ZEYNEP GUNER/DUISBURG
33’emîn Mîhrîcana Govendên Kurdistanê roja şemiyê û yekşemê li li bajarê Duisburgê a Elmanyayê pêk hat. Mîhrîcan ku dîlanên gelêrî yên Kurdistanê lê tên pêşkeşkerin, festîvala herî demdirêj a Kurdistaniyên li Ewrûpayê ye.
Komên govendê roja şemiyê di saet 10'an de li ber Rheinhausenhalle a li bajarê Dûisburgê li hev civiyan.
Lîstikvanên govendê yên ji gelek bajarên Elmanya, Fransa û Swîsreyê li hev civiyan, li derdora salonê tûreke meşiyan û dûvre li ber dahol û zirneyê govend gerandin.
Dûvre komên govendê derbasî salonê bûn, pişk hatin avêtin ji bo rêzên komên diyar bibin. Li duh pişkê koman provayên xwe dest pê kirin.
Roja duyemîn de Mîhrîcanê bi deqeyek rêzgirtinê dest pê kir. Pêşkeşvaniya Mîhrîcanê ji aliyê Leyla Ekîncî ve hate kirin. Li ser navê Komîteya Amadekar Mistefa Şahîn axifî.
Ji bela koronayê çênedibû
Mistefa Şahîn wiha peyivî: ''Di pêvajoya belavbûna şewba koronayê de di nava xebatên çand û hunerê de qada govendê jî gelek bandor bû. Ji bo ku em vê rewşa valatiyê derbas bikin û komên ku nû hatine avakirin binîn cem hev û di heman demê de vejînek di hemû qadan de biafirînin em îsal Mîhrîcana Govendê li dar dixin.''
Di dawiyê de Komîteya Amadekar ev peyam belav kir: ''Di mehên dawî de me dît ku li dijî gelê Kurd û hêzên parastina gelê Kurd hewldanên qirkirinê hatin destpêkirin. Ji aliyekî şer kûrtir dibe, li aliyê din jî hewldanên qedexekirina ziman û çanda Kurdî êdî her diçe zêdetir dibe. Çand û hunera me dike sûc û hunermendên ku vê pêk tînin jî dikin sûcdar. Mihrîcana me jî bersiva vê înkarê ye. Em tu carî dest ji çand û hunera xwe bernadin.’’
Li Mihrîcanê ku îsal 12 kom ji gelek herêmên Fransa, Swîsre, Elmanyayê beşdar bûn, 3 komên zarokan jî derketin ser dike û performansên xwe nîşan dan.
Di bernameya muzîkê de Serhado, Tîtalê Feyzo, Rêber Serhat, Koma Xezex û Koma Medî bi stranên xwe cih girtin.
Mîhrîcan bi stranên Koma Xezex û gerandina govendê bi dawî bû.
