- Li navçeya Soran çayxaneyek heye jê re dibêjin Çayxaneya Çandî ya Soran.
Li navçeya Soran çayxaneyek heye jê re dibêjin Çayxaneya Çandî ya Soran. Cûdahiya vê çayxaneyê ji çayxaneyên din ew e ku hemû dîwarên wê û xwarin, vexwarinên lê tên xwarin û vexwarin ji tiştên kurdewarî pêk tên. Welatî dibêjin, çayxane mîna mûzexaneyeke çandî ye û ew li çayxaneyê demeke xweş derbas dikin.
Çayxaneya Hunerî ya Soran a li taxa Herîq ya navçeya Soran bûye cihê komkirina kelûpelên çandî û folklorî yên Kurdî. Kesên serdana vê çayxaneyê dikin dibêjin, çayxane bûye mîna muzexaneya çand û hunerî. Li nava çayxaneyê kelûpelên dema berê lê hatine bi cihkirin. Vê yekê jî bala welatiyên navçeyê û geştiyaran kişandiye ser xwe.
Bi şev li çayxaneyê qerebalixiyek zêde çêdibe û gelek kes ji bo derbaskirina demeke xweş û çay vexwarinê diçinê. Ji ber avhewaya sar a navçeya Soran çaya li ser pelan û sobeya daran, bûne du taybetmendiyên cuda yên vê çayxaneyê. Ji bilî çayê, qehwe, şîr gûz, mewîj, kizwan, hêjîr û tûyên hişkirî jî lê hene û welatî bi xwarina wan demeke xweş derbas dikin.
Ji dûkela cixarê û nargîleyê dûr e
Zimanko Sirêşmeyî xwediyê çayxaneya çandî ya Soran e. Zimanko got, “Li hemû bajaran çayxaneyên bi vî rengî hene. Me jî nexwest em vê çandê ji bajarê xwe kêm nehêlin û me zindî kir. Çayxaneya me cihekî aram û dûr e ji dûkela cixare û nargîleyê. Ji hemû beşên civakê xelk tê çayxaneya me.”
Dîwarên çayxaneyê bi kelûpelên çandî û folklorî yên Kurdî hatine xemilandin û ev yek jî bûye sedem bala welatiyan biçe ser wê. Her wiha şeş karmendên çayxaneyê hene û debara xwe li ser karê çayxaneyê dikin. Du ji karmendên çayxaneyê derçûyên beşa yasa û peywendiyên navdewletî yên Zanîngeha Soran in.
Li gorî gotina xwediyê çayxaneyê, zivistanan Soran gelekî sar e, ji bona wê, hebûna soba daran di çayxaneyê de tam û hewayeke cûda dide çayxaneyê û welatî li ber sobeyê rûdenin û çayê vedixwin.
Peywîra hikûmetê bi cih tîne!
Welatiyê bi navê Kakereş Hisên ê ji Rewanduzê, dibêje, ji ber ku hikûmet girîngiyê bi çand û folklora Kurdî nade, çayxaneya çandî ya Soran bûye cihekî ji bo komkirina welatiyan, kelûpelên çandî û folklorî.
Cadeya Herîq li navçeya Soran bazareke vekirî ya şevan e, dişibe cadeya Îskan a Hewlêr û Sehole ya Silêmaniyê. Qerebalixiyeke zêde lê heye. Ji ber qerebalixiyê, xwediyê çayxaneyê çayxaneya xwe mîna mûzexaneyekê lêkiriye û bi vê yekê bala welatiyan dikişîne ser xwe.
ROJNEWS/SORAN
