. Di daxuyaniyê de, hat gotin, bombeyên kîmyewî ji aliyê Ewrûpayê ve hatine çêkirin û hat gotin, ew, hevkarên sûcên li dijî mirovahiyê ne.

DARMSTADT: Gelek Kurdên li Darmstadtê, li Luisenplatz a li navenda bajêr hatin ba hev û êrişên bi çekên kîmyewî yên dewleta Tirk şermezar kirin. Di mîtîngê de sereqet dirûşmên “Bijî gerîla“ û “Jin jiyan azadî“ hatin gotin.

MANNHEIM: Li bajarê Elmanyayê  Mannheîmê, gelek Kurd, di mîtînga li dijî êrişa bi çekên kîmyewî de hatin ba hev. Siyasetvanê Kurd Faysal Sarilyildiz di mîtîngê de got, dewleta Tirk li dijî berxwedana gerîla neçar maye, hovîtîyeke bê hed û hesab dike.

CENEVRE: Kurd û dostên wan ê li bajarê Swîsreyê Cenevreyê, li dijî bikaranîna çekên kîmeyewî bi destê dewleta Tirk, daketin meydanan û meşeke girseyî li dar xistin. Kurd û dostên wan, bi pêşengiya Jinên Ciwan ên Têkoşer (Têko-JIN) û Tevgera Ciwanên Şoreşger, li ber postxaneya navendê hatin ba hev, ji bo teşhîrkirina bikaranîna çekên kîmyewî maske û cilên spî li xwe kirin û bi gotina dirûşmeyan dest bi meşê kirin. Piştî meşê çalakgeran di hundirê îstasyona trenan a navendî de dest bi çalakiya rûniştinê kir. Hevserokê Navenda Civaka Kurd a Cenevreyê Erdal Atasoy bal bire ser pêvajoya dîrokî ya ji bo Kurdan û got, “Dewleta Tirk a dagirker li sûcên şer û dermirovî yên ji bo tinekirina destkeftiyên gelê Kurd, dewam dike. Em ê li her derê bikaranîna gazên kîmyewî û bi jehr teşhîr bikin û li xwedî li berxwedana gerîla derkevin.”

BERN: Kurd li paytexta Swîsreyê Bernê li dijî bikaranîna çekên kîmyewî daketin qadan. Ew li Meydana Bahnhofê hatin ba hev û êrişên bi çekên kîmyewî yên dewleta Tirkiyeyê li dijî Herêmên Parastinê yên Medyayê protesto kirin. Kurdistaniyan wêneyên 17 gerîlayên li Zap, Avaşîn û Metînayê di êrişên kîmyewî de şehîd bûn, hildan û bê navber dirûşmeyên “Bijî berxwedana gerîla” û “Bijî Serok Apo” gotin. Bûrhan Karakoç li ser navê Meclîsa Şehîd Atakan Mahir a Bernê axivî û ev bang li civaka navneteweyî kir: “Hûnê heta kengê li bendê rawestin? Em kîjan delîlê pêşkêşî we bikin? Ma her tişt têra xwe ne eşkere ye? Dewleta Tirk çekên kîmyewî bi kar tîne. Hûn çima li ber ranabin? Ji ber dewleta me nîne? Hûnê çi qas berxwedan û mirovahiya me ji nedîtî ve bên?”

ZURICH: Li ser banga Meclîsa Jinan a Bêrîtanê û CDK Zurichê, Kurd û dostên wan li nava stasyona trenê ya Navendî, hatin ba hev û mîtîngek li dar xistin. Di çalakiyê de êrişên bi çekên kîmyewî yên dewleta Tirk a dagirker hatin teşhîrkirin û rûreşkirin.

BASEL: Kurd û dostên wan li ser banga Navenda Civaka Demokratîk a Kurd (CDK) û Meclîsa Jinan a Ronahî li Claraplatzê hatin ba hev, bi çalakiya ku li dar xistin, xwedî li têkoşîna gerîla derketin û bikaranîna çekên kîmyewî ya dewleta Tirk protesto kirin. Hevseroka CDK’ê ya Baselê Nejla Dersîm got, dewleta Tirk sûcekî şer ê din li dijî Kurdan kiriye û nabe ku mirov bêdengiya saziyên navneteweyî ya li dijî bikaranîna çekên kîmyewî ya dewleta Tirk, qebûl bike. 

LONDON: Li ser banga TCŞ û TêkoJIN a Ingilistanê, ji bo protestokirina êrişên bi çekên kîmyewî li ber Pirtûkxaneya Wood Greenê çalakiyek hat lidarxistin.

Beriya çalakiyê, di şexsê 17 gerîlayên bi çekên kîmyewî şehîd bûyîn de ji bo şehîdên şoreşa Kurdistanê rêz hat girtin. Li ser navê TCŞ’ê Çekdar Amara got, ew ê li ser bingehê şerê gel ê bi şoreşgerî, di birêvebirina çalakiyan de bi biryar bin. Ercan Akbal li ser navê Meclîsa Gel a Kurd têkildarê êrişan got, Rêber Abdullah Ocalan bi sekna xwe ya Rêbertiyê ya 50 salan, li Îmraliyê 23 sal in ku li ber xwe dide.

PARÎS: Li banliyoya Parîsê Grignyê, ciwanên TCŞ’ê li dijî êrişên dagirkeriyê çalakiyeke protestoyî li dar xist. Ciwanan bi pêşengiya TCŞ’ê wêneyên Rêber Abdullah Ocalan û alên PKK’ê pankartên ji bo şermezarkirina êrişên bi çekên kîmyewî, hildan. Meşê ji Navenda Civaka Kurd a Demokratîk ta bi Îstgeha Trenan a Navendî dewam kir. 

Li banliyoya Parîsê, Villiers Le Belê jî li ser banga Meclîsa Gel a vê deverê, bi sedan Kurd civiyan. Meşê ji îstgeha banliyoyê heta Navenda Civaka Kurd a Demokratîk dewam kir. Şiyar Gimgim li ser nav Meclîsa Gel a Villiers Le Belê got: “Li cîhanê tu şer bi vî awayî nehatine birêvebirin û ti dewletê li ser hev çekên kîmyewî bi kar neanîne. Ez bang li gel dikim ku li dora berxwedana gerîla ya bê hempa, kom bibe.”

MARSÎLYA: Li bajarê Fransayê Marsîlyayê, bi sedan kes li ser banga Navenda Civaka Demokratîk a Kurd (NCDK) a Marsîlyayê ji bo 17 gerîlayên bi çekên kîmyewî şehîd bûne li ber Nûnertiya Yekîtiya Ewrûpayê hatin ba hev û du saetan çalakiya rûniştinê li dar xistin. Wan pankarta li serê wêneyên 17 gerîlayên şehîd jî hilgirt. Li bajarên başûrê Frasayê Montpellîer û Draguignanê jî bi heman armancê çalakî hebûn. Di çalakiyên li her du bajaran de, êrişên bi çekên kîmyewî yên artêşa Tirk hatin şermezarkirin û bang li Kurdan hat kirin da ku dakevin meydanan.

VIYANA: Li paytexta Awusturyayê Viyanayayê, ji bo şermezarkirina qetilkirina 17 gerîlayan bi çekên kîmyewî, çalakiyek hat lidarxistin. Gelek çalakger ji navenda AGÎT’ê ya li Herrengasseyê heta bi Stephanplatzê meşiyan û bi diruşmeyan qetlîam şermezar kirin.

NAVENDA NÛÇEYAN