Wênegir Guneş Kaplanê ku dîrok, mîmarî, kolan, mirov û tevna çandî ya Amedê bi rêya wêneyan belge dike, xebatên xwe yên ku gelek salan e berdewam dike, li Londonê bi pêşangehekê derket pêşberî temaşevanên navneteweyî.
Di xebatên Guneş Kaplanê de ku li ser xeta “Şopên Qedîm” teşe girtine, Amed cihekî sereke digire. Guneş Kaplanê dixwaze ji avahiyên kevirî bigire heya kolanên bajêr, ji jiyana çandî bigire heya çîrokên mirovan ên rojane, qatên cuda yên bajêr bi rêya wênegiriyê berbiçav bike.
Di pêşangeha kesane ya li Londonê hate vekirin de, li gel xebatên ku balê dikişînin ser mîrateya çandî ya Amed û herêmê, hilbijartinên ji projeyên wênegiriyê yên ku di demên cuda de pêk anîne jî cih digirin. Pêşangeha ku ji bo serdanê vekiriye, di heman demê de ji bo Amediyên li Londonê dijîn jî dibe xalek taybet a hevdîtinê. Guneş Kaplanê bal kişand ser wê yekê ku girseyeke baş a Amediyan li Londonê dijî û hemwelatiyên xwe vedixwîne ku serdana pêşangehê bikin û bibin hevparê çîroka Amedê ya ku bi rêya hunerê çûye Londonê.
Bîr, ruh û şopên demê radigihîne
Guneş Kaplanê diyar kir ku ji bo wê xwedî wateyeke mezin e ku dewlemendiya çandî ya Amedê li qada hunerê ya navneteweyî tê xuyakirin û armanc dike ku ne tenê dîmenê fizîkî yê bajêr bîr, ruh û şopên ku di nava demê de kom kirine jî ragihîne. Pêşangeha şexsî ya Guneş Kaplanê li Londonê ku tev li pêşangehên li Tirkiyeyê û welatên cuda bûye, tevkariyê dike ku mîrateya çandî ya Amedê bi rêya hunera wênegiriyê pêşkeşî temaşevanên navneteweyî bike.
Pêşangeha li Londonê ji bo serdanê vekiriye û li bendê ye ku li gel hezkiriyên hunerê, hemû Amedî û xelkê herêmê yê li Londonê dijîn serdana wê bikin.
