Ev ne tablo lê golên xwê ne!

Nûçeyên Çand/Huner

Duşem 2 Çile 2023 - 03:46

Yek ji wan tiştên ku ji midbexan kêm nabe û ji bo xwarinan tim tê bikaranîn xwê ye. Her wiha ew ji ser sifreyên me jî ti carî kêm nabe. Yanî di jiyana rojane de em xwê pirr bi kar tînin. Lê kêm kes li ser xwê fikirîne û meraq kirine bê ka ev xwê ji ku derê û bi çi awayî tê ser sifreya me, ango dikeve pêjgeha me.

Ji bo wênegirê Elman Tom Hegen ev yek bûye kul û meraq; ji ber wê jî ev bi salan e ku ew wêneyên golên xwê yên li dinyayê digire. Gelek ji wan wêneyên ku wî girtine, razber in, wî ji jor ve wêneyên golên xwê girtine û wêneyên wî eynî weke tabloyên şêwekaran tên xuyanê. Ev wêne weke tabloyên serketê xweşik û cuda ne. Tom Hegen niha, ev wêneyên hanê, di pirtûka bi navê “Salt Works” de berhev kirine û pirtûk çap kiriye. Bi tevahî 167 wêneyên wî di pirtûkê de hatine çapkirin û pirtûk ji heft beşan pêk tê.

Tom Hegen derbarê wêneyên xwe de dibêje, “Ji bo em pêdiviyên xwe yên rojane temam bikin, me insanan şopên xwe li her derê dinyayê hiştiye. Min xwest bi van wêneyan nîşan bidim ka insan hawirdora xwe bi çi awayî bi kar tînin. Her wiha dixwazim ew hay ji van meseleyan hebin û wan hişyar jî dikim.”

Menzereyên ku Tom Hegen wêneyên wan girtine, ne menzereyên xwezayî ne helbet, ew bi destên insanan çêbûne. Ew bi van wêneyên xwe di heman demê de bala xelkê dikşîne ser madenên xwê jî û dixwaze meriv bi saya van wêneyên razber, hinekî li ser vê yekê biponijin.

NAVENDA NÛÇEYAN

 

 

 

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.