- Kurdên ji Elmanya, Swîsre, bakurê Fransayê û Belçîkayê roja greva neteweyî ya li dijî sîlehên kîmyewî li bajarê Elmanyayê Dusseldorfê civiyan.
SILÊMANÊ ZAXURANÎ / DUSSELDORF
Li bajarê Elmanyayê Dusseldorfê, bi hezaran Kurdî û dostên wan bikaranîna sîlehên kîmyewî û bêdengiya dinyayê beramberî vî sûcê şer protesto kir. Ji mêj bû ku çalakiyeke ewqasî bi heybet a Kurdan li ewrûpayê nehatibû lidarxistin. Ber çemê Rheinê, beramberî avahiyên rêveberiya eyaletê Kurdan peyamên xwe dan: Dewleta Tirk a qirker sîlehên kîmyewî bi kar tîne, sûcên şer dike! Hûn bêdeng in û pişta hevgirê xwe yê NATO´yê digirin.
Di çalakiya bi heybet de Kurdên ji Elmanya, bakurê Fransa, Holanda, Swîsre û Belçîkayê hebûn. Çalakî di çarçoveya “Roja Greva Neteweyî li Ewrûpayê ya li dijî Sîlehên Kîmyewî” de pêk hat. Kurdan û dostên wan ji Dusseldorfê peyamek da “Berxwedana gerîlayê azadiyê berxwedana me ye”.
Di çalakiyê de hêrsa ji bêdengiya Rêxistina Qedexekirina Sîlehên Kîmyewî (OPCW), Neteweyên Yekbûyî (NY) BM, û NATO´yê jî eşkere xwe da der. Kurdan peyama, “Heta ku heyetekê bişînin deverê û ya lazim bikin, çalakiyên me wê bênavber deam bikin” da.
Li Rheinwiesenê, li cihê kombûna baskê Avaşînê hêrsa li dijî dijminê mirovahiyê diyar bû. Ciwan, jin, mêr û kal û pîr. Wan peyamên xwe jî bi pankart û dovîzan dan. Lê yek ji peyamên xurt dîsa mekapa dêw tevî slogana “Bijî berxwedana gerîla” bû.
Baskê Zapê jî ji ber DGB´ê Hausê meşiya ber bi meydana mîtîngê ve. Li wir jî bi kîsên spî û maskeyan êrişakariya dewleta Tirk û sûcên wê hatin rûreşkirin.
