Xwe amade dike ku tevlî şer bibe!

Sêşem 7 Hezîran 2022 - 00:28

  • “Ev rewş wê were wê wateyê ku PDK piştgiriya heta niha dide dewleta Tirk bigihîne asteke bilind. Ev jî tê wateya bicihanîna plana dewleta Tirk ku ji berê ve dixwaze û hewl dide şer bike şerê nava Kurdan.” 

HPG'ê bi daxuyaniyeke da zanîn ku PDK xwe amade dike da ku tevlî 'şerê dîrokî' yê di navbera gelê Kurd û dagirkeriya Tirk de bibe û bang li hêzên Kurdistanî kir ku bi erk û berpirsyarî rabin û pêşî li êrişeke bi vî rengî bigirin.

Daxuyaniya HPG'ê wiha ye: "Tê zanîn ku ji Avaşîn heta Metînayê li qadeke berfireh em bi dewleta Tirk a dagirker re di nava şerekî giran de ne. Bi taybetî ji 25'ê Gulanê û vir ve li aliyê girê Metîna-Amediyê di navbera hêzên me û artêşa Tirk a faşîst mêtinger de şerekî mezin diqewime. Dewleta Tirk li hemberî hêzên me teknîka serdemê û çekên kîmyewî yên qedexekirî bi kar tîne û tevî vê yekê jî xitimî ye, nikare bi pêş ve biçe.

Şerekî gelekî dîrokî ye

Ev şer di navbera gelê Kurd û dagirkeriya Tirk de şerekî gelekî dîrokî ye. Lê belê li gorî daxuyaniya rayedarekî PDK'ê ku bi navê Alîkarê Wezîrê Pêşmergeyan axivî, daxuyaniya Waliyê Duhokê û li gorî hin agahiyên îstîxbaratî yên gihîştine ber destê me, hêzên PDK'ê amadekariyan dike ku dest li vî şerê stratejîk ê navbera me û dewleta Tirk werde. Li bakurê Metînayê di navbera hêzên me û dewleta Tirk de şer diqewime. Li rojhilatê Metînayê jî şerekî gelekî giran dewam dike. Dema ku hêzên PDK'ê aliyê başûr ê Metînayê bigire, hingî plana dorpêçkirin û îmhakirinê ya dewleta Tirk wê temam bibe, ku li ser hêzên me ferz dike. Bi vî rengî wê PDK tevlî vê pêvajoya tunekirinê bibe. Ev plana xetere ya PDK'ê ya li ser Metînayê ji bo me tê wateya îlana şer. Ji ber ku li cihên girîng ên Serê Metîna hêzên me hene. Bidestxistina wê derê tenê bi êrişê dibe. Ev jî tê wateya destpêkirina pêvajoyeke nû ku qet ne bi dilê me ye.

Hewl dide şer bike şerê nava Kurdan

Ev rewş wê were wê wateyê ku PDK piştgiriya heta niha dide dewleta Tirk bigihîne asteke bilind. Ev jî tê wateya bicihanîna plana dewleta Tirk ku ji berê ve dixwaze û hewl dide şer bike şerê nava Kurdan. Divê were zanîn; tevlîbûna PDK'ê ya bi vî rengî ya li nava şer, yanî êrişa li ser hêzên me yên li Metînayê, wê tenê li Metînayê nemîne û wê bê wateya destpêkirina şerekî giştî. Ji ber vê yekê em bang li hêzên siyasî yên xwedî berpirsyarî, rewşenbîr, hunermend û saziyên welatparêz ên Başûrê Kurdistanê, bang li hêzên Kurdistanî hemûyan dikin ku bi berpirsyarî rabin û pêşî li êrişeke bi vî rengî bigirin.

Banga li hêzên Kurdistanî

Ji bo şer nebe şerê nava Kurdan me heta niha di asta herî bilind de berpirsyariyên xwe bi cih anîn. Lê belê eger êriş li ser hêzên me yên li çeperan bê kirin, hêzên me jî wê xwe biparêzin. Lewma eşkere ye ku pêvajo ber bi asteke gelekî xetere ve diçe. Ji ber vê yekê em bang li gelê xwe û hêzên welatparêz hemûyan dikin ku di vê mijarê de bi erk û berpirsyariya xwe rabin."

 ANF/BEHDÎNAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.