- Ev çend roj in bi destê çeteyên hikûmeta Şamê li Taxa Şêx Meqsûd û Eşrefiye yên Helebê Kurd bi awayekî hovane têne qetilkirin. Meclîsa Gel a her du taxan jî da zanîn ku ew ê dev ji taxên xwe bernedin û weke her car Kurd li van taxan li ber xwe dan. Heya îro jî li ber xwe didin û ne diyare ew ê rewşa Helebê çi bibe.
Piştî êrîşên hovane pêk hatin şûnde Kurdên li çar aliyên dinyayê li ser medyaya civakî helwest nîşanî van êrîşan dan û şermezar kirin. Her wiha şêwekar û grafikerên Kurd jî ji van êrîşan re bêdeng neman û weke her car bi xêzên xwe vê qirqirinê şermezar kirin.
Şêwekar Lukman Ahmed ku bi xwe jî ji Rojava ye bi du xêzên taybet balê bir ser berxwedana jinên Kurd û li bin wêneyên xwe van gotinan parve kir; “Şervanên Kurd her tim di dilê Kurdan de dijîn. Gava tarî dadikeve ew weke ronahiyê diçirûsin. Ew ji mirin û guleyan pîroztirin. Lê cîhadîstên Ereb û Sunnî tim wehşetê ava dikin û weke berazan bi awayekî hovane êrîş dikin. Li hember van berazan jinên Kurd serî netewandin û li hember hîçîtiyê şer kirin.” Her wiha ew li bin xêzeke xwe ya din jî wiha nivîsiye; “Bi hezaran destan te hilgirtine, bi hezaran dest navê te gotine.”
Li hêla din Ribwar Parwîzî jî wêneyekî balkêş yê ku IŞÎD û cangoriyên YPJ’yê temsîl dike parve kir û li bin wêneyê xwe vê gotinê parve kir;
“weke berf û weke dar
wek gulebax û wek bihar
şehîd av e
tîna zeviyê dişkêne
tilî û dest e
êşla axê dihejîne...”
NAVENDA NÛÇEYAN
