Sazmanî Înqîlabî u Kurdistan (79)
Mêhdî Xanbaba Têhranî û dozî Kurdistan
Beşêk le giftugoy Hemîd Şewket legell mêhdî xanbaba têhranî
Awrêk le bizûtnewewî çep le Iran le nawewe, giftugo legel Mêhdî Xanbaba Têhranî, çapî yekem beharî 1989
Şewket: Hîzbî Dêmokratî Kurdistanî Iran Cebhey Dêmokratîkî Neteweyî teîyd kird?
Xanbaba Têhranî: Cebhe le layen hemû layenekanî bizûtnewey Kurdistan teîyd kira, wate hem Hîzbî Dêmokratî Kurdistan, hem defterî Şêx 'Êzedîn Husînî û hem Komele yekparçe cebhey dêmokratîk Neteweyiyan teîyd kird.
Şewket: Babetî dîdarî Recewî legel Tarîq 'Ezîz ke nuxtey despêkî nizîkî ewan le 'Iraq û gewre bûnewey xîlafatî nêwan Benî Sedir û Recewî duwatir bas dekeyn. Ber lewe demwîst basî meseley gelalley xudmuxtarî Kurdistan bikeyn ke amajet be pesindkirdnî kird le şûra [î mîlî muqawemet] da.
Xanbaba Têhranî: Hîzbî Dêmokratî Kurdistan be dîtnî şêwey karî Mucahîdîn ke hîç nirxêkyan bo nasnamey serbexoy şûra danedena, basî meseley xudmuxtarî Kurdistanyan hêna gorê ke le belgekanî şûra da be nawî "xebatî heqxwazaney xelkî Kurdistan" hatbû. Hîzbî Dêmokratî Kurdistan bawerî wa bû, şûra debê boçûnî xoy sebaret be mafî xudmuxtarî xelkî Kurdistan û çarenûsî ewan rabgeyênê. Mucahîdîn wek pêşû rayan geyand Benî Sedir dijî xudmuxtarîye û dimeteqe gerim bû. Duwacar Benî Sedir gutî, dijayetîyekî nîye legel xudmuxtarî û legel eweye lew bareyewe gelaleyek amade bikrê û ewîş boçûnî xoy le ser ew gelaleye radegeyênê.
Şewket: Hênane gorî meseley xudmuxtarî Kurdistan le layen Hîzbî Dêmokratewe lew ser û bende taybetîye da hoy çi bû?
Xanbaba Têhranî: Şûra le jêr guşarî gişt bizûtnewey Kurdistan da bû. Be taybetî Hîzbî Dêmokratî Kurdistan le hemwan ziyatir le jêr guşar dabû. Bew manaye ke dengoy ewe bilaw bibuwewe legel şûrayek kewtûn ke Benî Sedrî têyda endame û dijî eslî xudmuxtarî ye. Sazmanî Komele ew teblîxatey gewre dekirdewe û îdî'ay dekird ke Hîzbî Dêmokrat çuwete naw îtîlafêkî burjuwayî û burjuwazî dujminî gelane. Webîrm dê Qasimlû carêk le kobûnewey Şûra da be şoxî gutî: "Xelkî Kurdistan delên ta duwênê legel rêjîmî Xumeynî şerman dekird û sibeynê ke Mucahîdîn bêne ser kar debê legel wan şer bikeyn”. Ew pêy wabû "bo ewey pêş bew şere dûyemey ke zeynîş bê bigîrê baştire şûra helwêstî xoy le ser Kurdistan be şêweyekî rûn der bibrê."
Be ziyadbûnî guşarêkî ewto le ser şûra û le pênaw parastinî yeketîyekey waman bîr kirdewe ke hîç girê pûçkeyek bo dahatûy Iran nehêlînewe. Meseley xudmuxtarî Kurdistan babetêk bû ke şûra debû pêy rabiga û bername û siyasetî xoy lew rûwewe diyarî bika. Ême waman bîr kirdewe le ber dostayetî û têkelawîyekî le mêjîney ke legel Kurdekanman hebû, renge bitwanîn lew bareyewe bibîne serçawey xizmetêk. Recewîş zor pêşwazî kird lew babete ta ême biçîne Kurdistan û gelalleyekî pêşnyarkiraw bo meseley xudmuxtarî Kurdistan amade bikeyn û bo gengeşe u pesindkirdin bîxeyne ber dem şûra.
Le mangî juwenî salî 1983, emin legel Behmen Nîrûmend çûm bo Kurdistan. Ew zemanî hawrêy ême Nûrî Dêhkurdîş le Kurdistan bû [Nûrî Dêhkurdî her ew têkoşerey dostî Kurde ke le Bêrlîn le sêptambrî 1992 legel Dr. Sadiq Şerrefkendî û dû berpirsî dîkey Hîzbî Dêmokratî Kurdistanî Iran be dest celadanî Komarî Îslamî têror kira, H.Q.] û ême her sêkman be mawey 20 roj legel defterî siyasî û komîtey nawendî Hîzbî Dêmokratî Kurdistan xerîkî giftugo bûyn. Be helkewt ew katey ême le Kurdistan bûyn hîzbî dêmokrat pêlênomî komîtey nawendî hebû û le hemû şwênekanî Kurdistanewe, kadrî rêberayetî lew danîştine da beşdarîyan kird bû û ewe derfetêkî lebar bû ta le nizîkewe giftugoyan legel bikeyn. Akamî ew giftugoyey ême way lê hat ke komîsyonêk be beşdarî endamanî defterî siyasî û komîtey nawendî û ême sebaret be xudmuxtarî gelaleyek amade bika û paş le ser duwanî bîbate kobûnewey şûra. Ême ew gelaleyeman amade kird û be ray rêberî hîzbî dêmokrat, duway pêdaçûnewe û hemwar kirdin wekû gelaley pêşnyarkirawî hîzbî dêmokrat be îmzay ewanman geyand. Be geranewe le Kurdistan ew gelaleyeman wekû diyarîyekî sefer hênawe Parîs û le ber dest Recewîman na bo ewey herçî zûtir le şûra da bixrête ber bas û duway saxkirdnewe pesind bikrê. Duwa car duway têperînî çend mang, gelaley pêşnyarkirawî xudmuxtarî xira naw rojevî kobûnewekanî şûra û Qasimlûş bo qisekirdin le ser ew gelaleye hate Parîs. Ta ew cêgayey webîrm bê le ser dû xal ciyawazî bîrûra hebû lemer ew gelale pêşniyarkirawe.
Dirêjey heye…
