Divê komîsyon bi rolek çalak tevbigere

Zanyarê siyasetê Mehmet Zahîr Saritaş anî ziman ku ji bo pêvajo bi rengekî baş bimeşe divê komîsyona li meclîsê hatiye avakirin bi roleke hîn çalak tevbigere û guhdarîkirina li aliyan a li komîsyonê wê girîng be.

Zanyarê Siyasetê Mehmet Zahîr Saritaş pêvajoya ku têkildarî çareseriya meseleya Kurd hatiye destpêkirin nirxand û diyar kir ku pêvajoyê bi zor û zehmetiyên ji ber bûyerên herêmî û navneteweyî destpê kiriye; lê belê desthilatdariyê nexşerêyeke stratejîk neafirandiye.

Saritaş got, “Tirkiye hem li nava xwe gavên ji bo demokratîkbûnê bi têrkerî neavêje hem jî li Sûriyeyê polîtîkayeke nerasyonel û tekperest dimeşîne, bi vî rengî pêvajoyê dixe nava rîskê. Ji bo çareserî mayinde be pêwîstî bi zemîneke danûstandinan a demokratîk û planeke demdirêj heye.”

Saritaş işaret bi zextên desthilatdariyê yên li ser muxalefeta siyaseta navxweyî kir û anî ziman ku ev zext li pêvajoyê nayê û destnîşan kir ku ev polîtîka zerarê dide pêvajoya aştiyane. Saritaş diyar kir ku divê desthilatdarî dest ji vê nêzîkatiyê berde û ji bo tevkariyê li pêvajoyê bike gavan biavêje.

Her wiha ragihand ku ji bo pêvajo bi rengekî baş bimeşe divê komîsyona li meclîsê hatiye avakirin bi roleke hîn çalak tevbigere û guhdarîkirina li aliyan a li komîsyonê wê girîng be.

ANF / NAVENDA NÛÇEYAN