Yarmetî wergirtin

Hesen QAZÎ nivîsand —

Şemî 13 Sibat 2021 - 01:32

Sazmanî Înqîlabî u Kurdistan (65)


 

Beşêk le hevpeyvînî  Hemîd Şewket legel Îrec Keşkolî
Awirêk le Bizûtnewey Çepî Êran le nawewe 
Giftugo legel Îrec Keşkolî 
Neşirî Baztab. Hawînî 1378 (1999), 567 lapere

 

Şewket: Wulamî ew çi bû?
Keşkolî: Gutî ewane ew core meselanen ke natuwanê be tenê biryar bida û debê çend rojêk rawestîn. Ca xirap nîye lew derfete kelik werbigrîn û Bexda bibînîn. Ber le malawayî belênî yarmetî da û gutî têdekoşê herçî zûtir wulamî dawxuwazekanî ême bidatewe.

Şewket: Ewey ke îznyan dan biçne derê û Bexda bibînin nîşaney ewe bû ke sebaret be êwe dîtinyan pozîtîv e û serdemî dûjehî tewaw buwe?
Keşkolî: Emnîş hestim her awa bû. Be taybetî ke ew car dîlmancî Farsî ziman legelman le wîlake da mayewe bo ewey eger bimanewê biçîne şwênêk legelman bê. Utumbîlêkîşyan le ber dest nayn bo ewey hercêyekî pêman xoşe biçîn. Wate be ajor û dîlmancî Farsî û heresêkewe deçûyne rêsturan yan le kafeyek da dadenîştîn û le xiyabanekan da qedemman lê deda.

Şewket: Hestit çi bû le ast ewey hatbuwe pêşê?
Keşkolî: Gişt ewane le ber naçarî bû. Bedbextî lewe da bû ke ew core pêwendîye nek her bo ême, belkû bo gurûpe Êranîyekanî dîkeş bibû be meseleyekî asayî. Helsukewtî 'Êraqîyekan, sereray ruwaletekey sûkayetî pê kirdin bû. Yarmetî ewan be ême, yarmetî hêzêkî şorrişgêr be hêzêkî şorişgêrî dîke nebû. Belkû dewletêk deywîst le hemû derfetêk kelik werbigrê bo serewnixûn kirdnewey dewletekey dî û yarmetî dan be êmeş beşêk lew bernameye bû. Ca boye heta cameloskêt ziyatir kird ba, ziyatiryan yarmetî dekridî.

Şewket: 'Êraq deywîst le rêkxistinekanî opozîsyon wekû amrazêk kelik werbigrê bo serewnixûnkirdnî Cumhûrî Îslamî û hêndêk le rêkxistnekanîş be duway ewewe bûn ke be yarmetî wergirtin lew wulate, Cumhûrî Îslamî birûxênin. Lew zemîneye da amajet kird be rêkxistinî Mucahîdînî Gel. Aya ew kesaney ke boxoyan le 'Êraq yarmetîyan wergirtuwe, boyan heye her le ber ewe serkoney Mucahîdîn biken?
Keşkolî: Ferq heye, çunke rêkxistne çepekan le ber naçarî eweyan kird û rêje û berbilawî yarmetî 'Êraq be ewan û yarmetî danî Mucahîdîn bo berawerd kirdin naşê. Mucahîdîn katêk çûne 'Êraq ke le şanoy nêwneteweyî da 'îtîbarêkî zoryan hebû û kemûkûrrî malîyan nebû. Le katêkda hêze çepekan le jêr tîxî Cumhûrî Îslamî û nabedilane û le naçarî penayan hênabû bo 'Êraq.

