MALÇEP: Ma ganî goreyê xoza awanîyan bivirazê

• Hemverfekê MALÇAPî Ramazan Derînî va, “Xoza xo kena newîye. Ma ganî goreyê xoza têbigêrê.”

AHMET KANBAL / MA / MELETÎ

Erdlerza Xarpêtî ya 24ê Çeleyê 2020î de bînayê ke Meletî de xisar girewtibî rijîyayê. Bêtedbîrîye ver Meletî de xisar zêdîya. Eşkera bîyo ke, bînayê ke rijîyayê ekserî bêusul ameyê viraştene. Hemverfekê Platformê Pawitişê Derûdorî yê Meletîyî(MALÇEP) Ramazan Derînî dîyar kerd ke, na afate bi eşkera ameye.

‘Seba rantî’

Ramazan Derînî va, “Çi heyf ke, sîstemo kapîtalîst xo rê heq vîneno ke seba karê xo xoza talan bikero. Meletî serê fayê aktîfî de ca geno. Nê cayan de ganî awanîyê berzî meyerê viraştene. Hetê zanyaran, rêxistinanê sivîlan, komeleyan û platformanê derûdorî ra hisyarîye ameyê kerdene la kes goş panêvist. Netîce de afatêka pîle ameye ma ser.”

‘Ma ganî goreyê xoza bicuwîyê’

Derînî dîyar kerd ke, ganî goreyê coğrafya û zemînî awanîyî bivirazîyê û va, “Ganî awanîyê berzî meyerê viraştene. Xoza xo kena newîye. Çîyê ke zor danê xoza, hetê ci ra ganî bêrê çinkerdene. Ma ganî goreyê xoza bicuwîyê. Ma ganî goreyê xoza awanîyan bivirazê.”

Derînî bale ante madenê zernî yê Erzîngan Îlîçî ser û va, “Nê fayê aktîfî ser o hewzê sîyanurî estê. Sîyanur do şeqan ra têmîyanê Feratî bibo û bibo sebebe felafetê pîlî. Ganî verê nê felaketen bêro girewtene.”