- Ev peyman li Ermenistanê bû sedema nerazîbûneke mezin.
Peymana li ser Qerebaxê ku bi serkêşiya Rûsyayê di navbera Ermenistan û Azerbaycanê de hate îmzekirin li paytext Erîvanê hate şermezarkirin. Serokdewletê Azerbaycanê Îlham Aliyev, serokwezîrê Ermenistanê Nîkol Paşinyan û serokdewletê Rûsya Vladîmîr Putîn peyman îmze kirin.
Serokwezîrê Ermenistanê Nîkol Paşinyan diyar kir ku ji bo dawî li şerê li Qerebaxê bîne wî mohra xwe daniye binê peymaneke 'bi êş'. Serokdewletê Rûsyayê jî da zanîn ku wê 'hêza aştiyê' li herêmê bê bicihkirin. Ji niha ve eskerên Rûsyayê ber bi herêmê ketin rê. Li gorî vê peymanê wê herêmên Şûşê, Ahdem, Kelbecar û Laçînê yên Qerebaxê radestî Azerbaycanê bên kirin.
Ev peyman li Ermenistanê bû sedema nerazîbûneke mezin. Bi taybetî muxalefet li ber desthilatdariyê rabû. Gel jî rabû ser piyan û li paytext Erîvanê li pêşiya meclîsê çalakiyek hate lidarxistin. Bang li Serokwezîr Nîkol Paşînyan hate kirin ku îstifa bike, ji ber ku Qerebax firotiye.
Beşdaran fikarên xwe anîn ziman û diyar kirin ku îro Qerebax ji dest biçe wê sibe welatê wan bi temamî bê dagirkirin. Lewma bi tundî li ber lihevkirina li ser Qerebaxê rabûn.
Şerê dawî yê li herêma Qerebaxê, di 27'ê Îlona 2020'an de bi êrîşa Azerbaycanê destpêkiribû. Tê texmînkirin ku di vî şerî de ji her du aliyan herî kêm 4 hezar kes hatine kuştin.
ANF/ERÎVAN
parvê bike
Nûçeyên ku dikare bala we bikşîne