Şewket: Eger rade û berbilawî yarmetî 'Êraq be Mucahîdîn legel yarmetî ew wulate be Hîzbî Rencberan an hêzekanî hawşubar şiyawî berawerd kirdin nebê, ewe xoy ta radeyek le ber ew ciyawazîyeye ke le nêwan hêzî Mucahîdîn û gurûpekanî tirî opozîsyon da heye, bew manaye, yarmetîy ziyatirî 'Êraq be Mucahîdîn natuwanê nîşaney pasaw hênanewey wergirtinî yarmetîyekî kemtir le layen êwewe bê. Babetêkî dîke pena birdin bo 'Êraq le naçarîyeweye. Ew pasawe exlaqî ye hengawêk nîye pasaw bidrê. Le çûn bo Kurdistan ta giftugo legel memûrî îstîxbaratî 'Êraq sebaret be teqandinewey borî newtî Êran pinktêkî zor cêy têraman heye.
Keşkolî: Pêştir amajem pê kird ke zorbey gurûpe çepekan, Hîzbî Dêmokrat û Komele û Mucahîdîn le xakî 'Êraq ko bibûnewe. Ewey ke pay Hîzbî Rencberan degrêtewe, debê bilêm egerçî hêzêkî cêy serincman nebû, belam pêwendîman legel dewletî 'êrraq hebû û demantuwanî belênî hemû core hawkarîyekyan pê bideyn ta teqandnewey borî newtî Êran û 'Êraqîyekan amade bûn her yarmetîyekî ke bimanewê pêman biken. Belam ême qet amade nebûyn dewrêkî awa bigêrîn. Yanî nemandewîst yarmetî wergirtin le 'Êraq be qîmetî pêşêl kirdnî ew nirx û pirênsîpaney bê ke bawerman pêyan hebû.

Şewket: Ey gurûpekanî dîke çon bûn?
Keşkolî: Ba wek numûne basî Hîzbî Dêmokrratî Kurdistan bikem ke bew hêze herawey ke heybû, hezar û yek serêşey hebû û debû xercî jiyanî be sedan pêşmerge û binemalekanyan dabîn bika, belam qet amade nebû herçîyekî ke dewletî 'Êraq dîktey deka encamî bida, çunke hem deywîst serbexoyî xoy biparêzê û hemîş legel gelî Kurd pêwendîyekî çirî hebê. Nuxtey cêy serinc le pêwendîy Hîzbî Dêmokrrat û dewletî 'Êraq lewe dabû ke hîzb berpirsî pêwendî bê pisanewe degorî bo ewey neka be têperînî zeman bikewne xizmetî Hîzbî Be'sî ew wulate. Helbet dûr nîye ke îstîxbaratî 'Êraq lewe da serkewtibê lêre u lewê le naw gurûpekan da kesanêk bikrê yan pêmil bika. Belam  ew nuxteye rewtêkî giştî nebû. Meseley Mucahîdîn şitêkî dîkeye. Mucahîdîn hem hêz û hem îmkanyan hebû, belam qebûlyan kird be her nirxêk debê bila bibê yarmetî le 'Êraq werbigrin û le birî ewe hêndêk kar encam biden.

Şewket: Katêk ke delêy be her nirxêk debê bila bibê amade bûn le 'Êraq yarmetî wergrin mebestit çîye?
Keşkollî: Ba numûneyek bihênmewe. Debê pirsyar bikeyn boçî Mucahîdîn le Kurdistan royiştin?

Şewket: Bo kwê çûn?
Keşkolî: Duway ewey ke Hîzbî Dêmokrrat le Şûrray Mîlî Muqawemet kişayewe, Kurdekanî Êran û 'Êraq le bûnî Mucahîdîn da dewletî 'Êraqyan debînî. Mucahîdîn çendîn kes le kadrekanî Yekêtî Nîştimanî Kurdistanî 'Êraqyan şinasayî kird û Hîzbî Be's le Silêmanî bosey bo dananewe û hemûyanî kuşt.

Dirêjey heye…

parvê bike

   

Yeni Özgür Politika

© Copyright 2021 Yeni Özgür Politika | Mafên belavkirinê parastî ne.