KCK: Divê Iraq peymanê betal bike

• Komîteya Têkiliyên Derve ya KCK’ê bang li dewlet û hikûmeta Iraqê kir ku peymana ku li gel Tirkiyê daniye betal bike. KCK’ê got,’’Eger dewleta Iraqê naxwaze weke dewleteke ku sicîla xwe bi sûcên qirkirinê tijî ye ji bo dagirkirina welatê xwe peyman mohr kiriye derbasî dîrokê bibe, divê tavilê dest ji peymana bi Tirkiyeyê re berde û tavilê betal bike.’’

Komîteya Têkiliyên Derve ya KCK'ê êrîşên terorî yên bi SÎHA’yên Tirk ên li ser Mexmûrê bi bîr xist, destnîşan kir êrîş li ber çavên hêzên Iraqê hatine kirin ku bi navê ‘’parastinê’’ kamp dorpêç kirine. Komîteyê bi domdarî bi bîr xist gelê Mexmûrê dijî çeteyên DAIŞ’ê ‘’Bi berxwedana xwe ya esîl li hemberî terora bi mejî û piştgiriya Erdogan di parastina gelên Iraqê û Başûrê Kurdistanê de bi rola pêşengiyê rabû. Ev berxwedana destanî ya xelkê Mexmûrê ji bo PDK û Mesûd Barzanî yên ku dijminatiyê li wan dike û ambargoyê ferz dike bû cihê spasiyê û nehişt ku Hewlêr bikeve destê DAÎŞ'ê.’’

Gerîlayan DAIŞ sekinand
Komîteya Têkiliyên Derve ya KCK’ê bi domdarî wiha got:
‘’Dewleta Tirk a dagirker ku dema DAÎŞ'ê teror li Iraqê û tevahiya Rojhilata Navîn dikir nekete nava ti hewldanan, li hemberî hêzên ku li Şengal, Mexmûrê DAÎŞ têk birin û navendên berxwedanê êrîşan dike. Ji bo tola têkçûna DAÎŞ'ê ji berxwedêrên li dijî DAÎŞ'ê hilîne êrîşan dike û di van êrîşan de jî çeteyên DAÎŞ'ê yên berê xistiye bin sîwanê artêşa dagirker a ku aniye Başûrê Kurdistanê. Dewleta Tirk hebûna Gerîlayên Azadiyê yên Kurdistanê ya li wê derê ji bo êrîşan weke hincet nîşan dida, ku gerîla piştgirî dida xelkê Mexmûrê û DAÎŞ li ber deriyê Hewlêrê sekinand. Dewleta Iraqê piştî ku di hevdîtinên bi xelkê Mexmûrê re soz dan ku wê kampê biparêze, hêza gerîla ku hejmara xwe kêm bû xwe vekişandin Herêmên Parastinê yên Medyayê û dewleta Iraqê soz da gel ku wê li hemberî her cûre êrîşan kampê biparêze. Ev hevdîtin û gav hemû di çarçoveya daxwaza Neteweyên Yekbûyî û mîsyona wê ya Iraqê UNAMI de di bin çavdêrî û agahiya wan de pêk hatin. Di parastina kampê û ewlehiya wê de, dewleta Iraqê û Neteweyên Yekbûyî ji aliyê hiqûqî û exlaqî ve berpirsyar in."

Êrîş piştî peymana Enqere-Bexdayê ne
KCK’ê bi domdarî peymana di navbeyna Enqerê û Bexdayê de bi bîr xist, destnîşan kir piştî peymanê êrîşên li ser kampê ji nû ve dest pê kirine, xelkê Mexmûrê ku koletiya lê hatî ferzkirin qebûl nekirî careke dî bûye hedefa êrîşên terorî yên Erdogan-Bahçelî ku xwedî mêjiyekî qirkirinê ne.
Komîteyê got,’’Ev êrîş piştî êrîşên li Seyîd Sadiq, Duklan, Biradost û Mawetê hate kirin ku di encamê de 7 mirov şehîd bûn. Ji van êrîşan dewleta Iraqê û Neteweyên Yekbûyî berpirsyar in. Eger balafireke bêmirov a bombebarkirî ya dewleta Tirk a dagirker li ser ezmanê Kerkûkê yekser tê xistin, lê belê bi rojan li ser Mexmûrê bi serbestî digere û dikare êrîşê bike, ev yek nîşan dide ku hikumeta Iraqê cudahiyê dixe navbera Kerkûk û Mexmûrê, çavên xwe ji êrîşên li ser Mexmûrê digire, haya xwe ji êrîşan heye û ev êrîş di çarçoveya peymanê de têne kirin.

Divê tavilê peymanê betal bike
Daxuyaniya Komîteya Karê Derve ya KCK’ê wiha domand:
‘’Eger dewleta Iraqê naxwaze weke dewleteke ku sicîla xwe bi sûcên qirkirinê tijî ye ji bo dagirkirina welatê xwe peyman mohr kiriye derbasî dîrokê bibe, divê tavilê dest ji peymana bi Tirkiyeyê re berde û tavilê betal bike. Ji ber ku ev peyman û daxuyaniyên Wezîrê Parastinê yê Iraqê yên rojên dawî têkildarî tevgera me dan, ji bilî rewakirina dagirkerî û îlhaqa Tirkiyeyê nayê ti wateyê. Wezîrê Parastinê li şûna ku Iraqê li hemberî êrîşên dagirkeriyê biparêze, ji bo gelên Iraqê li ber êrîşên dagirkeriyê yên Tirkiyeyê ranebe argûmanên şerê taybet ên artêşa dagirker diparêze û bi vî rengî êrîşan rewa dike. Ev êrîşa li ser Mexmûrê piştî daxuyaniya Wezîrê Parastinê hate kirin ku ev yek jî balê dikişîne.

Peyman komkujiyê tîne
Peyman û tifaqên bi Tirkiyeyê re têne kirin ne pêşketinê lê belê komkujiyê, ne ewlekariyê lê belê şer û hilweşînê wê bi xwe re bînin. Yên ku berevajî vê îdîa dikin bila li rewşa Sûriyeyê binere ku Erdogan çi anî serê Beşar Esad ku jê re digot 'birayê min' e. Di rojê herî zehmet ên Iraqê de li navenda DAÎŞ'ê konsolosxaneya xwe vekirî hişt û ti alîkarî neda Iraqê. Erdogan û Tirkiye çawa dikare îro tevkariyê li ewlekariya Iraqê bike?

Banga li NY’yê
Banga me li dewlet û hikumeta Iraqê ye ku li hemberî êrîşên Tirkiyeyê yên li ser sivîlan, bi taybetî jî êrîşên li ser penaberên li kampa Mexmûrê û sûcên wan ên şer helwestê nîşan bidin û tavilê dest ji peymana bi piştevanê DAÎŞ'ê Erdogan ê qirker faşîst re mohr kiriye berde. Em bang li Neteweyên Yekbûyî û mîsyona wê ya Iraqê UNAMI dikin ku li gorî sozên xwe tevbigerin, bi çavê PDK û Erdogan ê faşîst li bûyeran nenihêrin, nêzîkatiya ku li deverên din ên cîhanê ji bo ewlekariya penaberan nîşan dide ji bo penaberên li Mexmûrê jî nîşan bidin, jiyana xelkê me yê li kampê biparêzin û bi vê armancê bikevin nava hewldanan." BEHDÎNAN