Girtiya nexweş nayê berda

• Girtiya nexweş Besra Erol ku berdana wê cara duyemîn hate taloqkirin, bi hinceta cezayê dîsîplînê ew dernexistin pêşberî desteyê.

Li girtîgehên li Kurdistan û Tirkiyeyê berdana girtiyan ji aliyê Desteyên Çavdêrî û Îdareyê ve bi rengekî kêfî tê taloqkirin. Yek ji girtiyên ku berdana wê tê taloqkirin girtiya nexweş Besra Erol a 69 salî ye.

Besra Erol sala 2015'an li Pirsûsê di encama êrişa bombeyî ya DAÎŞ'ê de kurê xwe Evrîm Denîz Erol ji dest dabû. Ji ber axaftina li ser gora kurê xwe kiribû, heft sal û nîv cezayê girtîgehê lê hatibû birîn. Besra Erol bi îdîaya "Endametiya rêxistinê" ji Nîsana 2019'an û vir ve girtî ye.

Li gel ku cezayê lê hatiye birîn qediya ye, bi hinceta ku poşmaniyê qebûl nake berdana Besra Erol cara duyemîn hate taloqkirin. Besra Erol ku di Kanûna 2024'an û Hezîrana 2025'an de berdana wê hate taloqkirin, di 8'ê Çileya 2026'an de diviyabû Desteya Çavdêrî û Îdareyê rewşa wê binirxanda. Lê belê li gorî agahiyan, bi hinceta ku cezayê dîsîplînê lê hatiye birîn ew dernexistin pêşberî desteyê.

Besra Erol ku li girtîgehê bi nexweşiyên cidî ketiye, di vê demê de gelek caran rewşa wê giran bû û rakirin nexweşxaneyê. Besra Erol hewl dide bi rêya dermanan jiyana xwe dewam bike. Li gel nodulên tîroît ê ku rîska kanserê heye, ji pişta xwe, ji guatrê, tansiyona bilind û tansiyona çav nexweş e.

Endamên malbatê daxwaza berdana Besra Erol dubare kirin û xwestin, ev zilma tê kirin êdî bi dawî bibe.

ANF/XARPÊT