- Li Qamişloyê Festîvala 2yemîn a Wênegiriyê bi serkeftî bi dawî bû. Di festîvalê de bi dehan hunermend û rewşenbîr amade bûn. Festîval ji aliyê Yekîtiya Wênegiran a Sûriyeyê ve hat lidarxistin.
Di festîvalê de hunera wênegirtinê û çanda resen a herêmê gihîştin hev. 150 wêne û rengên cuda li festîvalê derketin pêş. Navenda Çand û Hunerê ya Mihemed Şêxo mazûvaniya festîvalê kir.
Her wêne çîrokeke cuda ya jiyan, ked û xwezaya herêmê vedigot. Di nava beşdariyeke zêde ya rojnameger û hunerhezan de, xelatên "Wêneyê Herî Baş" hatin dabeşkirin. Xelata mezin gihîşt Mûsa Telasî û wênegirê ji Qamişloyê Rodî Tehlo.
Ji endezyariyê ber bi cîhana hunerê ve
Çîroka Rodî Tehlo balkêş e. Ew bi xwe endezyarê petrokîmyayê ye. Lê hezkirina wî ya ji bo hunerê û dîtina wî ya tûj, ew ber bi cîhana wênegirtiyê ve bir. Tehlo di sala 2008an dema li Himsê zanîngeh dixwend wî behreya xwe dîtiye. Wî diyar kir ku piştî şerê Baxozê yê sala 2020î wî bi awayekî profesyonel dest bi vî karî kiriye.
Rodî Tehlo bi 4 wêneyên taybet xelata "Wêneyê Herî Baş" wergirt. Di nav wan de wêneyekî herî zêde bala amadebûyan kişand. Ew wêneyê zarokeke Efrînî bû ku 4 caran bi darê zorê hatibû koçberkirin. Sê wêneyên din jî li ser folklor û kincên Kurdî yên resen bûn.
Rodî Tehlo di hunera xwe de herî zêde girîngiyê dide rûyên mirovên navsere û extiyar.
Dixwaze serpêhatiyên li Şengalê nîşan bide
Tehlo ji bo wêneyên ku digire got; "Ez hez dikim wêneyên kal û pîran bigirim. Ji ber ku di rûyên wan de zehmetiyên jiyanê û di cilên wan de resenî û çanda me ya kûr xuya dikin."
Rodî Tehlo bi kameraya xwe ne tenê Kurdan, mozaîka herêmê ya wekî Ereb, Suryan, Aşûrî, Ermen û Kurdên Êzidî jî belge dike.
Wênegirê Kurd heta niha berhemên xwe di pêşangehên navneteweyî yên wekî li Moskow, Berlîn, Koln û St. Petersburgê nîşan dane. Wî di heman demê de li bajarê xwe Qamişloyê jî du pêşangeh vekirine. Rodî Tehlo niha jî amadekariyan dike ku hunera xwe bibe Swîsreyê.
Ew her wiha di pêşbirka navdar a navneteweyî ya "Mihemed Bîn Raşid El Mektûm" a li Îmaratê de bi du wêneyên "reş û spî" beşdar bûye. Tehlo diyar dike ku armanca wî ya herî mezin a paşerojê ew e ku biçe Şengalê.
Ew dixwaze çîroka Şingalê bi rêya lensa xwe bigihîne cîhanê.
NAVENDA NÛÇEYAN
