Desteya Çand û Hunerê ya Bakur û Rojhilatê Sûriyeyê bi hevkariya Desteya Çand û Hunerê ya Rêveberiya Sivîl a Demokratîk a Minbicê ji bo xelatkirina wêjevan û rewşenbîrên Minbicê şahiyek li dar xist.
Şahî li navenda Çand û Hunerê ya Minbicê hat lidarxistin. Di şahiyê de hevserokê Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê Hisên Osman, nûnerên Desteya Çand û Hunerê, Rêveberiya Sivîl a Demokratîk a Kantona Minbicê û gelek kesayetên civakî û rewşenbîrên kantonê beşdar bûn.
Di şahiyê de hevserokê Meclisa Rêveber a Rêveberiya Xweseriya Demokratîk Hisên Osman diyar kir ku bi Minbic bi bajarê helbestvan û rewşenbîran tê nasîn. Osman anî ziman ku pêkhate û helbestvanên herêmê bi yekitiya xwe li hember her kesên hewl didin projeya neteweya demokratîk û biratiya gelan têk bibin, mertal in.
Çanda herêmê parastin
Her wiha hevserokê Desteya Çand û Hunerê ya Rêveberiya Xweseriya Demokratîk a Herêma Bakur û Rojhilatê Sûriyeyê Murhef Fehed axivî û got: "Wêjevan û helbestvanên bajêr çanda vê herêmê parastin. Ew cihê rêzgirtinê ye." Hevseroka Meclisa Partiya Sûriya Pêşerojê ya Kantona Minbicê Îbtîsam Ebdulqadir serbilindiya xwe bi rewşenbîr û wêjevanên kantonê anî ziman.
Di şahiya xelatkirinê de hevserokê Yekitiya Rewşenbîran a Minbicê Ehmed El Yûsif axivî û got: "Em bi vê şahiyê ku ji bo hevalên me hatiye lidarxistin û ji bo kedên wan kêfxweş in. Ev cihê rêzgirtin û serbilindiyê ne."
Di dawiyê de nivîskar Zehîde Îshaq, nivîskar Reşîd Ebas, lêkolerê şûnwaran Ebdulwehad Şêxo bi mertalên nîşaneya Rêveberiya Xweser û navên wan li ser in hatin xelatkirin.
ANHA/MINBIC
