‘Sihetî de çinhesibnayîşê Kurdkî yeno vateyê çinhesibnayîşê Kurdan’

Hemserekê Şaxa SESî ya Rihayî Salîh Karataşî derheqê sîstemê ‘e-Reçetem’î de canêdayîşê Kurdkî de erjnayîşî kerdê.

Wezîrê Sihetî Fahrettîn Kocayî dîyar kerdibi ke sîstemê e-Reçetemî rê Îngîlîzkî, Erebkî, Fransizkî, Elmankî û Ruskî ameyê îlawekerdiş. Sîstemî de canêgirewtişê Kurdkî ame rexnekerdiş û vera ney nêrazîbîyayîşî zêdîyayê. Hemserekê Şaxa SESî ya Rihayî Salîh Karataşî dîyar kerd ke no çinhesibnayîşê Kurdan o.

‘Faşîzmê vera Kurdan ramojneno’

Karataşî va, “Timûtim vera Kurdan polîtîkayê asîmîlasyonî yenê ramitene. Bi nê polîtîkayan wazenê Kurdkî çin bikerê. Tena sihetî de ney wazenê cayêk de zî ca medê Kurdkî û ziwanê Kurdan çin bikerê. Ten ana rewşe faşîzmê 100 serran ê vera Kurdan ramojneno.”

‘Ganî statuyê Kurdkî bêro şinasnayîş’

Karataşî dîyar kerd ke na rewşe ver problemî qewimîyenê û va, “Kurdî wexto ke şonê nêweşxane nêşkenê doktorî rê xo weş îfade bikerê. Wexto ke bi ziwanê xo meeşkê xo îfade bikerê, na rewşe ver xeylê problemî qewimîyenê. Ganî her kesî rê bi têduştîye xizmet bêro dayene. Senî ke her ziwanî de xixmetê sihetî yeno dayene ganî bi Kurdkî zî xizmetê sihetî bêro dayene. Ganî Kurdî zî bibê welatîyê têduştî û hinî ganî statuyê Kurdkî bi resmî bêro şinasnayîş.”

‘Çareserî dewlete nîya, ma yê’

Karataşî dîyar kerd ke ganî çareserî dewlete ra meyera pawitene û va, “Vera polîtîkayanê asîmîlasyonî ma ganî wayîrê kultur û ziwanê xo bivejîyê. Ganî şarê ma her warî de Kurdkî bigurîno û wayîrê ziwan3i bivejîyo. Çareserî dewlete nîya, ma yê. Ma ganî polîtîkayanê vera ziwanî puç bikerê û waranê sihet, perwerde û sîyasetî de ziwanê xo bigurînê û wayîrê ci bivejîyê.”

MA / RIHA