Sediq Efendî Mu’înî girt

Hesen QAZÎ nivîsand —

În 15 Tîrmeh 2022 - 22:12

  • Kake, ewe du meseley le yek ciyawazin, mela Aware le Hîzbî Dêmokratî Kurdistanî Iran legel Qadir Şerîf (Haşmî Heq Teleb), Se'îd Kwêstanî û Husênî Medenî ciya bûnewe.

Sazmanî Înqîlabî u Kurdistan(133)

Basî Sazmanî Înqîlabî le layen Mam Celal Talebanî le giftugoy legel Selah Reşîd da
Kurd û çepekanî Iran û karîgerîyekan le gorepanî siyasî Kurdistanî 'Iraq da.
Kurdî 'Iraq û Iran û peywendîyan legel çepekanî Iran

- Peywendî partî legel grûpe Iranîye çepekan, be taybetî legel grûpî Sazmanî Înqîlabî û cema'etî mela Aware çon destî pêkird?

- Kake, ewe du meseley le yek ciyawazin, mela Aware le Hîzbî Dêmokratî Kurdistanî Iran legel Qadir Şerîf (Haşmî Heq Teleb), Se'îd Kwêstanî û Husênî Medenî ciya bûnewe. Ew kate Ehmed Tofîq ke nawî ('Ebdula Îshaqî) bû, sikirtêrî Hîzbî Dêmokratî Kurdistanî Iran bû. Emane komîteyekyan durust kirdbû be nawî (Komîtey Saxkerewey Hîzbî Dêmokratî Kurdistanî Iran) ke le salî 1964 durust bû tenha yek salî xayand.

(1) Le salî 1967 be hawkarî Silêmanî Mu'înî, Simaylî Şerîfzade, Mela Aware, Se'îd Kwêstanî, Senarî Mamedî û Salarî Heyderî, komîteyekyan pêkhêna be nawî (Komîtey Inqîlabî Hîzbî Dêmokratî Kurdistanî Iran). (2)

Ew komeleye baweryan bewe hebû ke ebê le bin destî malî Mela Mistefa derçin û biçnewe Kurdistanî Iran û şoriş û xebatî xoyan lewê biken.

Le pêş ewey şoriş biken, grûpî çekdarî biçûk durust biken û bigerên be nawçekanî Kurdistanî Iran da û xelik huşyar bikenewe.

Ew kesaney be çalakî îşyan ekird birîtî bûn le Mela Aware û Îsma'îlî Şerîfzade û Silêmanî Mu'înî, her yekeyan bo nawçeyek danrabûn, Silêmanî Mu'înî, bo Mehabad, Mela Aware bo Serdeşt û Îsma'îlî Şerîfzade bo Bane, ewan demêk bû peywendîyan legel ême da hebû.

Mela Aware û Qadir Şerîf le konewe peywendîyan legel ême da hebû, le katî nakokî nêwan mektebî siyasî u Mela Mistefa da, ewan layenî mektebî siyasîyan girt û legel Mela Mistefa nebûn, be taybetî duway ewey, Mela Mistefa peywendî legel Iran behêz kird û ême dûr kewtînewe le Iran û peywendîman legel Bexda û Qahîre damezrand û behêz kird.

Ewan zortir be lay ême da dayanişikand, ew kate ewane destyan kirdbû be xebatî çekdar û pêwîstyan be hawkarî hebû, Mela Aware, Silêmanî Mu'înî nard, bête şarî Silêmanî û ême bibînêt û daway yarmetîman lê bikat. Katêk Silêman Mu'înî degate Silêmanî ekewête dest şîw'îyekan, ewan pêyan elên ke neyen bo lay ême û xotan tûşî ewan meken, ewan yarmetîtan naden, werin ême etanbeyn bo Bexda, bo sefaretî Mîsrî.

Ewanîş be qiseyan kirdbûn û çûbûn bo Bexda bo sefaretî Mîsrî, sefaretî Mîsrîş le êmeyan pirsî û gutyan cema'etêk hatûn serdanî êmeyan kirdûwe û êwe elên çî? Gutman ême reyîman le ser Silêmanî Mu'înî baş niye, belam gutman Mela Aware û Îsma'îlî Şerîfzade, piyawî zor çakin û ême piştîwaniyan lê dekeyn.

