Nezan Bûyn, Heleman kird

Hesen QAZÎ nivîsand —

În 27 Gulan 2022 - 21:09

  • Be giştî bilêm,şoriş le nezanî û bê agayî ême da serkewit û be dest musulmanî layengirî Xumeynî bû be deselatî fermanrewa.

Sazmanî Înqîlabî u Kurdistan(126)

Wutuwêjî nameyî legel hawrê Baqir Murtezewî Xusrewşahî

Be giştî bilêm,şoriş le nezanî û bê agayî ême da serkewit û be dest musulmanî layengirî Xumeynî bû be deselatî fermanrewa. Êsta ke lew zemanî deruwanim, debînim têgeyiştinî ême lemer azadî û dêmokrasî berteng bû, ême duruşmî azadîman beriz kirdbuwewe, bê ewey bizanîn azadî çîye û bînasîn. Bo Tûdeyyekan azadî heman nizîkî le Yekêyî Şûrewî, dijayetî legel Emrîka bû. Bo êmey Rencberî azadî nizîkayetî le Çîn û serheldan be dijî Emrîka bû. Bo êwey Kurd, azadî le duruşmî Xudmuxtarî bo Kurdistan da xoy derdexist. Musulmanekanîş le sedrî Îslam da be duway azadî da degeran.

Gelo ême azadîman denasî û deman zanî çîye? Be bawerî min, ême duruşmî azadîman deda, bê ewey lew azadîye da be sîley çaw le azadîy take kesî birwanîn. Her be bîrîşman da nedehat ke ewe be rêgay azadî takekesî daye ke destman be azadîye komelayetîyekan radega. Ême hîç bîrman le azadî ferdî nedekirdewe. Ew core azadîyane le naw çep ajoyekan da  wek çeproyî û tenanet wek nexoşî nêw zed dekra, ême ewende le çemkî "komelan" da xinka bûyn ke ferdîyetekanman be hîç da nedena.

Eger bgerênewe ew serubendî, komelanî xelik debînîn ke raperîwin û le xiyabanan dan ke eme helbet nîşaney şorişe û serheldan mafî xelkêke ke be salan le jêr guşar da jiyawin. Belam ew xelke neyandezanî çîyan dewê. Şayan nedewîst û ewe dawayeke. Ey duway ew çî? Azadî û dadperwerî çemkî giştî bûn û hîçkes le derewey ew duruşme le dûy nawerokî nedegerra. Bo wêne, Kurdekan xudmuxtarîyan dewîst. Ewe dawayekî zor durust bû belam ewey ke xudmuxtarî çîye, kes hîçî nedegut.

Lew nawe da îslamîş ke duway salanî sal wek dêwêk le gozewe derhatbû û deygurand bo komel nenasraw bû. Ême nemandezanî îslam çîye û nemandenasî. Rêjîmî şa be damezrandinî sansor û xefeqan, xetabar bû ke neyhêşt ême be durustî îslam binasîn. Boçî debû kitêbî 
" Tewzîhulmesaêl" î Xumeynî qaçax bê? Xumeynî tenya rêberêk bû ke deyzanî çî dewê. Wulate rojawayyekan helyanbijard bo ewey be ser dêwezmey komonîzm da zal bin. Xumeynî her ew qisaney cê becê kird ke ber le şoriş le kitêbî "hukûmetî îslamî" da nûsîbûy. Ewe ême bûyn ke bernameman nebû û de giyanî yekdî rohatîn û rêjîmîş de giyanî ême ro hat. Ême heta wexo hatînewe yan le bendîxane da bûyn yan helawtû û yan le sêdare dirabûyn. Ême nek tehemulman nebû, belkû neman dezanî tehemul û derbirdin çîye û mafî şarumendîman nedenasî.

Be girdibirî depirsî başe ewaney ke le Iran dejyan, agadar nebûn. Ey to ke le rojawa dejyay boçî ew rêgayet helbijard. Pirsyarêkî duruste.

Emnîş ew demî gîrodey îdêolojîyek bûm. Ruwanînî îdêolojîk ruwanînêkî yek layeneye, cige le baş û bed hîç şitêkî dîke nanasê. Emin şam denasî û Emrîkaşim denasî ke piştîwanî bû û pêm wa bû herkes be dijî şa û Emrîka bê dekrê dostî min bê, le seretawe hemû bas u xuwasekanman despard be serdemî "duway mergî şa". Wate bê ewey bimanewê û pêy bizanîn rêgay her core gengeşeyekman le ser xoman degirt. Belê min însanêkî îdîolojîk bûm û lew pencerewe dinyam dedî her wam dedî ke takêkî nerîtî dey dî. Ca boyeye emin pêm waye ême bo serkewtin be ser em rêjîme da le pêşda debê xoman le hêndêk kot û bend rizgar keyn û ew demî bizanîn ke çiman dewê.

4- Be bîr u ray êwe çapî em kitêbe be zimanî Kurdî û agadarbûnî gelî Kurd le bîr û ra û boçûnekanî rêberanî Sazmanî Inqîlabî û piştîwanî û beşdarîyan lexebatî gelî Kurd da û rexney Hîzbî Rencberan sebaret be helwêstekanî le ast bizûtnewey Kurdistanî Iran ke le nûsînekanî nemir Irec Keşkolî û Muhsîn Rîzwanî da xoy der dexa, detuwanê sermeşqêk bê bo lê fêrbûn bo cereyan û rewte sertaserîyekan lemer boçûn û helwêstyan le ast dozî Kurd le Kurdistanî Iran da?  

Wulam: Be bawerî min ewe detuwanê pêzanîn bê le ast le xoburdûyî û zehmetekanî kadrekanî Sazmanî Inqîlabî. Şorişgêrêkî Kurdî wek xot, be wexo kirdnî zehmetî zor duway 52 sal dîsan ew hewlane le bîrewerî giştî û be taybetî le zeynî gelî Kurd da zîndû dekeyewe. Belam gelo ewe dekrê bibê be sermeşqêk bo cereyan û rewte sertaserîyekan bo ewey bituwanin lêy fêr bin bo helwêst û boçûn lemer meseley Kurd le Kurdistanî Iranda? Wulamîm nîye. Ew sazman û hîzbane xoyan debê wulamî ew pirsyare bidenewe. Le hemûy girîngtir siyasetekanî hîzb û sazmanekanî Kurdistan xoy heta bilêy girînge ke be helwêst û kirdewekanyan da bênewe û encamyan lê derxen û bîxene ber qise leser kirdin û lêdwanî giştî. Ew babete herçendeş sext û dijwar bê, webîrman dênêtewe ke debê hemû gelanî Iran û be taybetî gelî Kurd le ser palpiştî hêzî gelî xoy be dijî sereroyî û naberanberî hîsab bika û nek piştîwanî bêganan, be taybetî leber eweyke sazman u hîzbe Kurdekan ezmûnî be qîmet û xwênawîyan heye lem rêga dûr u dirêje da. Serkewtinî êwe û gelî Kurd le qûlayî dilewe dexwazim. 

Têbînî: Jimareyey yekemî "çuwar çira" le Rêbendanî 1356 (fêwrîyey 1978) bilaw kirawetewe [H.Q.]

Dirêjey heye…

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.