Fikrên Rêbertiyê li seranserî cîhanê

• 4’ê Nîsanê rojbûna Rêber APO, li çar aliyên cîhanê weke ‘Roja Pirtûkên Ocalan’ tê pîroz kirin. Îsal ji Kolombiya heta Yûnanîstanê, ji Îtalya heta Endonezyayê, li gelek welatan wê civîn, panel, nîqaş û xwendinên kollektîf pêk bên. 

4’ê nîsanê ji bo enternasyonalîst û aktîvîstên li çar aliyên cîhanê, bû rojeke dîrokî. Bi wesîleya rojbûna Rêber APO, li çar aliyên cîhanê, çalakiyên ‘Roja Xwendina Ocalan’ tên lidarxistin. Ev çalakî bir armanca berbelavkirina fikrên Rêber APO û nîqaşkirina paradîgmaya modernîteya demokratîk tên organîzekirin. Rojên Xwendina Ocalan, ji aliyê tevgerên civakî û komên enternasyonalîst ên li herêmên cuda yên cîhanê, eleqeyeke baş dît. Di sala 2023’an de ji 40 bajarî zêdetir çalakiyên hemwext hatin lidarxistin. Di sala 2024’an de jî li 50 welatî bi dirûşmeya ‘Diyalogên bi Ocalan re’ ji 250’yî zêdetir çalakî hatin lidarxistin. 

Ji Kolombiya heta Endonezyayê

Îsal jî tê payîn ku bi tevlîbûna derdorên akademîk û aktîvîst ên cihêreng, hêjmara civînên xwendin û nîqaşan hîn zêdetir bin. Ji Kolombiyayê heta Afrîkaya Başûr, ji Yûnanîstanê heta Swêdê, ji Îtalyayê heta Endonezyayê, li çar aliyên cîhanê, gelek rêxistin û kom, çalakiyên xwendin û nîqaşê yên bi mijara hizrên Rêber APO, lidar bixin. 

Ji bo jinan û ciwanan xweser

Di çarçoveya kampanyaya ku ji aliyê Akademiya Modernîteya Demokratîk tê piştgirî kirin, ji pirtûkên Rêber APO ku ji 16 zimanan zêdetir hatine wergerandin, wê beş bên xwendin. Di çalakiyan de analîzên Rêber APO yên di derbarê azadiya jinê û tevgerê femînîst de, cih digrin. Li Ljubljanayê jin wê li ser perspektîfa şoreşa jinê ya sedsala 21’an nîqaş bikin. Ew ê li Swêd, Fînlandiya û Avûstûryayê jî derbarê paradîgmaya modernîteya demokratîk çawa digîhê tevgerên jin û ciwanan, çalakî bên lidarxistin. Li Barselonayê jî wê ciwanên enternasyonalîst, nivîsên Rêber APO bi wêneyên li ser dîwaran xêz bikin û li qadan berbelav bikin. Herwiha wê li Galîçyayê jî li navendeke çandî, ew ê têgeha neteweya demokratîk bê nîqaş kirin. 

Çalakiyên li erdnîgariyên cihêreng

Kolombiya: Hevdîtinên xwendinê yên li Bogota, Manîzales û Medellînê.

Slovenya: Panelên ji aliyê komên jinan û anarşîstan ên li Ljublianayê ve hatine organîzekirin.

Yûnanîstan: Li Selanîk, Atîna û Gîrîtê danasîna bi Yûnanî ya pirtûka ‘Sosyolojiya Azadiyê’. 

Îtalya: Li Torînoyê civînên nîqaşa li ser perspektîfên şoreşgerî.

Îspanya û Portekîz: Ji aliyê komên enternasyonalîst çalakiyên xwendinê.

Avûstûrya: Li Viyanayê bernameya perwerdeyê ya 2 rojan.

Fransa: Li Marsîlyayê hevdîtina ji aliyê tora piştgiriyê ku hatiye organîzekirin.

Swêd: Li bajarên weke Umea, Gavle, Uppsala, Lund û Stockholmê, danasîna pirtûka ‘Şaristaniya Kapîtalîst’ a ku nû hatiye wergerandin.

Fînlandiya: Li bajarên Oulu, Tampere û Helsînkiyê, panel û nîqaş. 

Endonezya: Li Jakartayê çalakiya nîqaşê ya ji gel re vekirî.

Hûn nikarin fikran dîl bigrin

Nêrînên Rêber APO bi tenê li Rojhilata Navîn na, di heman demê de li Emerîkaya Latîn heta Ewrûpayê, ji Afrîka heta Asyayê, li erdnîgariya pir berfireh eleqeyê dibîne. Paradîgmaya Modernîteya Demokratîk ji bo tevgerên civakî dibe çavkaniya îlhamê, ji bo tevgerên ekolojiyê û têkoşîna jinan li gelek qadan perspektîfeke nû pêşkêş dike. Ji ber vê sedemê Roja Xwendinê ya 4’ê Nîsanê, bi tenê çalakiyeke bibîranînê nîne, di heman demê de weke hewldaneke avakirina piştgiriya hizirandinê û alternatîfê derdikeve pêş. Di çalakiyên îsal de jî, tê armanckirin ku kampanyayê ji bo berbelavkirina fikrên Rêber APO û azadiya wî ya fizîkî, hîn xurttir bibin. Ev çalakiyên ku bi dirûşmeya ‘Hûn nikarin fikran dîl bigrin’ tên lidarxistin re tê armanc kirin ku dawî li tecrîda 26 salan a li Rêber APO bê anîn û pêşiya piştgiriya cîhanî ya ji bo rakirina astengiyên li pêş çareseriyeke aştiyane bê vekirin.

Em ê her li gel wî bin

Di ragihandina derbarê kampanyayê de ev peyam hate dayîn:’’Tevî ku Ocalan çaryek sedsale di girtîgehê de ye, serî netewand. Em ê jî her li gel wî bin. Weke Ocalan jî dibêje:’’Têkoşîna me bi tenê ji bo azadiya gelê Kurd nîne, ji bo azadiya mirovahiya cîhanê ye.’’ Kampanya me ya ku em ji bo bidawîkirina tecrîdê, çareseriya aştiyane ya ji bo pirsa Kurd û azadiya gelê Kurd dimeşînin wê dewam bike.’’ Çalakiyên Roja Xwendiya Pirtûkên Ocalan ên Cîhanî ku doh destpêkir, ew ê heta 9’ê Nîsanê dewam bike.

NAVENDA NÛÇEYAN