Duwayî ke zanîman Silêmanî Mu'înîş le cema'etî ewane, boçûnîşman le ser ew gora, çunke gileyekeman le Silêmanî Mu'înî ewe bû, zor legel Ehmed Tofîq bû. Ke zanîman lew ciyabotewe û hatote lay Komîtey Înqîlabî, raman le serî gorî û gutman zorman pê başe eger hawkaryan biken, belam Mîsriyekan gutbûyan ême dersî dawixwazyekanyan ekeyn. 

Suleymanî Mu'înî, hatbowe Silêmanî û peywendî legel Qale Tegeranî durust kirdbû, ewîş legel xoy hanîbûye derewey şar û le ser şaxî Ezmer, Sedîq Efendî, ke fermandeyekî hêzî Mela Mistefa bû, pêşî pêgirtbû, Suleymanî Mu'înî le cêbeke hênabûwe derê.

Bêguman xeber dirabû be Sedîq Efendî ke Suleyman le cêbeke daye, zor rûn nîye kê  hewalekey geyandûwe, dewrî hîzbî şîw'î çî bowe?

Nadiyare, belam dewrî Qale Tegeranî diyar bû, Sedîq Efendî çû Suleymanî Mu'înî teslîmî Mela Mistefa kird û Mela Mistefa kuştî û termekey nardewe bo Iran û ewanîş termekeyan leber merkezî polîsî Mehabad helwasî û gutyan ewe filane kurî filane ke Mela Mistefa le ser daxwazî ême termekey teslîm kirdûynetewe. [Têbînî amadekar: Diyare rêjîmî Heme Reza Şa ney wêra le Mehabad termî pîrozî Suleymanî Mu'înî le ber degay şarebanî helawesê, belkû le Xanê  (Pîranşar) ewey kird û wêney termî pîrozî Mu'înîyan le rojnamekanî Iran da bilaw kirdewe û be zimanî Farsî le seryan nûsîwe: Suleyman Mo'înî, în est netîcêyê xiyanet : Suleyman Mu'înî, eweye akamî xiyanet]. Teslîmkirdnewey Suleymanî Mu'înî be Iran, dengêkî hêcgar xirapî nayewe bo Mela Mistefa, êmeş eweman kird be hela ke hîzbî şîw'î le serî nûsî, belam neynûsî Mela Mistefa berpirse, belkû witarekeyan le jêr nawî (limlehe min  muharbe ehrar kurdistan Iran?) nusîbu ke ewe karêkî xirape, belam nalên kê kirdûyetî û kê berpirse.

- Rolî Ehmed Tofîq çî bû le naw partî da, peywendî û nzîkayetî le Barzanîyewe  le çiyewe serçawey girtbû?

Ehmed Tofîq le Hîzbî Dêmokratî Kurdistanî Iran da, dû, sê dewrî zor xirapî bînîbû.

Yekem: Heta bilêy rastrew bû, heta bilêy layengirî ewe bû, le Kurdistan da kurd bibestirêtewe be Emerîka û wulatanî Ewrûpa û rojawawe, heta ewe bû be nawî Mela Mistefawe hat bo Beyrût, bo durustkirdinî peywendî legel Emerîka da. Dana Adams Schmidt le kitêbekey da supasî Ehmed Tofîq eka ke çon delîlî bûwe û hênawyetî bo lay Mela Mistefa.

Dûwem: Ehmed Tofîq kabrayek bû, zor tumûhatî hebû, heta be temay ewe bû ke kiçêkî Mela Mistefa bihênêt û bibête kwêxay Kurdistanî Iran. 

Sêyem: Ew zor dijî Partî bû le 'Iraq û dewrêkî zor xirapî bînî le nêwan Mela Mistefa û Partî da. Le handanî Mela Mistefa da, ewende xirap bû ke 'Elî 'Ebdula û biraderanîtir le Sengeser gîran, ewyan danabû be pasewanî zîndaneke, ew lêprisrawî bendîxaneke bû.

Dirêjey heye...

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.